தொடர்ச்சியாக உடற்பயிற்சி செய்து வந்தால் என்ன ஆகும் தெரியுமா? 

போட்டிகள் நிறைந்த இந்த வேகமான உலகில் நம்மில் பலர் உடல் ஆரோக்கியத்தை கவனிப்பதற்கு போதுமான முக்கியத்துவம் கொடுப்பதில்லை. வேலை, குடும்பம் மற்றும் சமூக வாழ்க்கையின் அழுத்தங்களுக்கு இடையே உடற்பயிற்சி செய்வதற்கு நேரம் ஒதுக்குவது கடினமாக இருக்கும். இருப்பினும் உடற்பயிற்சி என்பது நமது ஒட்டுமொத்த ஆரோக்கியத்திற்கும் நல்வாழ்வுக்கும் மிகவும் முக்கியம். இந்தப் பதிவில் தொடர்ச்சியாக உடற்பயிற்சி செய்வதன் நன்மைகளைப் பற்றி விரிவாகப் பார்க்கலாம். 

உடல் ஆரோக்கிய நன்மைகள்: 

• வழக்கமான உடற்பயிற்சியானது இதயத்துடிப்பை குறைத்து, ரத்த அழுத்தத்தை சீராக்கி, நல்ல HDL கொழுப்பின் அளவை அதிகரிக்கிறது. இதனால் கெட்ட LDL கொழுப்பின் அளவு குறைவதால் இதய நோய்க்கான அபாயம் பெரிதளவில் குறைகிறது. 

• உடற்பயிற்சியானது நோய் எதிர்ப்பு மண்டலத்தை வலுப்படுத்தி சளி, காய்ச்சல் போன்ற தொற்று நோய்களை எதிர்த்து போராட உதவுகிறது. 

• அதிக எடை தூக்கும் பயிற்சியால் எலும்புகள் வலுவடைந்து, அதன் அடர்த்தி இழப்பு தடுக்கப்படுகிறது. இது தசைகளை வலுப்படுத்தவும், சகிப்புத்தன்மையை அதிகரிக்கவும் உதவும். 

• தொடர்ச்சியாக உடற்பயிற்சி செய்வதால் உடல் எடை நிர்வகிக்கப்பட்டு, ஆரோக்கியமான உடல் எடையை பராமரிக்கலாம். இதனால் ரத்த சர்க்கரை கட்டுப்படுத்தப்பட்டு, நீரிழிவு நோய்க்கான அபாயம் குறைகிறது. சில வகையான புற்று நோய்களின் அபாயத்தை குறைக்க உடற்பயிற்சி உதவுவதாக ஆய்வுகள் தெரிவிக்கின்றன. 

மன ஆரோக்கிய நன்மைகள்: 

உடற்பயிற்சி, மன அழுத்தம் மற்றும் பதட்டத்தை குறைக்க உதவும் “என்டோர்பின்கள்” என்ற ஹார்மோன்களை வெளியிடுகிறது. இது மனச்சோர்வு அறிகுறிகளை குறைக்கவும் மனநிலையை மேம்படுத்தவும் உதவும். 

உடற்பயிற்சி செய்வதால் உங்கள் மீது உங்களுக்கு சுயமரியாதை ஏற்பட்டு தன்னம்பிக்கை அதிகரிக்கும். மேலும் இது உங்கள் தூக்கத்தின் தரத்தை மேம்படுத்த உதவும். இதனால், உங்களது ஞாபக சக்தி அதிகரித்து, செய்யும் வேலையில் கவனத்தை மேம்படுத்தலாம். ஒட்டுமொத்தமாக, உடற்பயிற்சி என்பது மன அழுத்தத்தை சமாளித்து வாழ்க்கையில் சிறப்பாக செயல்பட உதவும். 

உடற்பயிற்சி செய்வதற்கு தினசரி ஜிம்முக்கு செல்வதால், அங்கு நல்ல நண்பர்களையும் உறவுகளையும் ஏற்படுத்திக் கொள்ள முடியும். இது உங்களை வாழ்க்கையில் மேலும் துடிப்பாகவும் ஈடுபாட்டுடனும் உணர வைக்கும். 

எனவே உடற்பயிற்சியே செய்யாமல் இருப்பதற்கு தினசரி சிறிய அளவிலான உடற்பயிற்சிகள் கூட உங்கள் வாழ்வில் பெரிய மாற்றங்களைக் கொண்டு வரும். கொஞ்சம் கொஞ்சமாக உடற்பயிற்சி செய்வதைத் தொடங்கி அதன் தீவிரத்தையும் அளவையும் அதிகரித்தால், நீங்களும் அதன் ஆரோக்கிய நன்மைகளை அடைய முடியும்.