பலரும் அறியாத 'விராலி'... மூட்டு, தசை வலிக்கு நல்ல நிவாரணி! எண்ணெய் செய்வது எப்படி?

தமிழ்நாட்டில் மலைக்காடுகளில் அதிகம் காணப்படும் ஒரு செடிதான் விராலி செடி. இது, நவீன உலகின் ரசாயன மருந்துகள் அல்லாத, இயற்கையோடு இணைந்த ஒரு பாரம்பரிய வீட்டு வைத்தியக் குறிப்பு ஆகும். எனினும், இதுகுறித்து தற்போதைய தலைமுறையினருக்கு அவ்வளவாக தெரியவில்லை என்பதே வருத்தமளிக்கும் ஒன்றாக இருக்கிறது.

விராலி இலையின் தனித்துவமான மருத்துவ குணம் என்னவெனில், இதில் மயக்கமூட்டும் பண்புகளும், வீக்கத்தைக் குறைக்கும் கூறுகளும் இயற்கையாகவே அடங்கியிருப்பதாகும்.

கடுமையான தலைவலி ஏற்படும்போது, விராலி இலையைப் பறித்து, அதை நன்கு அரைத்து பசையாகவோ அல்லது எண்ணெய்யாகவோ பயன்படுத்தலாம், இந்தப் பசையை நெற்றி, மற்றும் நெற்றிப் பொட்டுகளிலும் அக்காலத்து மக்கள் பூசி வந்ததாகக் கூறப்படுகிறது. இந்த இலைகளில் உள்ள குளிர்ச்சியான மற்றும் வலி குறைக்கும் பண்புகள், விரைவாக அவர்களின் வலியை போக்கியதாகவும் சொல்லப்படுகிறது.

கடினமான உடல் உழைப்பிற்குப் பிறகு ஏற்படும் தசைக் குடைச்சல், மூட்டு வலி அல்லது சுளுக்கு போன்ற வெளிப்புற வலிகளுக்கு, விராலி இலைப் பசையைத் தசைப் பிடிப்புள்ள இடங்களில் பூசினால், இரத்த ஓட்டம் மேம்பட்டு, வீக்கம் குறைந்து வலி நீங்கும்.

மூட்டு வலி உள்ளவர்கள் விராலி இலை எண்ணெய் செய்து வைத்துக்கொள்ளலாம். எப்படி செய்வது என்று பார்ப்போமா?

தேவையான பொருட்கள்:            

விராலி இலை: 200 கிராம்

நல்லெண்ணெய் – 500 மில்லி

பூண்டு : 10 பல்

மஞ்சள் தூள்: 1 தேக்கரண்டி

செய்முறை:

• விராலி இலைகளைச் சுத்தமான தண்ணீரில் நன்கு அலசி, அதன் ஈரப்பதம் நீங்கும் வரை மெல்லிய துணியில் பரப்பி உலர்த்தவும். (ஈரப்பதம் இருந்தால் எண்ணெய் கெட்டுவிடும்.)

• உலர்ந்த விராலி இலைகள் மற்றும் பூண்டு பற்களைச் சேர்த்து, மிக்சியில் நீர் சேர்க்காமல், கொரகொரப்பான விழுதாக அரைத்து எடுக்கவும். (பசை போல இருக்கக் கூடாது.)

• ஒரு கனமான அடிப்பாகம் கொண்ட இரும்பு அல்லது மண் சட்டிப் பாத்திரத்தை அடுப்பில் வைத்து, அதில் 500 மில்லி நல்லெண்ணெயைச் சேர்க்கவும். எண்ணெய் மிதமான சூடானவுடன் (புகை வரக் கூடாது) அடுப்பை சிம்மில் வைத்து, அரைத்து வைத்த விராலி இலை மற்றும் பூண்டு விழுதை எண்ணெயில் சேர்க்கவும்.

• அதனுடன் மஞ்சள் தூளையும் சேர்த்து நன்கு கிளறிவிடவும்.

• இந்தக் கலவையைச் சிறு தீயில், குறைந்தது 20 முதல் 30 நிமிடங்கள் வரை மெதுவாகக் காய்ச்ச வேண்டும். மூலிகையின் சாறு முழுவதும் எண்ணெயில் இறங்க இது அவசியம்.

• விழுது நன்கு பொன்னிறமாக மாறி, அதன் 'சலசலப்புச் சத்தம்  அடங்கியவுடன் அல்லது முற்றிலுமாகக் குறைந்தவுடன் அடுப்பை அணைக்கவும். இது, இலையில் உள்ள நீர்ச்சத்து முழுவதுமாக நீங்கிவிட்டது என்பதற்கான அறிகுறி.

•  எண்ணெயைச் சிறிது நேரம் ஆற விடவும். எண்ணெய் முழுவதுமாகக் குளிர்ந்த பிறகு, ஒரு மெல்லிய சுத்தமான துணி அல்லது வடிகட்டியின் உதவியுடன், எண்ணெயை மட்டும் வடித்து, மூலிகைக் கழிவுகளை நீக்கவும். வடிகட்டிய விராலி இலை எண்ணெயைச் சுத்தமான, காற்றுப் புகாத கண்ணாடி பாட்டிலில் சேமித்து வைக்கவும். இந்த எண்ணெயை நீண்ட காலத்திற்குப் பயன்படுத்தலாம்.

பயன்படுத்தும் முறை

• தயாரிக்கப்பட்ட விராலி இலை எண்ணெய் வெளிப்புறப் பூச்சாக மட்டுமே பயன்படுத்தப்பட வேண்டும்.

• வலி அல்லது குடைச்சல் உள்ள பகுதியில் இந்த எண்ணெயைத் தடவி, மென்மையாக மசாஜ்  செய்யலாம்.

• நெற்றி மற்றும் தலையின் பின்பகுதியில் லேசாகத் தடவி வந்தால் தலைவலி குறையும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்.)