சர்க்கரைவள்ளிக் கிழங்கு குழந்தைகளுக்கு நல்லதா? தெரிந்துகொள்ள வேண்டிய உண்மைகள்!

குழந்தைகள் அடம்பிடிக்காமல் விரும்பிச் சாப்பிடும் இயற்கையான இனிப்புச் சுவை, உடலுக்குத் தேவையான பல ஊட்டச்சத்துகள், எளிதில் கிடைக்கும், அதிக செலவில்லாத உணவு — இவை அனைத்தும் ஒன்றாகக் கிடைக்கும் அற்புதமான கிழங்கு சர்க்கரைவள்ளிக் கிழங்கு. இது வெறும் வயிற்றை நிரப்பும் உணவு அல்ல. சரியான உணவுகளுடன் இணைத்துக் கொடுத்தால், குழந்தையின் வளர்ச்சிக்கும், உடல் நலத்திற்கும் சிறந்த துணையாக அமையும்.

சத்துக்களின் சங்கமம்:

சர்க்கரைவள்ளிக் கிழங்கில் குழந்தையின் அன்றாட செயல்பாடுகளுக்குத் தேவையான ஆற்றலை வழங்கும் மாவுச்சத்து (Carbohydrate) நிறைந்துள்ளது. 100 கிராம் வேகவைத்த சர்க்கரைவள்ளிக் கிழங்கில் சுமார் 70–90 கலோரிகளும், 15–21 கிராம் மாவுச்சத்தும் கிடைக்கலாம்.

இதில் நார்ச்சத்தும் (Dietary Fibre) உள்ளது. அது குடல் இயக்கத்தைச் சீராக்கி, மலச்சிக்கல் ஏற்படாமல் இருக்க உதவுகிறது. கொழுப்புச் சத்து குறைவாகவும், புரதம் சிறிய அளவிலும் இருப்பதால், மென்மையாகச் சமைத்துக் கொடுத்தால் குழந்தைகளுக்கு எளிதில் சாப்பிடக்கூடிய உணவாகிறது.

ஆரஞ்சு நிறத்தில் ஒளிந்திருக்கும் நன்மை:

குறிப்பாக அடர் ஆரஞ்சு நிறச் சர்க்கரைவள்ளிக் கிழங்கில் பீட்டா கரோட்டின் (Beta-carotene) அதிகமாக உள்ளது. உடல் இதனை வைட்டமின் ஏ-வாக (Vitamin A) மாற்றிக் கொள்கிறது. குழந்தையின் பார்வை, சருமம் மற்றும் நோய் எதிர்ப்பு செயல்பாடுகளுக்கு வைட்டமின் ஏ முக்கியமானது. இதனுடன் வைட்டமின் சி (Vitamin C), வைட்டமின் பி6 (Vitamin B6), பொட்டாசியம் (Potassium) போன்ற நுண்ணூட்டங்களும் கிடைக்கின்றன.

எடையை ஆரோக்கியமாக அதிகரிக்க வேண்டுமா?

சர்க்கரைவள்ளிக் கிழங்கில் புரதமும் கொழுப்பும் அதிகமாக இல்லை. எனவே மெலிந்த அல்லது அதிக ஆற்றல் தேவைப்படும் குழந்தைகளுக்கு இதை தனியாகக் கொடுப்பதைவிட, சில நல்ல உணவுகளுடன் சேர்த்துக் கொடுப்பது சிறந்தது. வேகவைத்த கிழங்குடன் சிறிதளவு நெய் அல்லது வெண்ணெய் சேர்க்கலாம்.

பாசிப்பருப்பு, வேகவைத்த முட்டை, கெட்டித் தயிர் போன்றவற்றுடன் இணைத்தால் புரதச் சத்தும் அதிகரிக்கும். வறுத்த நிலக்கடலைப் பொடி அல்லது எள்ளுப் பொடி சேர்த்தால் சுவையுடன் நல்ல கொழுப்பும் கூடுதலாகக் கிடைக்கும். நட்ஸ் பயன்படுத்தும்போது சிறு குழந்தைகளுக்கு முழு பருப்புகளாக அல்லாமல் நன்றாக அரைத்த வடிவில் கொடுப்பது பாதுகாப்பானது.

