கிவி பழம்... இதுதாண்டா உண்மையான சூப்பர் ஃபுட்!

சிறியதாக இருக்கும் மிகச் சிறந்த பழங்களில் கிவி பழம் முதலிடம் வகிக்கிறது. இது வெறும் பழம் மட்டுமல்ல, ஊட்டச்சத்துக்களின் ஒட்டுமொத்த ஆதாரம். வைட்டமின்கள், தாதுக்கள், நார்ச்சத்து என எண்ணற்ற ஆரோக்கிய நன்மைகளைக் கொண்ட இது, ‘சூப்பர் ஃபுட்’ என்ற பட்டத்தைப் பெறுவதற்கு மிகவும் தகுதியானது. 

கிவி பழத்தின் ஆரோக்கிய நன்மைகள்: 

கிவி பழத்தில் உள்ள வைட்டமின் சி, நோய் எதிர்ப்பு சக்தியை அதிகரித்து நம்மை நோய்த்தொற்றுகளில் இருந்து பாதுகாக்கிறது. குறிப்பாக, குளிர்காலத்தில் கிவி பழத்தை உட்கொள்வது நெஞ்சு சளி, காய்ச்சல் போன்ற நோய்களைத் தடுக்க உதவும். 

கிவி பழத்தில் நார்ச்சத்துக்கள் அதிகம். இது செரிமானத்தை எளிதாக்கி, மலச்சிக்கலைத் தடுக்கிறது. இதில் உள்ள ஒரு குறிப்பிட்ட நொதி குடலில் உள்ள புரதங்களை செரிக்க உதவுகிறது. இதனால், வயிற்றுப்போக்கு வயிற்று வலி போன்ற பிரச்சனைகள் குறைகின்றன. 

கிவி பழத்தில் பொட்டாசியம், மக்னீசியம் போன்ற தாதுக்கள் நிறைந்துள்ளன. இவை ரத்த அழுத்தத்தைக் கட்டுப்படுத்தி இதய நோய்கள் வரும் அபாயத்தைக் குறைக்கின்றன. மேலும், கிவியில் உள்ள ஆன்ட்டி ஆக்ஸிடென்ட்கள் ரத்தநாளங்களை சுத்திகரித்து இதயத்தை ஆரோக்கியமாக வைக்கின்றன. 

இந்த பழம் குறைந்த கலோரிகளைக் கொண்டது. எனவே, அதிக நேரம் பசி எடுக்காமல் இருக்க உதவும். மேலும், கிவியில் உள்ள நார்ச்சத்து உணவு செரிமானத்தை மெதுவாக்கி, நீண்ட நேரம் வயிறு நிரம்பிய உணர்வைத் தருகிறது. இதனால், அதிகமாக உணவு சாப்பிட்டு உடல் எடை கூடுவதைத் தவிர்க்கலாம். 

கிவி பழத்தில் உள்ள வைட்டமின் சி சருமத்தை பாதுகாக்கும் ஒரு முக்கியமான ஆன்ட்டி ஆக்சிடென்ட். இது சருமத்தில் கொலாஜன் உற்பத்தியை அதிகரித்து சருமத்தை இளமையாகவும், பொலிவாகவும் வைக்கிறது. மேலும், கிவி சருமத்தில் ஏற்படும் வீக்கத்தைக் குறைத்து முகப்பருக்களைத் தடுக்கிறது.

வைட்டமின் ஏ அதிகமாக இருக்கும் பழங்களில் கிவியும் ஒன்று. இது கண் பார்வையை மேம்படுத்தி, கண் சம்பந்தப்பட்ட நோய்கள் வரும் அபாயத்தைக் குறைக்கிறது. குறிப்பாக வயதானவர்கள் கிவி பழம் சாப்பிடுவது மிகவும் நல்லது. 

கிவி ஏன் சூப்பர் புட்? 

கிவி பழம் ஒரு சிறிய பழமாக இருந்தாலும், இதில் ஏராளமான ஊட்டச்சத்துக்கள் நிறைந்துள்ளன. இது நம் நோய் எதிர்ப்பு சக்தியை அதிகரிப்பது முதல் இதய ஆரோக்கியத்தை மேம்படுத்துவது வரை பலவிதமான ஆரோக்கிய நன்மைகளை வழங்குகிறது. மேலும், இது குறைந்த கலோரிகளைக் கொண்டதால் உடல் எடை குறைப்பவர்களுக்கு சிறந்த பழமாகும். இப்படி பல்வேறு விதமான ஆரோக்கிய நன்மைகளால் கிவி பழம் ஒரு சூப்பர் ஃபுட் என்ற பெயரைப் பெறுகிறது. 

தினசரி கிவி பழத்தை உட்கொள்வது நம்மை ஆரோக்கியமாகவும் உற்சாகமாகவும் வைத்திருக்கும். எனவே, இன்று முதல் உங்கள் உணவில் கிவி பழத்தை சேர்த்துக் கொள்ளுங்கள். இதில் இருக்கும் ஒரே ஒரு பிரச்சனை என்னவென்றால், இதன் விலைதான் சற்று கூடுதலாக இருக்கும்.