முன்னாள் முதலமைச்சர் கலைஞர் மு.கருணாநிதியின் 6ம் ஆண்டு நினைவு தினம் இன்று. தமிழுக்கும் தமிழகத்துக்கும் அவர் செய்த நல்லனவற்றை போற்றும் விதமாக அவரது நினைவு தினத்தில் அவர் சொல்லிச் சென்ற சில தத்துவ வரிகளை இந்தப் பதிவில் காண்போம்.
* புத்தகத்தில் உலகைப் படித்தால் அறிவு செழிக்கும்; உலகத்தையே புத்தகமாய் படித்தால் அனுபவம் தழைக்கும்.
* வீரன் சாவதே இல்லை; கோழை வாழ்வதே இல்லை.
* தனிமை போன்ற ஒரு கொடுமையும் இல்லை; அதைப் போல் ஒரு உண்மையான நண்பனும் இல்லை.
* துணிவிருந்தால் துக்கம் இல்லை; துணிவில்லாதவனுக்கு தூக்கம் இல்லை.
* பகைவனுக்கு அருளிடலாம், ஆனால் துரோகிகளுக்கு அருள்வது ஆபத்தானது. உலகில் இன்று துரோகிகளே அதிகம்.
* ‘முடியுமா நம்மால்?’ என்பது தோல்விக்கு முன்பு வரும் தயக்கம். ‘முடித்தே தீருவோம்’ என்பது வெற்றிக்கான தொடக்கம்.
* உண்மையை மறைக்க முனைவது விதையை பூமிக்குள் மறைப்பது போலதான்.
* இழிவு செய்யும் நண்பர்களை விட எதிர்த்து நிற்கும் பகைவர்கள் எவ்வளவோ மேல்.
* ஆசைகள் சிறகு ஆகலாம். அதற்காக கால்களை இழந்து விட்டு பறந்தால் பூமிக்கு திரும்ப முடியாது.
* அனுபவம் ஒரு பள்ளிக்கூடம். ஆனால், அதில் ஆணவக்காரர்கள் கற்றுத் தேர்வதில்லை.
* உண்மையானவனின் பின்னால் ஐந்து பேர் செல்வார்கள். அந்த உண்மையை புரியாததன் பின்னாலும் ஐந்து பேர் செல்வார்கள்.
* ஒரு மெழுகுவர்த்தியை ஏற்றினால் அதைக் கொண்டு ஆயிரம் விளக்குகளை ஏற்ற முடியும். அறிவொளி பெற்ற ஒரு பெண்ணாலும் அது முடியும்.
* பாராட்டும் புகழும் குவியும்போது குட்டையான வாசலுக்குள் குனிந்து செல்வது போன்ற அடக்கம் வேண்டும்.
* ஒளியினால்தான் நமது நிழலின் வடிவம் நமக்குத் தெரிகிறது. சோதனைதான் நமது நெஞ்சின் வலிமையை நமக்குப் புரிய வைக்கிறது.
* சிரிக்கத் தெரிந்த மனிதன்தான் உலகத்தின் மனிதத் தன்மைகளை உணர்ந்தவன்.