இப்படி செய்தால், உடல் எடை எப்படி குறையும்? 

உடலை ஃபிட்டாக வைத்திருக்க வேண்டும் என்ற ஆசையில், சிலர் உடற்பயிற்சி, யோகா, டயட் போன்ற ஆரோக்கியமான வழிகளைப் பின்பற்றுகிறார்கள். ஆனால், சிலர் விரைவான பலன்களை எதிர்நோக்கி, தவறான பாதைகளை தேர்ந்தெடுக்கிறார்கள். அப்படிப்பட்ட ஒரு தவறான வழிதான் இரவு உணவைத் தவிர்ப்பது. "இரவு உணவை சாப்பிடாமல் இருந்தால் உடல் எடை சீக்கிரம் குறைந்துவிடும்" என்று பலர் நம்புகிறார்கள். ஆனால், இது உண்மையில்லை. இந்தப் பழக்கம் உங்கள் ஆரோக்கியத்திற்கு தீங்கு விளைவிக்கும்.

இரவு உணவு என்பது அன்றைய நாளின் கடைசி உணவு மட்டுமல்ல, அது உங்கள் உடலுக்கு தேவையான சக்தியையும் ஊட்டச்சத்துக்களையும் வழங்குவதற்கான கடைசி வாய்ப்பும் கூட. இரவு முழுவதும், அதாவது சுமார் 8 மணி நேரம், உங்கள் உடல் எந்த உணவையும் உட்கொள்ளாமல் இருக்கும். இந்த நேரத்தில், உங்கள் உடல் முந்தைய நாள் இரவு உணவில் இருந்து கிடைக்கும் சக்தியை பயன்படுத்துகிறது. நீங்கள் இரவு உணவை தவிர்த்தால், உங்கள் உடல் தேவையான சக்தியின்றி தவிக்கும்.

இரவு உணவை தவிர்ப்பதால் உடல் எடை குறையும் என்பது ஒரு மாயை. ஆரம்பத்தில் சில கிலோ எடை குறைந்தாலும், நீண்ட கால அடிப்படையில் இது பல உடல்நலப் பிரச்சினைகளுக்கு வழிவகுக்கும். முக்கியமாக, இது உங்கள் உடலின் வளர்சிதை மாற்றத்தை (Metabolism) பாதிக்கும். வளர்சிதை மாற்றம் என்பது உங்கள் உடல் உணவை சக்தியாக மாற்றும் செயல்முறை. இது பாதிக்கப்பட்டால், உங்கள் உடல் கொழுப்பை எரிக்கும் திறன் குறையும். மேலும், இரவு உணவை தவிர்ப்பதால் பசி அதிகமாகும். இதனால், அடுத்த நாள் அதிகமாக சாப்பிட வாய்ப்புள்ளது. இது உடல் எடையை குறைக்க உதவும் என்று நினைத்து செய்யும் ஒரு தவறான செயலாகும்.

இரவு உணவைத் தவிர்ப்பது நுண்ணூட்டச்சத்து குறைபாடுகளுக்கும் வழிவகுக்கும். உங்கள் உடலுக்கு தேவையான வைட்டமின்கள் மற்றும் தாதுக்கள் கிடைக்காமல் போகலாம். இது உடல் சோர்வு, நோய் எதிர்ப்பு சக்தி குறைபாடு மற்றும் பிற உடல்நலப் பிரச்சினைகளுக்கு வழிவகுக்கும். 

இரவு உணவை தவிர்ப்பதால் உடல் ஆரோக்கியம் மட்டுமல்ல, மன ஆரோக்கியமும் பாதிக்கப்படும். மேலும் இதனால் மனச்சோர்வு, பதட்டம் மற்றும் தூக்கமின்மை போன்ற பிரச்சினைகளை ஏற்படுத்தும் என்று ஆய்வுகள் கூறுகின்றன. உடல் எடையை குறைக்க ஆரோக்கியமான மற்றும் சமநிலையான உணவு மிகவும் அவசியம்.

ஆகவே, உடல் எடையை குறைக்க இரவு உணவை தவிர்ப்பது ஒரு சரியான வழி அல்ல. அதற்கு பதிலாக, ஆரோக்கியமான உணவு, உடற்பயிற்சி மற்றும் போதுமான தூக்கம் போன்ற ஆரோக்கியமான வாழ்க்கை முறையை பின்பற்றுங்கள். உங்கள் உணவில் பழங்கள், காய்கறிகள், முழு தானியங்கள் மற்றும் புரதச்சத்து நிறைந்த உணவுகளை சேர்த்துக் கொள்ளுங்கள். தவறான தகவல்களை நம்பி உங்கள் உடல் நலத்தை கெடுத்துக்கொள்ளாதீர்கள். ஆரோக்கியமான வழியில் உடல் எடையை குறைத்து நீண்ட காலம் ஆரோக்கியமாக வாழுங்கள்.