பானிபூரி சாப்பிட்டால் இந்த நோய் வருமா? எச்சரிக்கும் மருத்துவர்கள்!

துரித உணவுகளுக்கு (Fast Foods) நம் அனைவரிடமும் ஒரு தனி ஈர்ப்பு உண்டு. அதிலும் குறிப்பாக, மாலை நேரங்களில் சாலையோரக் கடைகளில் கிடைக்கும் பானிபூரி, சமோசா, பஜ்ஜி போன்ற உணவுகளைச் சுவைப்பது நம்மில் பலருக்குப் பிடித்தமான ஒன்று. ஆனால், இந்த வகையான தெரு உணவுகள் சுவையாக இருந்தாலும், அவை நமது ஆரோக்கியத்திற்கு மிகப்பெரிய அச்சுறுத்தலாக அமையலாம். சுகாதாரமற்ற முறையில் தயாரிக்கப்படும் இந்த உணவுகள், சில சமயங்களில் கல்லீரல் தொற்றுகள் போன்ற கடுமையான நோய்களை ஏற்படுத்தும். 

ஹைதராபாத்தைச் சேர்ந்த 22 வயது மென்பொருள் பொறியாளர் ஒருவர், தனது நண்பர்களுடன் சாலையோரத்தில் பானிபூரி சாப்பிட்டதால் ஏற்பட்ட விளைவுகளை யாரும் எதிர்பார்க்கவில்லை. அந்த இளைஞன் சில நாட்களுக்குப் பிறகு உடல்நலக் குறைவால் அவதிப்பட்டார். மஞ்சள் காமாலை, குமட்டல், வாந்தி மற்றும் கடுமையான உடல் சோர்வு போன்ற அறிகுறிகளுடன் மருத்துவமனையில் அனுமதிக்கப்பட்டார். அவருடைய ரத்தப் பரிசோதனையில், அவருக்குக் கடுமையான ஹெபடைடிஸ் ஏ தொற்று இருப்பது கண்டறியப்பட்டது.

மருத்துவர்கள் நடத்திய விசாரணையில், அவர் சாப்பிட்ட பானிபூரி மற்றும் அதற்காகப் பயன்படுத்தப்பட்ட அசுத்தமான தண்ணீரால் இந்தக் கல்லீரல் தொற்று ஏற்பட்டது என்று தெரியவந்தது. சரியான நேரத்தில் சிகிச்சை அளிக்கப்பட்டதால், அந்த இளைஞனின் உயிர் காப்பாற்றப்பட்டது. சுமார் ஒரு மாத கால சிகிச்சைக்குப் பிறகு அவர் முழுமையாகக் குணமடைந்தார்.

ஹெபடைடிஸ் ஏ மற்றும் இ போன்ற கல்லீரல் தொற்றுகள், பெரும்பாலும் அசுத்தமான நீர் மற்றும் உணவு மூலமாகப் பரவுகின்றன. தெருவோரக் கடைகளில் விற்கப்படும் பானிபூரி, சாட், பழத் துண்டுகள் மற்றும் சமைக்கப்படாத உணவுகள் மூலமாக இந்தக் கிருமிகள் உடலுக்குள் நுழையக்கூடும். குறிப்பாக, அசுத்தமான தண்ணீரைக் கொண்டு தயாரிக்கப்படும் பானிபூரி, தொற்றின் முக்கிய காரணியாக உள்ளது.

இந்த நோய்த்தொற்றுகள் தானாகவே குணமடையும் என்றாலும், சில சமயங்களில் அவை கடுமையான விளைவுகளை ஏற்படுத்தி, உயிருக்கே ஆபத்தாக முடியலாம். எனவே, நமது உடலைப் பாதுகாப்பது நம் கைகளில் தான் உள்ளது.

சுவைக்கு அடிமையாகி, நமது ஆரோக்கியத்தைப் பணயம் வைப்பது புத்திசாலித்தனம் அல்ல. ஒரு பானிபூரி சாப்பிடுவதால் மாதக்கணக்கில் மருத்துவமனையில் சிகிச்சை பெற வேண்டிய நிலை ஏற்படலாம். எனவே, தெரு உணவுகளைத் தேர்ந்தெடுப்பதில் கவனமாக இருப்பதும், சுகாதாரமான பழக்கவழக்கங்களைப் பின்பற்றுவதும் நம்மைப் பாதுகாக்கும். இந்த விழிப்புணர்வு, நாம் அனைவரும் ஆரோக்கியமான வாழ்க்கையை வாழ உதவும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)