திரைப் பிரபலங்களின் எடைக்குறைப்பு ரகசியம்… Ozempic, Mounjaro மருந்துகள் காரணமா?

சினிமா  பிரபலங்களுக்கு, குறிப்பாக நடிகைகளுக்கு, உடல் தோற்றத்தைப் முறையாக பராமரிப்பது என்பது தவிர்க்க முடியாத ஒன்றாகும். திரைத்துறையின் கோரிக்கைகளுக்கு ஏற்ப தங்களை எப்போதும் ஃபிட்டாக வைத்துக்கொள்ள வேண்டிய கட்டாயத்தில் அவர்கள் உள்ளனர். 

இந்தக் கடுமையான சூழலில், சமீப காலமாக உடல் எடையைக் குறைப்பதற்குப் புதியதொரு வழிமுறை பிரபலங்கள் மத்தியிலும், பொதுமக்களிடமும் பரவி வருகிறது. அது என்னவென்றால், உண்மையில் நீரிழிவு நோய்க்காகப் பயன்படுத்தப்படும் சில மருந்துகளை எடை இழப்பிற்காகப் பயன்படுத்துவதுதான்.

Ozempic மற்றும் Mounjaro போன்ற மருந்துகள் முக்கியமாக வகை 2 சர்க்கரை நோயால் பாதிக்கப்பட்டவர்களின் ரத்த சர்க்கரை அளவைக் கட்டுக்குள் கொண்டுவர மருத்துவர்களால் பரிந்துரைக்கப்படுபவை. இவை பொதுவாக வாரத்திற்கு ஒருமுறை ஊசி மூலம் செலுத்தப்படுகின்றன. இந்த மருந்துகள் எவ்வாறு செயல்படுகின்றன என்றால், அவை நம் உடலில் உணவு செரிக்கும் வேகத்தைக் குறைத்து, பசியைக் கட்டுப்படுத்துகின்றன. 

இந்த விளைவு காரணமாக, மருந்துகளைப் பயன்படுத்தும் நபர்கள் குறைவாக உண்பதால் தானாகவே உடல் எடை குறைகிறது. நீரிழிவு அல்லாதவர்களுக்கு உடல் எடை குறைப்பிற்காக மட்டுமே இந்த மருந்துகளை மருத்துவர்கள் பரிந்துரைப்பதில்லை என்றாலும், பலர் இதனை எடை இழப்பிற்கான ஒரு குறுக்குவழியாகக் கருதிப் பயன்படுத்தி வருகின்றனர்.

இந்த மருந்துகளைப் பயன்படுத்திப் பல பிரபலங்கள் தங்கள் உடல் எடையைக் கணிசமாகக் குறைத்துள்ளதாக வதந்திகள் உலவுகின்றன. டெஸ்லா நிறுவனத் தலைவர் எலான் மஸ்க் தாம் Ozempic பயன்படுத்தியதாக வெளிப்படையாகத் தெரிவித்தார். அதேபோல், பாலிவுட் இயக்குனர் கரண் ஜோகர், நடிகை குஷ்பு, த்ரிஷா, நடிகர் ஜூனியர் என்.டி.ஆர் உள்ளிட்ட பல திரை நட்சத்திரங்களின் சமீபத்திய உடல் மாற்றங்களுக்குப் பின்னணியில் இந்த மருந்துகள் இருப்பதாகச் சமூக வலைத்தளங்களில் யூகங்கள் பரவி வருகின்றன. 

சம்பந்தப்பட்ட பிரபலங்கள் பலரும் இந்த குற்றச்சாட்டுகளை மறுத்தாலும், திரை வட்டாரங்களிலும், சமூக ஊடக செல்வாக்கு செலுத்துவோர் மத்தியிலும் இந்த மருந்துகளின் பயன்பாடு கணிசமாக அதிகரித்துள்ளதாகக் கூறப்படுகிறது.

உடல் எடையைக் குறைக்க Ozempic போன்ற நீரிழிவு மருந்துகளைப் பயன்படுத்துவது சில ஆபத்தான விளைவுகளை ஏற்படுத்தக்கூடும் என மருத்துவர்கள் எச்சரிக்கின்றனர். இத்தகைய மருந்துகளை எடை இழப்பிற்காகப் பயன்படுத்தும்போது என்னென்ன பக்கவிளைவுகள் ஏற்படும் என்பது பற்றிய ஆய்வுகள் இன்னும் ஆரம்ப நிலையிலேயே உள்ளன என்றும் அவர்கள் சுட்டிக்காட்டுகின்றனர். 

எனவே, மருத்துவ ஆலோசனையின்றி இம்மாதிரியான மருந்துகளைப் பயன்படுத்துவது தேவையற்ற உடல்நலப் பிரச்சினைகளுக்கு வழிவகுக்கும் என்பதைப் புரிந்துகொள்வது அவசியம்.