பெண்களே எச்சரிக்கை! ஆண்களை விட உங்களை அதிகம் தாக்கும் இந்த 'ஈறு நோய்' பற்றி தெரியுமா?

பொதுவாகச் சில நோய்கள் ஆண்களை விடப் பெண்களை அதிகம் பாதிக்கும்; ஈறு நோய் அந்த வகையைச் சார்ந்தது. பெண்களுக்கு ஏற்படும் ஈறு நோய் மற்றும் அதற்கான தீர்வுகள் (Teeth gum problem and solution) குறித்து இந்தப் பதிவில் காண்போம்.

ஆரோக்கியமான ஈறு, ஒவ்வொரு பல்லைச் சுற்றிலும் மென்மையான வளைவு அல்லது சுருள் தோற்றத்தைக் கொண்டிருக்கும்; மேலும், ஒவ்வொரு பல் இடைவெளியிலும் சரியாகப் பொருந்திக் காணப்படும். ஆண்களை விடப் பெண்கள் ஈறு நோயால் அதிகம் பாதிக்கப்படுவதாக மருத்துவ ஆய்வுகள் தெரிவிக்கின்றன. குறிப்பாகப் பருவமடைதல், மாதவிடாய் நிற்கும் காலம் மற்றும் கர்ப்பகாலம் போன்ற சமயங்களில் இந்தப் பாதிப்புகள் அதிகமாக இருக்கும். பொதுவாகப் பெண்கள் 30 வயதிலிருந்து 54 வயது வரை 'பற்புறத்திசு' நோயினால் (Periodontal disease) பாதிக்கப்படுகிறார்கள். இந்த நோய்க்கு ஆரம்பத்தில் எந்த அறிகுறியும் இல்லாததால், இதனை முன்கூட்டியே கண்டறிவது கடினம்.

பருவமடைதல் மற்றும் மாற்றங்கள்: பருவமடையும் போது புரோஜெஸ்டிரோன் மற்றும் ஈஸ்ட்ரோஜென் ஹார்மோன்களின் அளவு அதிகரிப்பதால், அவை ஈறுகளின் ரத்த ஓட்டத்தை அதிகரிக்கின்றன. இதனால் ஈறுகள் மென்மையாகவும், சற்று வீங்கிய நிலையிலும் காணப்படும். இதுபோன்ற நேரங்களில் கடினமான உணவுப் பொருட்களை உண்ணும்போது ஈறுகளில் ரத்தம் வடியும் நிலை ஏற்படலாம். எனவே, பருவமடையும் வயதில் வாய் ஆரோக்கியத்தில் அதிக கவனம் செலுத்த வேண்டும். காலை மற்றும் இரவு என இருவேளையும் பல் துலக்க வேண்டும். ஈறுகளிலோ அல்லது பற்களிலோ ஏதேனும் மாற்றம் தெரிந்தால் உடனடியாக மருத்துவரை அணுக வேண்டும்.

மாதவிலக்கு மற்றும் இதர காரணங்கள்: மாதவிலக்கு நேரங்களில் பெண்களுக்கு ஈறு சிவந்து, வீங்கி ரத்தம் வடியும் நிலை ஏற்படலாம். இதனால் வாயில் எரிச்சல் அதிகரித்தல், கன்னத்தின் உட்புறத்தில் புண் ஏற்படுதல் போன்ற பிரச்சனைகள் மாதவிலக்கு வருவதற்கு முன் ஏற்பட்டு, மாதவிலக்கு தொடங்கிய உடன் மறைந்துவிடும். மேலும், கருத்தடை மாத்திரை சாப்பிடுவோர் மற்றும் நீரிழிவு நோய் உள்ளவர்களுக்கு ஈறுகள் மிக எளிதில் பாதிப்படைகின்றன.

தீர்வுகளும் முன்னெச்சரிக்கைகளும்:

• வாய் கொப்பளிக்க மிதமான உப்புத்தண்ணீரைப் பயன்படுத்தலாம்.

• அதிக குளிர்ச்சியான அல்லது அதிக சூடான உணவுகளைத் தவிர்க்க வேண்டும்.

• பல் துலக்க எப்போதும் மென்மையான பிரஷ்ஷை (Soft Brush) பயன்படுத்தவும்.

• ஈறு பாதிப்புகளைத் தொடக்கத்திலேயே கண்டறிந்து சரியான சிகிச்சை மேற்கொண்டால், இதிலிருந்து முழுமையாகக் குணமடையலாம்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)