கோடை கொடுக்கும் வயிற்று வலி: தவிர்க்கும் 5 வழிகள் இதோ!

வெயில் காலம் வந்துவிட்டாலே பலருக்கும் உடல் உபாதைகள் அதிகரிக்கத் தொடங்கிவிடும். குறிப்பாக, வயிறு சம்பந்தப்பட்ட பிரச்சனைகள் இந்த சீசனில் வருவது வழக்கம். வாந்தி, பேதி, வயிற்று வலி என பல தொல்லைகள் கோடையில் நம்மை வாட்டி வதைக்கின்றன. குளிர்காலத்தில் நாம் அதிகமாக உணவு உட்கொண்டாலும், கோடையில் ஏன் இந்த வயிறு சார்ந்த தொந்தரவுகள் அதிகமாகின்றன என்று யோசித்ததுண்டா? 

கோடை காலத்தில் நிலவும் அதிகப்படியான வெப்பம் நமது உடலின் நீர்ச்சத்தை வெகுவாக குறைக்கிறது. இது மட்டுமல்லாமல், நமது உணவுப் பழக்க வழக்கங்களும் இந்த சீசனில் மாறுபடுகின்றன. இந்த இரண்டு காரணிகளும் சேர்ந்துதான் வயிற்றுப் பிரச்சனைகளுக்கு முக்கிய காரணமாக அமைகின்றன என்று மருத்துவர்கள் கூறுகின்றனர். 

அதிக வெப்பம் காரணமாக உடலில் ஏற்படும் நீரிழப்பு செரிமான அமைப்பை பாதிக்கிறது. அதேபோல், கோடைக்கு ஏற்ற உணவு வகைகளை நாம் தேர்ந்தெடுக்க தவறும்போது, அதுவும் வயிற்றுக்கு உபாதைகளை ஏற்படுத்தும். கோடை காலத்தில் உங்கள் வயிற்றை ஆரோக்கியமாக வைத்துக்கொள்ள சில எளிய வழிகளை பின்பற்றலாம். 

1. முதலில், போதுமான அளவு தண்ணீர் குடிப்பது மிகவும் முக்கியம். வெயில் காலத்தில் வியர்வை மூலம் உடலில் இருந்து அதிக நீர் வெளியேறுவதால், தினமும் குறைந்தது எட்டு முதல் பத்து கிளாஸ் தண்ணீர் குடிக்க வேண்டியது அவசியம். 

2. அடுத்ததாக, எளிதில் ஜீரணமாகக்கூடிய உணவுகளை உட்கொள்வது நல்லது. கஞ்சி, சாலட், சூப் போன்ற உணவுகள் செரிமானத்திற்கு உதவுவதோடு, வயிற்றுக்கும் இதமாக இருக்கும். காரமான மற்றும் எண்ணெய் நிறைந்த உணவுகளை தவிர்ப்பது வயிற்று உபாதைகளை குறைக்க உதவும்.

3. உணவு சுகாதாரத்தைப் பேணுவது மிக முக்கியம். கோடை காலத்தில் பாக்டீரியா மற்றும் வைரஸ்கள் வேகமாக பரவும் வாய்ப்பு இருப்பதால், நாம் உண்ணும் உணவு சுத்தமானதாக இருக்க வேண்டும். 

4. முடிந்தவரை, வெளியில் விற்கப்படும் உணவுகளை தவிர்ப்பது நல்லது. வெப்பமான காலநிலையில் நமது செரிமான அமைப்பு சற்று பலவீனமாக இருக்கும் என்பதால், வெளியில் சமைக்கப்பட்ட உணவுகள் எளிதில் செரிமானம் ஆகாமல் வயிற்று பிரச்சனைகளை ஏற்படுத்தலாம். 

5. இத்துடன், மன அழுத்தத்தை குறைப்பது வயிற்று ஆரோக்கியத்திற்கு மிகவும் முக்கியம். யோகா, தியானம் போன்ற பயிற்சிகளில் ஈடுபடுவதன் மூலம் மன அழுத்தத்தைக் குறைத்து, செரிமானத்தை மேம்படுத்தலாம்.

கோடை காலத்தில் வயிறு சார்ந்த பிரச்சனைகளை தவிர்க்க, நாம் சில எளிய உணவு மற்றும் வாழ்க்கை முறை மாற்றங்களை மேற்கொள்வது அவசியமாகும். போதுமான நீர் அருந்துதல், சரியான உணவு முறை, உணவு சுகாதாரம், வெளியில் உண்பதை தவிர்த்தல் மற்றும் மன அழுத்தத்தை குறைத்தல் போன்ற இந்த 5 வழிகளைப் பின்பற்றுவதன் மூலம், கோடை காலத்திலும் நாம் ஆரோக்கியமாக இருக்கலாம்.