வைட்டமின் 'சி' வேண்டுமா? ஆரஞ்சு பழத்தை விட பச்சை மிளகாய் தான் பெஸ்ட்!

பொதுவாக ஆரோக்கியம் மற்றும் வைட்டமின் 'சி' (Vitamin C) என்று சொன்னாலே நம் நினைவுக்கு வருவது ஆரஞ்சு அல்லது எலுமிச்சை தான். ஆனால், நம் வீட்டு சமையலறையில் சாதாரணமாகக் கிடக்கும் பச்சை மிளகாயில், ஒரு ஆரஞ்சு பழத்தை விட அதிகப்படியான ஊட்டச்சத்துக்கள் ஒளிந்திருக்கின்றன என்பது உங்களில் எத்தனை பேருக்குத் தெரியும்? காரமான இந்த மிளகாய்க்குள் இருக்கும் ஆரோக்கிய நன்மைகள் பற்றி இக்கட்டுரையில் காண்போம்.

100 கிராம் ஆரஞ்சு பழத்தில் சுமார் 53 மில்லி கிராம் வைட்டமின் 'சி' உள்ளது. ஆனால், அதே 100 கிராம் பச்சை மிளகாயில் சுமார் 242 மில்லி கிராம் வைட்டமின் 'சி' உள்ளது. அதாவது ஆரஞ்சை விட கிட்டத்தட்ட 4 முதல் 5 மடங்கு அதிக வைட்டமின் 'சி' இதில் உள்ளது.

நமது நோய் எதிர்ப்பு மண்டலத்தை வலுப்படுத்தவும், சருமத்தைப் பொலிவாக வைத்திருக்கவும் வைட்டமின் 'சி' மிக அவசியம். ஒரு நாளைக்குத் தேவையான வைட்டமின் 'சி'-யில் பெரும்பகுதியை ஒரே ஒரு பச்சை மிளகாய் மூலம் நம்மால் பெற முடியும்.

பச்சை மிளகாயைச் சாப்பிடும்போது நாக்கில் ஒருவித எரிச்சல் ஏற்படுவதற்கு அதிலுள்ள 'கேப்சைசின்' என்ற வேதிப்பொருள் தான் காரணம். இது வெறும் காரத்தைத் தருவதோடு நின்றுவிடாமல், உடலுக்குப் பல நன்மைகளைச் செய்கிறது.

1. கேப்சைசின் உடலில் வெப்பத்தை உருவாக்கி மெட்டபாலிசத்தை அதிகரிக்கிறது. இது உடலில் உள்ள தேவையற்ற கொழுப்பை வேகமாக எரிக்க உதவுகிறது. எனவே உடல் எடையைக் குறைக்க விரும்புவோருக்கு இது ஒரு வரப்பிரசாதம்.

2. மூட்டு வலி அல்லது தசை பிடிப்பு உள்ளவர்களுக்கு கேப்சைசின் ஒரு சிறந்த மருந்தாகச் செயல்படுகிறது. இது மூளைக்குச் செல்லும் வலி சிக்னல்களைத் தடுக்கும் திறன் கொண்டது.

3. பச்சை மிளகாய் இரத்தத்தில் உள்ள சர்க்கரையின் அளவைச் சமநிலைப்படுத்துவதாகப் பல ஆய்வுகள் தெரிவிக்கின்றன.

பச்சை மிளகாயில் உள்ள ஆன்டி-ஆக்ஸிடன்ட்கள் இரத்த நாளங்களில் கொழுப்பு படிவதைத் தடுத்து, இரத்த ஓட்டத்தைச் சீராக்குகின்றன. இது மாரடைப்பு வரும் அபாயத்தைக் குறைக்கிறது. மேலும், இதில் உள்ள அதிகப்படியான நார்ச்சத்தானது செரிமானத்தை எளிதாக்கி, மலச்சிக்கல் வராமல் தடுக்கிறது.

எப்படிச் சாப்பிட்டால் முழு பலன் கிடைக்கும்?

மிளகாயை எண்ணெயிட்டு வறுக்கும்போதோ அல்லது அதிக வெப்பத்தில் சமைக்கும்போதோ அதிலுள்ள வைட்டமின் 'சி' சத்துக்கள் சிதைந்துவிடும். எனவே, மிளகாயைச் சமைக்கும்போது இறுதியில் சேர்த்துக் கொள்வது நல்லது.

லேசாக வதக்கியோ அல்லது அப்படியே பச்சையாகச் சாப்பிடுவதோ முழுமையான வைட்டமின் 'சி'-யைப் பெற்றுத்தரும்.

குறிப்பு: காரமான உணவு என்பதால், அல்சர் அல்லது வயிறு கோளாறு இருப்பவர்கள் மிதமான அளவில் எடுத்துக் கொள்வது அவசியம்.

ஒரு சிறிய மிளகாய் நம் உடலுக்கு இவ்வளவு பெரிய பாதுகாப்பை வழங்குகிறது என்பது வியப்பிற்குரியது. எனவே இனி உங்கள் தட்டில் இருக்கும் பச்சை மிளகாயைத் தூக்கியெறியும் முன், அதில் ஒளிந்திருக்கும் நன்மைகளை நினைவில் கொள்ளுங்கள்!

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)