குட்டீஸ்களுக்கான சுவையான சமையல்!

வேகவைத்த சர்க்கரைவள்ளிக் கிழங்கை நெய்யுடன் மிருதுவாக மசித்து, சிறு குழந்தைகளுக்குக் ‘கூழ்’ போலக் கொடுக்கலாம். பாசிப்பருப்புடன் சேர்த்து வேகவைத்து மசித்தால் சத்தான பருப்பு ‘மசியல்’ தயார். ராகி அல்லது அரிசி மாவுடன் மசித்த கிழங்கைச் சேர்த்து, சிறிது கொத்தமல்லியுடன் சிறிய ‘அடை’களாகச் செய்து கொடுக்கலாம்.

மசித்த கிழங்குடன் நிலக்கடலைப் பொடி, சிறிது ஏலக்காய்த்தூள் சேர்த்து சிறிய உருண்டைகளாகவும் தயாரிக்கலாம். சற்று வளர்ந்த குழந்தைகளுக்கு வேகவைத்த கிழங்கை கெட்டித் தயிருடன் கலந்து கொடுத்தால் சுவையான, எளிய சிற்றுண்டியாக இருக்கும்.

கூடுதல் சர்க்கரை தேவையா?

சர்க்கரைவள்ளிக் கிழங்கில் இயற்கையான இனிப்புச் சுவை இருப்பதால், பெரும்பாலும் கூடுதல் சர்க்கரை அல்லது வெல்லம் தேவையில்லை. ஏலக்காய்த்தூள் அல்லது சிறிதளவு நெய் சேர்த்தாலே சுவை கூடிவிடும்.

ஒரு வயதுக்கு மேற்பட்ட குழந்தைகளுக்கு தேன் கலந்து கொடுக்கலாம் .

எப்படி சமைத்தால் சிறப்பு?

ஆவியில் வேகவைத்தல் அல்லது தண்ணீரில் வேகவைத்தல் போன்ற எளிய சமையல் முறைகள் சிறந்தவை. அதிக எண்ணெயில் பொரித்து வழங்குவதைவிட, இயற்கையான வடிவிலேயே கொடுப்பது நல்லது. குழந்தையின் வயதுக்கும் மென்று சாப்பிடும் திறனுக்கும் ஏற்ப மென்மையாகவும் சிறிய துண்டுகளாகவும் தயாரிக்க வேண்டும்.

அளவும் சமநிலையும் முக்கியம்:

சர்க்கரைவள்ளிக் கிழங்கு நல்ல உணவுதான் என்றாலும், அது முழுமையான உணவு அல்ல. இதில் இரும்புச்சத்தும் (Iron), புரதமும் குறைவாக இருப்பதால், கீரைகள், பருப்பு வகைகள், முட்டை, பால் அல்லது தயிர் போன்ற பிற உணவுகளுடன் சேர்த்துக் கொடுப்பதே சிறந்தது. அதிக அளவில் ஒரே நேரத்தில் கொடுத்தால் சில குழந்தைகளுக்கு வயிற்றுப்பெருக்கு அல்லது வாயுத் தொல்லை ஏற்படலாம். எனவே அளவோடு கொடுப்பதே நல்லது.

சர்க்கரைவள்ளிக் கிழங்கு குழந்தையின் தட்டில் ஒரு எளிய உணவாகத் தோன்றலாம். ஆனால், குட்டீஸ்களுக்கான இயற்கையின் ‘சூப்பர் ஸ்வீட்’ உணவு இந்த 'சர்க்கரைவள்ளிக் கிழங்கு'.

வாசகர்கள் தங்கள் குழந்தைகளின் ஆரோக்கியமான உடல் எடை வளர்ச்சி, சிறந்த கண் பார்வை மற்றும் செரிமான மேம்பாட்டுக்கான எளிய, இயற்கையான சத்தான உணவு முறைகளைத் துல்லியமாகப் பெற்றுப் பயனடைவர்.