நெல்சன் இயக்கத்தில் சூப்பர் ஸ்டார் ரஜினிகாந்த் நடிக்கும் ‘ஜெயிலர்’ படத்தின் படப்பிடிப்பு தற்போது விறுவிறுப்பாக நடந்து வருகிறது. இப்படத்தை சன் பிக்சர்ஸ் நிறுவனம் தயாரிக்கிறது. ரஜினியுடன் இணைந்து, பிரபல கன்னட நடிகர் சிவராஜ்குமார், ரம்யா கிருஷ்ணன், யோகி பாபு உள்ளிட்டோர் நடித்து வருகின்றனர். இந்நிலையில் 'ஜெயிலர்' படத்தில் மேலும் ஒரு மாஸ் நடிகர் ரஜினியுடன் இணையவிருப்பதாக தகவல் வெளியாகியுள்ளது.

ஏற்கெனவே, சூப்பர் ஸ்டார் ரஜினிகாந்த்தின் பிறந்த நாளன்று, 'ஜெயிலர்' படத்தில் ரஜினியின் கதாபாத்திரம் முத்துவேல் பாண்டியன் என்று போஸ்டரை வெளியிட்டிருந்தது வைரலானது.

இந்நிலையில் ரஜினியின் 'ஜெயிலர்' படம் குறித்த பல சுவாரஸ்ய அப்டேட்கள் அவ்வப்போது வந்துகொண்டுதான் இருக்கின்றன. ஏற்கெனவே, கன்னட நடிகர் சிவராஜ்குமார் நடிக்கிறார் என்ற செய்தியே பிரபலமானதையொட்டி, தற்போது மலையாளத்தில் நம்பர் 1 நடிகரான மோகன்லால் இந்தப் படத்தில் நடிக்கவிருப்பதாக தகவல் வெளியாகி உள்ளது.

அதன்படி, 'ஜெயிலர்' படத்தில் கேமியோ ரோலில் நடிகர் மோகன்லால் நடிக்கவிருப்பதாகவும், அதற்கான பேச்சுவார்த்தை தற்போது நடைபெற்று வருவதாகவும் கூறப்படுகிறது.

ஏற்கெனவே கன்னட நடிகர் இப்படத்தில் இருக்கும் நிலையில், தற்போது மோகன்லாலுவும் இணைந்தால் இது பான் இந்தியா சினிமாவாக உருவெடுக்கும் என்பதால் இச்செய்தி ரஜினி ரசிகர்களை மகிழ்ச்சியில் ஆழ்த்தியுள்ளது.