தசைநார் சிதைவு நோய் ஏற்படுத்தும் பாதிப்புகள் பற்றி தெரியுமா?

தசைநார் சிதைவு (Muscular dystrophy) என்பது ஒரு மரபணு கோளாறு ஆகும். முப்பது வெவ்வேறு வகையான தசைநார் சிதைவுகள் உள்ளன. இது பொதுவாக சிறுவர்களை அதிகம் பாதிக்கிறது. டிஸ்ட்ரோபின் எனப்படும் புரதம் இல்லாததால் இது தசைகளை பலவீனப்படுத்தி சிதைவுக்கு வழிவகுக்கிறது. தசைநார்களின் கட்டமைப்பு மற்றும் செயல்பாட்டை பராமரிக்க இன்றியமையாத புரதங்களை உற்பத்தி செய்வதற்கு உதவும் பொறுப்பான மரபணுக்களில் ஏற்படும் பிறழ்வுகள் காரணமாக இந்த நிலை ஏற்படுகிறது.

தசைநார் சிதைவு நோயின் அறிகுறிகள்:

1. தசை பலவீனம்: இடுப்பு, தொடைகள் மற்றும் தோள்பட்டை போன்ற உடலின் மையப் பகுதிக்கு அருகில் உள்ள தசைகளில் சிதைவு தொடங்குகிறது. இதனால் இந்த நோய் பாதிப்புக்கு உள்ளானவர்கள் நடைப்பயிற்சி, பொருட்களைத் தூக்குவது அல்லது கைகளை உயர்த்துவது போன்ற செயல்களைச் செய்ய சிரமப்படுவார்கள்.

2. சுவாசப் பிரச்னைகள்: இவர்கள் சுவாசப் பிரச்னைகளையும் சந்திக்கலாம்.  பலவீனமான மார்பு தசைகள் சுவாசிக்கும் திறனை பாதிக்கும். மற்றும் சுவாசத் தொற்று அல்லது சிக்கல்களின் அபாயத்தை அதிகரிக்கும்.

3. இயல்பான செயல்முறைகள் சீர்குலைதல்: தசை செல்களுக்குள் இயல்பான செயல்முறைகளை சீர்குலைத்து இறுதியில் தசை விரயம் மற்றும் வலிமையை இழக்க வைக்கின்றன.

காரணங்கள்:

1. தசைநார் சிதைவுக்கான முதல் காரணம் மரபணு மாற்றங்களில் இருந்து வருகிறது. குறிப்பாக, x குரோமோசோமில் ஏற்படும் பிறழ்வுகள்.

2. பெற்றோர்களிடமிருந்து பெறப்படலாம் அல்லது ஆரம்பகால வளர்ச்சியின்போது நிகழலாம்.

3. தசை செயல்பாட்டிற்குத் தேவையான புரதங்களை உற்பத்தி செய்வதற்கு உதவும் பொறுப்பான மரபணுக்கள் பாதிக்கப்படுவதாலும் இந்த நோய் உண்டாகலாம்.

4. சுற்றுச்சூழல் காரணிகளும் இதற்குக் காரணமாக அமையலாம். உணவுப் பழக்கம், உடற்பயிற்சி மற்றும் நச்சுக்களின் வெளிப்பாடு போன்ற காரணிகள் மரபணுக்களுடன் தொடர்பு கொள்வதாலும் இந்த நோய் ஏற்படலாம்.

சிகிச்சை: தற்போது இந்த நோய்க்கு முழுமையான சிகிச்சை எதுவும் இல்லை. இருப்பினும் மருந்துகள் மற்றும் பல்வேறு சிகிச்சைகள் இந்த நோயின் தீவிரத்தைக் குறைக்க உதவுகின்றன. இதில் மருந்துகள் மற்றும் உடல் சிகிச்சை தரப்படுகிறது. இது தசைகளை நெகிழ்வாகவும் செயலுடனும் வைத்திருக்க உதவுகிறது. இந்த நோய் பாதிக்கப்பட்ட சிறுவர்களுக்கு பேச்சு சிகிச்சை, சுவாச சிகிச்சை போன்றவை தரப்படுகின்றன.

பிசியோதெரபி சிகிச்சை: சில உடற்பயிற்சகள் ஓரளவுக்கு இவர்களுக்குப் பலன் தருகிறது. தசை வலு குறையாமல் தடுத்தல், நடக்க வைத்தல், அவர்களின் வேலைகளை அவர்களே பார்த்துக்கொள்ளுதல் போன்றவற்றுக்கு இந்தப் பயிற்சிகள் உதவுகின்றன.

பாதிப்புகள்: பொதுவாக, குழந்தைப் பருவத்தில் இந்த நோய் உருவாகிறது. இதனால் குழந்தைகள் அடிக்கடி கீழே விழுதல், தசைப்பிடிப்பு, எழுந்து நிற்பதற்கு, படிக்கட்டில் ஏறுவதற்கு, ஓடுவதற்கு, குதிப்பதற்கு சிரமப்படுவார்கள். மேலும். இவர்களுக்கு சுவாசிப்பதில் அல்லது விழுங்குவதில் சிக்கல், பார்வை சம்பந்தமான பிரச்னைகள், முகத்தசைகளில் பலவீனம் போன்ற பிரச்னைகள் ஏற்படலாம். மேலும், பலவீனமான தசைகளால் முதுகெலும்பை நேராக வைத்திருக்க முடியாது. கால்கள், கைகள் மற்றும் தோள்களில் உள்ள தசைகள் சமரசம் செய்யாததால் அன்றாடப் பணிகளை செய்வது இவர்களுக்குக் கடினமாக இருக்கும்.

செய்யக் கூடாதவையும் செய்ய வேண்டியவையும்:

1. தசைநார் சிதைவுக்கு உள்ளானவர்கள் குப்பை உணவுகளை உண்ணாமல் சரிவிகித உணவுகளை உட்கொள்ள வேண்டும்.

2. தசை செயல்பாட்டை மேம்படுத்த தவறாமல் உடற்பயிற்சி செய்ய வேண்டும்.

3. பதப்படுத்தப்பட்ட உணவுகள் ரொட்டி, சர்க்கரை மற்றும் பாஸ்தா உணவுகளைத் தவிர்க்க வேண்டும்.

4. மனதை ஆரோக்கியமாகவும் நேர்மறையாகவும் வைத்திருக்க தியானம் மற்றும் யோகா பயிற்சிகள் செய்ய வேண்டும்.