கண்கள் வீங்கிப் போய் சிவந்து உள்ளதா? அலட்சியமாகக் கடந்துவிடாதீர்கள்!

நமது உடல் ஆரோக்கியத்தை கண்களை வைத்தே பெரும்பாலும் தீர்மானித்துவிடலாம். அந்த அளவிற்கு உடல் ஆரோக்கியத்தைக் காட்டும் கண்ணாடியாக கண்கள் விளங்குகின்றன. காலையில் எழுந்தவுடன் உங்கள் கண்கள் வீங்கிப் போய் சிவந்து உள்ளதா? இன்றைய காலத்தில் பலருக்கும் கண்கள் இப்படித்தான் உள்ளது என்று அலட்சியமாகக் கடந்துவிடாதீர்கள். கண்கள் சிவப்பதை நாம் பெரும்பாலும் தூக்கமின்மையுடன் மட்டுமே ஒப்பிட்டுப் பார்க்கிறோம். ஆனால், இவை உங்கள் உடலில் மறைந்திருக்கும் சில பாதிப்புகளின் எச்சரிக்கையாகவும் இருக்கலாம்.

கண்கள் சிவக்கக் காரணம் என்ன?

மருத்துவ அறிஞர்களின் கருத்துப்படி, கண்களின் மேற்பரப்பில் உள்ள மிகவும் நுண்ணிய இரத்த நாளங்கள் விரிவடைவதால் கண்கள் சிவப்பாக மாறுகின்றன. இதன் பின்னணியில் பல காரணங்கள் உள்ளன:

• புறக்காரணிகள்: காற்று மாசுபாடு, புகை, தூசி மற்றும் ஒவ்வாமை (Allergy) போன்றவை கண்கள் சிவக்க முக்கியமான காரணங்களாக இருக்கின்றன.

• டிஜிட்டல் சாதனங்கள்: நீண்ட நேரம் விழித்திருப்பதாலும், கணினி மற்றும் மொபைல் போன் பயன்பாட்டினாலும் கண்கள் வீங்கவும் சிவக்கவும் வாய்ப்புள்ளது.

வாழ்வியல் முறை மாற்றங்கள்

இன்றைய வாழ்வியல் முறையில் கண்களுக்குச் சரியான ஓய்வு கிடைப்பதில்லை. எங்கு பார்த்தாலும் அதிகப்படியான செயற்கை வெளிச்சம் கண்களின் விழித்திரையைப் பாதிக்கிறது. முற்காலத்தில் கண்களுக்குக் குளிர்ச்சி தர மை இடும் பழக்கமும், இமைகளுக்கு எண்ணெய் தடவும் பழக்கமும் இருந்தது. இன்று அந்தப் பழக்கங்கள் மறைந்துவிட்டன.

சாதாரணமாகக் கண்களுக்குச் சிறிது ஓய்வு கொடுத்தால் சிவப்பு நிறம் தானாக மறைந்துவிடும். ஆனால், நீண்ட நேரமாகக் கண் வலியுடன், கண்கள் சிவந்தும் வீங்கியும் இருந்தால், அந்த அறிகுறிகளைப் புறக்கணிக்கக் கூடாது. இது ஏதேனும் ஒரு தொற்றின் தீவிர அறிகுறியாக இருக்கலாம்.

கண் வீக்கம் மற்றும் திரவத் தேக்கம்

காலையில் எழும்போது சிலருக்குக் கண்கள் வீங்கி இருக்கலாம். கண்களைச் சுற்றியுள்ள மென்மையான திசுக்களில் திரவம் தேங்குவதால் இந்த வீக்கம் ஏற்படுகிறது.

1. உப்பு உட்கொள்ளல்: இதற்கு மிக முக்கியக் காரணம் உணவில் அதிகப்படியான உப்பைச் சேர்த்துக் கொள்வதாகும். உடலில் உப்பு அதிகமாகச் சேரும்போது, அது நீரைத் தக்கவைத்துக்கொள்கிறது (Water Retention).

2. மருத்துவ எச்சரிக்கை: தூக்கமின்மை மற்றும் ஒவ்வாமை தவிர, இந்த வீக்கம் நீண்ட நாட்களாகத் தொடர்ந்தால், அது தைராய்டு பாதிப்பு அல்லது சிறுநீரகச் செயல்பாடு தொடர்பான கோளாறுகளைக் குறிக்கலாம் என்று மருத்துவ நிபுணர்கள் எச்சரிக்கின்றனர்.

உலர்கண் நோய் (Dry Eye Syndrome)

தற்போது 'உலர்கண் நோய்' ஒரு வாழ்வியல் நோயாக மாறி வருகிறது. நாம் மொபைல் அல்லது கணினியைப் பார்க்கும்போது அடிக்கடி கண் சிமிட்ட மறந்துவிடுகிறோம். இதனால் கண்களின் ஈரப்பதம் குறைந்து வறட்சி ஏற்படுகிறது.

• அறிகுறிகள்: கண்களில் உறுத்தல், எரிச்சல், பார்வை மங்கலாவது. இதைத் தொடக்கத்திலேயே கவனிக்காவிட்டால், கண்களுக்கு நீண்ட காலப் பாதிப்பை ஏற்படுத்திவிடும்.

கண்களைப் பாதுகாக்கும்(Eyes protection) வழிமுறைகள்!

• 20-20-20 விதி: ஒவ்வொரு 20 நிமிடங்களுக்கு ஒருமுறை, 20 அடி தூரத்தில் உள்ள பொருளை 20 விநாடிகள் பார்க்க வேண்டும். இது உங்கள் கண்களின் அழுத்தத்தைக் குறைத்து பார்வையைத் தெளிவாக்கும்.

• நீர்ச்சத்து: தினமும் போதிய அளவில் தண்ணீர் குடிக்க வேண்டும். போதிய நீர்ச்சத்து கண்களின் ஆரோக்கியத்தைப் பராமரிக்க உதவுகிறது.

• உப்பைக் குறைத்தல்: உணவில் உப்பைக் குறைத்துக் கொள்வது கண் வீக்கத்தைச் சரி செய்ய உதவும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)