முகத்தில் இந்த மாற்றம் தெரிகிறதா? அலட்சியம் வேண்டாம்... அது பக்கவாதத்தின் ஆரம்பமாக இருக்கலாம்!

மாரடைப்பு, நெஞ்சு வலியுடன் வரும் என்பது நமக்குத் தெரியும் என்பதால், வலி வந்தவுடனே நாம் சுதாரித்துக்கொள்கிறோம். ஆனால், மூளைத் தாக்குதல் என்று சொல்லப்படும் பக்கவாதம் மிகவும் அமைதியாக வந்து உயிருக்கே உலை வைக்கும் ஒரு நோயாகப் பார்க்கப்படுகிறது. எந்த முன்னறிவிப்பும் இல்லாமல் இது திடீரெனத் தாக்குகிறது என்று பலரும் தவறாக நினைத்துக் கொண்டிருக்கிறார்கள். 

உண்மை என்னவென்றால், மாரடைப்பைப் போலவே பக்கவாதமும் வருவதற்கு முன்பு நம் உடலில் சில முக்கியமான மாற்றங்களை உண்டாக்குகிறது. அந்த மாற்றங்களை நாம் சரியாகக் கவனித்து, சரியான நேரத்தில் செயல்பட்டால், ஒரு உயிரைக் காப்பாற்றுவதோடு மட்டுமல்லாமல், வாழ்நாள் முழுவதும் ஏற்படும் உடல் ஊனத்திலிருந்தும் தப்பிக்கலாம்.

ரத்த ஓட்டம் Vs மூளைச் செயல்பாடு!

நமது உடலின் கட்டுப்பாட்டு அறை என்று அழைக்கப்படும் மூளைக்குத் தொடர்ந்து ரத்த ஓட்டம் சீராக இருக்க வேண்டும். எப்போது மூளைக்குச் செல்லும் ரத்தக் குழாயில் அடைப்பு ஏற்படுகிறதோ அல்லது ரத்தக் கசிவு உண்டாகிறதோ, அப்போது அந்தப் பகுதிக்குத் தேவையான ஆக்சிஜன் கிடைக்காமல் போகிறது. இதனால் மூளைச் செல்கள் செயலிழக்கத் தொடங்குகின்றன. இதைத்தான் நாம் பக்கவாதம் என்கிறோம். இதை அடையாளம் காண மருத்துவர்கள் ஒரு எளிய சூத்திரத்தைப் பின்பற்றுகிறார்கள்.

முகத்தில் தெரியும் முதல் மாற்றம்!

பக்கவாதம் தாக்கும்போது உடலில் ஏற்படும் முதல் மாற்றம் முகத்தில் தான் தெரியும். திடீரென ஒருவரது முகம் ஒரு பக்கமாகச் சாய்ந்தது போலவோ அல்லது கோணலாகவோ மாறினால் நாம் எச்சரிக்கையாக இருக்க வேண்டும். அந்த நபரைச் சிரிக்கச் சொல்லும்போது, உதட்டின் ஒரு பக்கம் மட்டும் தொங்கிக்கொண்டு இருந்தால் அது ஆபத்தின் அறிகுறியாகும். மூளையின் நரம்பு மண்டலம் பாதிக்கப்படுவதால் முகத் தசைகள் தங்கள் கட்டுப்பாட்டை இழக்கின்றன என்பதே இதன் பொருளாகும்.

கைகளில் வலிமை இழப்பு!

இரண்டாவதாகக் கவனிக்க வேண்டியது கைகளின் செயல்பாடு. திடீரென ஒரு கையில் மட்டும் உணர்வு குறைவது அல்லது வலுவில்லாமல் போவது பக்கவாதத்தின் முக்கியமான அறிகுறியாகும். சம்பந்தப்பட்ட நபரை இரண்டு கைகளையும் மேலே தூக்கச் சொல்ல வேண்டும். அப்படிச் செய்யும்போது ஒரு கை மட்டும் தானாகக் கீழே விழுந்தாலோ அல்லது தூக்க முடியாமல் போனாலோ, தோள்பட்டை முதல் விரல் வரை நரம்பு பாதிக்கப்பட்டுள்ளது என்பதைப் புரிந்து கொள்ள வேண்டும்.

தடுமாறும் வார்த்தைகள்!

அதுவரை தெளிவாகப் பேசிக்கொண்டிருந்த ஒருவர் திடீரெனக் குழறத் தொடங்கினால் அல்லது வார்த்தைகள் வராமல் திணறினால் அதைச் சாதாரண விஷயமாக எடுத்துக் கொள்ளக்கூடாது. சின்ன சின்ன வாக்கியங்களைக் கூட அவர்களால் தெளிவாகப் பேச முடியாது. மது அருந்தியவர் பேசுவதைப் போலக் குரல் மாறினால், அது மூளையின் பேச்சுக்கட்டுப்பாட்டுப் பகுதி தாக்கப்பட்டிருக்கிறது என்பதற்கான சமிக்ஞை ஆகும்.

மேலே சொன்ன மூன்று அறிகுறிகளில் ஏதேனும் ஒன்று தென்பட்டாலும், ஒரு வினாடி கூடத் தாமதிக்கக் கூடாது. 'FAST' என்ற ஆங்கிலச் சொல்லில் வரும் கடைசி எழுத்தான 'T' என்பது நேரத்தைக் குறிக்கிறது. மூளைச் செல்கள் ஒவ்வொரு நிமிடமும் லட்சக்கணக்கில் அழிந்து கொண்டிருக்கும் சூழல் அது. 

எனவே, வீட்டு வைத்தியம் பார்க்கிறேன் என்றோ அல்லது தானாகச் சரியாகிவிடும் என்றோ காத்திருக்காமல் உடனடியாக மருத்துவமனைக்கு அழைத்துச் செல்ல வேண்டும். முதல் சில மணி நேரங்களுக்குள் சிகிச்சையைத் தொடங்கிவிட்டால், பெரிய பாதிப்புகள் இல்லாமல் நோயாளியை மீட்டுவிட முடியும்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)