ஃப்ரூட் சாலட் சாப்பிடும் பழக்கம் இருந்தா உஷார் மக்களே! இந்த உண்மையை முதல்ல தெரிஞ்சுக்கோங்க!

நம்மில் பலருக்கும் ஆரோக்கியமாக இருக்க வேண்டும் என்ற ஆசை வந்தவுடனே முதலில் தேடுவது பழங்களைத்தான். அதிலும் குறிப்பாக எல்லா வகையான பழங்களையும் சின்னச் சின்னதாக நறுக்கி ஒரு பெரிய பவுலில் போட்டு ஃப்ரூட் சாலட் போல சாப்பிடுவது இப்போது பெரிய ட்ரெண்டாகி விட்டது. இப்படி விதவிதமான பழங்களை ஒன்றாகக் கலந்து சாப்பிட்டால் உடலுக்குத் தேவையான எல்லா சத்துக்களும் மொத்தமாகக் கிடைத்துவிடும் என்று நாம் தப்புக் கணக்குப் போட்டுக் கொண்டிருக்கிறோம். 

ஆனால், ஆயுர்வேதமும் சரி நவீன அறிவியலும் சரி இதற்கு நேர்மாறான ஒரு விளக்கத்தைத் தான் கொடுக்கின்றன. பல பழங்களை ஒன்றாகக் கலந்து சாப்பிடுவது நிஜமாகவே நமது உடலுக்கு நன்மையை தருமா அல்லது பெரிய பாதிப்பை ஏற்படுத்துமா என்பதைப் பற்றி தெரிந்து கொள்வோம் வாங்க.

பழங்கள் Vs செரிமானம்!

ஒவ்வொரு பழத்திற்கும் ஒவ்வொரு வகையான செரிமான நேரம் மற்றும் பிரத்யேகமான தன்மை இருக்கிறது. தர்பூசணி மற்றும் முலாம் பழம் போன்ற நீர்ச்சத்து நிறைந்த பழங்கள் நமது வயிற்றுக்குள் சென்ற இருபது நிமிடங்களிலேயே மிக வேகமாகச் செரிமானம் ஆகிவிடும். ஆனால் வாழைப்பழம் அல்லது ஆப்பிள் போன்ற சற்று கடினமான பழங்கள் முழுமையாக செரிமானம் ஆக அதிக நேரம் எடுத்துக்கொள்ளும். 

இப்போது இவை இரண்டையும் ஒன்றாகச் சேர்த்து சாப்பிடும்போது ஒரு பெரிய சிக்கல் உருவாகிறது. மிக வேகமாகச் செரிக்க வேண்டிய தர்பூசணி வயிற்றில் நீண்ட நேரம் தங்கி புளித்துப் போக ஆரம்பித்துவிடும். இதனால் தேவையில்லாத வாயுத் தொல்லையும் நெஞ்செரிச்சலும் தான் நமக்கு மிஞ்சும். அடிக்கடி வயிற்றுப் பொருமல் வருவதற்கு இதுவே ஒரு முக்கியக் காரணமாக அமைகிறது.

இனிப்பும் புளிப்பும் சேர்ந்தால் ஆபத்து!

அதேபோல இனிப்பான பழங்களையும் புளிப்பான பழங்களையும் எப்போதுமே ஒன்றாகக் கலக்கக் கூடாது. ஆரஞ்சு, திராட்சை போன்ற சிட்ரிக் அமிலம் உள்ள பழங்களை, இனிப்பான மாம்பழம், வாழைப்பழத்தோடு சேர்த்துச் சாப்பிடுவது வயிற்றுக்கு மிகப்பெரிய சுமையைக் கொடுக்கும். புளிப்பான பழங்கள் செரிமான அமிலங்களை அதிகமாகச் சுரக்கச் செய்யும். 

அந்த நேரத்தில் இனிப்பான பழங்கள் உள்ளே சென்றால், அது செரிமான அமைப்பையே முழுவதுமாக ஸ்தம்பிக்கச் செய்துவிடும். இதனால்தான் ஃப்ரூட் சாலட் சாப்பிட்ட பலருக்கும் வயிறு உப்புசம் போன்ற பிரச்சனைகள் உடனடியாக வருகின்றன. மேலும் பாலுடன் எந்த ஒரு பழத்தையும் சேர்த்துக் குடிப்பது மில்க் ஷேக் பிரியர்களுக்குப் பிடிக்கும் என்றாலும், அதுவும் செரிமான மண்டலத்திற்கு ஒரு மிகப் பெரிய எதிரிதான்.

பழங்களைச் சாப்பிடும் சரியான முறை!

எப்போதுமே ஒரு நேரத்தில் ஒரே ஒரு வகையான பழத்தை மட்டும் சாப்பிடுவதுதான் உடலுக்கு நூறு சதவீதம் நன்மையைத் தரும். உங்களுக்கு இரண்டு பழங்கள் சாப்பிட ஆசையாக இருந்தால், இனிப்பான பழங்களை இனிப்பான பழங்களோடு மட்டுமே சேர்த்துக் கொள்ளுங்கள். அதேபோல புளிப்பான பழங்களை புளிப்பான பழங்களோடு மட்டும் சேர்ப்பது ஓரளவுக்குப் பாதுகாப்பானது. 

அதுமட்டுமில்லாமல், காலை உணவு அல்லது மதிய உணவோடு சேர்த்துப் பழங்களை டெசர்ட் போல சாப்பிடும் பழக்கத்தை முற்றிலும் தவிர்ப்பது ரொம்பவே நல்லது. உணவிற்கும் பழங்களுக்கும் இடையே குறைந்தது இரண்டு மணி நேர இடைவெளி இருப்பது மிக மிக அவசியம்.

பழங்கள் எப்போதுமே நமது உடலுக்கு ஆரோக்கியம் தரும் அமிர்தம் போன்றதுதான். ஆனால் அதை எப்படிச் சாப்பிடுகிறோம், எதோடு சேர்த்துச் சாப்பிடுகிறோம் என்பதில்தான் அதன் முழுமையான பலனும் அடங்கியிருக்கிறது.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)