வெயில் கால வயிற்றுப் பிரச்சனைகள்… இதோ எளிய இயற்கைத் தீர்வுகள்!

கோடைக்கால வெப்பம் பல வகைகளில் நம் உடலைப் பாதிக்கிறது. வெயிலின் தாக்கம் அதிகரிக்கும்போது, குறிப்பாக நமது செரிமான மண்டலம் எளிதில் பாதிக்கப்படுகிறது. வயிற்றெரிச்சல், அஜீரணம், அமிலத்தன்மை போன்ற பிரச்சனைகள் சில பழக்கவழக்கங்களாலும், உண்ணும் உணவுகளாலும் மேலும் மோசமடையலாம். 

அதிக காரமான அல்லது எண்ணெயில் வறுத்த உணவுகள், துரித உணவுகள், நேரந்தவறி சாப்பிடுவது போன்ற பழக்கங்கள் வெயிலின் தாக்கத்துடன் சேரும்போது, வயிற்றில் அதிக உஷ்ணத்தையும், அமிலச் சுரப்பையும் ஏற்படுத்தலாம். இது நெஞ்செரிச்சல், வயிற்றுப் புண், பசியின்மை, குமட்டல் போன்ற அசௌகரியங்களுக்கு வழிவகுக்கும். 

இந்த வயிற்றுக் கோளாறுகளைத் தணிக்க இயற்கையான உணவுகள் சிறந்த மருந்தாக அமைகின்றன. இந்த கோடைக்கால வயிற்றுக் கோளாறுகளிலிருந்து நிவாரணம் பெறவும், செரிமான மண்டலத்தை ஆரோக்கியமாக வைத்திருக்கவும் உதவும் சில சிறந்த இயற்கையான உணவுப் பொருட்கள் இதோ.

வெள்ளரிக்காய், தர்பூசணி, மற்றும் முலாம்பழம் போன்ற பழங்களில் நீர்ச்சத்து மிக அதிகம். இவை உடலை உடனடியாக ஹைட்ரேட் செய்து, உள் உறுப்புகளின் வெப்பத்தைக் குறைக்கும். இவற்றை அப்படியே சாலட்டாகவோ அல்லது சாறாகவோ தினமும் எடுத்துக் கொள்வது வயிற்றை இதமாக வைத்திருக்கும். இளநீர் ஒரு சிறந்த இயற்கையான குளிர்பானம். இது உடலுக்குத் தேவையான நீர்ச்சத்தை அளிப்பதுடன், செரிமானத்திற்கும் நல்லது. தினமும் ஒரு கிளாஸ் இளநீர் அருந்துவது வயிற்றுக் கோளாறுகள் வராமல் தடுக்க உதவும்.

மோர் செரிமானத்திற்கு மிகவும் உகந்தது. இதில் உள்ள நல்ல பாக்டீரியாக்கள் குடலுக்கு நன்மை செய்யும். இது உடலைக் குளிர்ச்சி செய்வதுடன், வயிற்றில் அமிலத்தன்மை ஏற்படுவதையும் குறைக்கும். மோருடன் சிறிது உப்பு மற்றும் சீரகம் சேர்த்து அருந்துவது சுவையையும் ஆரோக்கியத்தையும் கூட்டும். 

சோம்பு தண்ணீரும் வயிற்று எரிச்சலைக் குறைக்கும். ஒரு மேசைக்கரண்டி சோம்பை இரவில் தண்ணீரில் ஊறவைத்து, காலையில் வடிகட்டி வெறும் வயிற்றில் அருந்தலாம். துளசி விதைகளை நீரில் ஊறவைத்து, சர்பத்துகளிலோ அல்லது பால்களிலோ சேர்த்து அருந்துவது உடலுக்குக் குளிர்ச்சியைத் தரும்.

கோடைக்காலத்தில் நமது உணவுப் பழக்கவழக்கங்களில் இதுபோன்ற சில ஆரோக்கியமான மாற்றங்களைச் செய்துகொள்வது, வயிற்றுக் கோளாறுகளிலிருந்து தப்பித்து, நிம்மதியாக இருக்க உதவும். இந்த இயற்கையான உணவுகள் உடலுக்குக் குளிர்ச்சியை அளிப்பதுடன், பசியையும் தூண்டி, ஒட்டுமொத்த ஆரோக்கியத்திற்கும் உறுதுணையாக இருக்கும்.