சிரோடோனின் ஹார்மோனை இயற்கையான முறையில் அதிகரிக்கும் 7 வழிகள்!

"மகிழ்ச்சி ஹார்மோன்" என அழைக்கப்படும் சிரோடோனின் (Serotonin) போதிய அளவு சுரப்பது மன அமைதி, நல்ல தூக்கம், சீரான பசி மற்றும் நேர்மறை எண்ணங்களை ஊக்குவிக்கிறது. சிரோடோனின் குறைபாடு மனச்சோர்வு, பதட்டம், தூக்கமின்மை மற்றும் பிற உடல்நலப் பிரச்சினைகளுக்கு வழிவகுக்கும். அதிர்ஷ்டவசமாக, நமது சிரோடோனின் அளவை இயற்கையாகவே அதிகரிக்க பல வழிகள் உள்ளன. அவை என்னன்ன என்பது பற்றி இந்த பதிவில் பார்க்கலாம். 

1. சூரிய ஒளி நமது உடல் சிரோடோனின் உற்பத்திக்கு மிகவும் அவசியம். சூரிய ஒளியில் உள்ள வைட்டமின் டி, சிரோடோனின் உற்பத்திக்கு உதவுகிறது. தினமும் குறைந்தது 15-30 நிமிடங்களாவது சூரிய ஒளியில் இருப்பது நல்லது. 

2. உடற்பயிற்சி செய்வது உடல் ஆரோக்கியத்திற்கு மட்டுமல்ல, மன ஆரோக்கியத்திற்கும் சிறந்தது. உடற்பயிற்சி செய்யும் போது, மூளையில் இருந்து எண்டோர்பின்கள் மற்றும் சிரோடோனின் போன்ற நரம்பியக்கடத்திகள் வெளியிடப்படுகின்றன. இது மனநிலையை மேம்படுத்தவும், மன அழுத்தத்தை குறைக்கவும் உதவுகிறது. 

3. நாம் உண்ணும் உணவு நமது மனநிலையை பெரிதும் பாதிக்கிறது. டிரிப்டோபன் (tryptophan) என்ற அமினோ அமிலம் சிரோடோனின் உற்பத்திக்கு அவசியமானது. முட்டை, பால், மீன், கோழி, பருப்பு வகைகள், நட்ஸ் மற்றும் விதைகள் போன்ற டிரிப்டோபன் நிறைந்த உணவுகளை உட்கொள்வது சிரோடோனின் அளவை அதிகரிக்க உதவும். மேலும், புரோபயாட்டிக் நிறைந்த தயிர் மற்றும் பிற புளித்த உணவுகள் குடல் ஆரோக்கியத்தை மேம்படுத்துவதன் மூலம் சிரோடோனின் உற்பத்திக்கு உதவுகின்றன. 

4. போதுமான தூக்கம் உடல் மற்றும் மன ஆரோக்கியத்திற்கு மிகவும் அவசியம். தூக்கமின்மை சிரோடோனின் அளவை குறைத்து மனச்சோர்வு மற்றும் பிற பிரச்சினைகளுக்கு வழிவகுக்கும். தினமும் 7-8 மணி நேரம் ஆழ்ந்த தூக்கம் பெறுவது நல்லது. 

5. தியானம் மற்றும் மன அமைதி பயிற்சிகள் மன அழுத்தத்தை குறைத்து மனநிலையை மேம்படுத்த உதவுகின்றன. இவை மூளையின் செயல்பாட்டை மாற்றி சிரோடோனின் உற்பத்தியை அதிகரிக்க உதவுகின்றன. தினமும் சில நிமிடங்கள் தியானம் செய்வது மன அமைதி, மகிழ்ச்சியை ஊக்குவிக்கும்.

6. மசாஜ் செய்வது உடல் மற்றும் மன அழுத்தத்தை குறைத்து மனநிலையை மேம்படுத்த உதவுகிறது. மசாஜ் செய்யும் போது உடலில் கார்டிசோல் (cortisol) என்ற மன அழுத்த ஹார்மோன் குறைகிறது. அதே நேரத்தில், சிரோடோனின் மற்றும் டோபமைன் போன்ற மகிழ்ச்சி ஹார்மோன்கள் அதிகரிக்கின்றன.

7. மற்றவர்களுடன் நல்ல உறவுகளை ஏற்படுத்திக் கொள்வது மன ஆரோக்கியத்திற்கு மிகவும் அவசியம். நண்பர்கள் மற்றும் குடும்பத்தினருடன் நேரம் செலவிடுவது, சமூக நடவடிக்கைகளில் ஈடுபடுவது போன்றவை மனநிலையை மேம்படுத்தி சிரோடோனின் அளவை அதிகரிக்க உதவுகின்றன. தனிமை மற்றும் சமூக தொடர்புகள் இல்லாமை மனச்சோர்வுக்கு வழிவகுக்கும்.