முதல் நாள் 'லே'வில் இருந்து அரை‌மணி நேர பயணத்தில் உள்ள ஏழு இடங்களைச் சுற்றிப்பார்த்தோம். இரண்டாம் நாள் பார்க்கப்போகும் இடங்களின் எண்ணிக்கை குறைவு, ஏனென்றால் பயண நேரம் சற்று அதிகம்.

Spot 1: Hemis Monastery 

'லே'வில் இருந்து 45கிமீ தொலைவில் உள்ளது இந்த ஹெமிஸ் புத்த விகாரம். லடாக்கில் இருப்பதிலேயே மிகப் பெரியதும் செல்வ வளம் மிக்கதுமான புத்த விகாரம் இது தான். செம்பு புத்தர் சிலை, தங்கம் வெள்ளி பதிக்கப்பட்ட ஸ்தூபிகள், பழங்கால மஹாயான பௌத்த மதம் சார்ந்த ஓவியங்கள், கலைப் பொருட்கள் என்று உள்ளே ஏராளமானவை இருக்கின்றன. நிறைய‌ படிகள் ஏறவேண்டியதாய் உள்ளது. இங்கும் மந்திர மணிகள் உள்ளன. உள்ளே ஒரு அருங்காட்சியகமும் இரண்டு கோவில்களும் இருநிலை மாடங்களும் உள்ளன. திபெத் – இந்தியா – சீனம் ஆகிய மூன்று நாடுகளின் சாயலும் உள்ளவாறு கட்டப்பட்டுள்ள இந்த புத்த விகாரம், ஆன்மீகம், அமைதி, சமச்சீர் தன்மை ஆகியவற்றின் உறைவிடமாக உள்ளது. மஹாயான‌ பௌத்தத்தின் முக்கியமான கோவிலான இங்கே ஆண்டுதோறும் நடக்கும் ஹெமிஸ் திருவிழா மிகவும் பிரசித்தி பெற்றதாகும். 

Spot 2: Thikse Monastery 

அடுத்த இடமும் ஒரு புத்தவிகாரம் தான். திக்ஸே புத்தவிகாரம் சிந்து நதிக் கரையோரம் 11800 அடி உயரத்தில் அமைந்துள்ளது. 14ஆவது தலாய்லாமாவின் லடாக் வருகையை ஒட்டிக் கட்டப்பட்ட இந்த புத்த விகாரம் 12 மாடிகள் கொண்டதாகும். இதில் பெரிதாய் ஈர்ப்பது பிரும்மாண்டமான மைத்ரேய புத்தர் சிலை தான்.‌ மைத்ரேயர் வேறு கௌதம‌ புத்தர் வேறு. மைத்ரேயர் இன்னும் அவதரிக்கவே இல்லை. கலியுகத்தின் முடிவு காலத்தில், பௌத்தத்தை மக்கள் மறந்து போகும் போது மைத்ரேயர் அவதரிப்பார் என்று மஹாயான புத்த மதத்தினர் நம்புகிறார்கள். அதாவது இவர் தான் வருங்கால புத்தராம். கிட்டத்தட்ட மூன்று மாடி கட்டிடத்தின் உயரத்தில் பிரும்மாண்டமாய்க் காட்சி தருகிறார் மைத்ரேயர். ஏறி இறங்கி தரிசிக்க நுரையீரல்களின் அனுக்கிரஹமும் தேவை தான்!

Spot 3: ஷே அரண்மனை

முதல் நாள் பார்த்த ஒன்பது மாடி அரண்மனை சிங்கே நம்ங்கியால் மன்னனுடையது. அவருடைய மகனான தெல்தன் நம்ங்கியால் மன்னன் கட்டியது தான் இந்த ஷே அரண்மனை. இதனோடு ஒரு புத்த விகாரமும் அதனுள்ளே தங்க முலாம் பூசப்பட்ட செம்பினால் ஆன ஸக்யமுனி புத்தர் சிலையும் உள்ளன. 17ஆம் நூற்றாண்டில் திபெத், இந்தியா மற்றும் சீனத்தில் இருந்த architectural trendsன் கலவையாக இந்த அரண்மனை கட்டப்பட்டுள்ளது.

Spot 4: Sindhu Ghat

“சிந்து நதியின்மிசை வெயிலிலே…” என்று பாடியபடி அடுத்த இடமான சிந்து காட் படித்துறைக்கு வந்திருக்கிறோம். நல்ல விசாலமான இடம். மதிய உணவு அருந்த ஏற்ற இடம். சில்லென்ற சிந்து நதிக்குள் கால்களை விட்டுக்கொண்டு பார்சல் வாங்கிவந்த உணவினை, நம்மூரில் ஆடிப்பெருக்கன்று ஆற்றங்கரையோரம் அமர்ந்து சித்ரான்னம் உண்ணும் வழக்கத்தை மனதுக்குள் அசைபோட்டபடியே, உண்ணலாம். வெயில் உரைக்கவே இல்லை; கவலை வேண்டாம். லே முழுக்க இந்த சிந்துவின் தண்ணீர் தான் புழங்குகிறார்கள். சுவாரசியமான விஷயம் என்னவென்றால் பைப்புகளில் சிந்து நீர் விநியோகம் செய்யப்படுவதில்லை. கால்வாய்கள், குறுகலான ஓடைகள் என்று ஊர் முழுக்க வெட்டியிருக்கிறார்கள். சிந்துநீர் இவைகளின் வழிதான் ஊருக்குள் வருகிறது. இந்த ஓடைகளை மிகுந்த மரியாதையோடு பயன்படுத்துகிறார்கள். படு சுத்தமாக இருக்கின்றன இந்த சிந்துநதிக் கால்வாய்கள். இதிலிருந்து தான் சமைக்க துவைக்க என்று நீர் மொண்டு பயன்படுத்துகிறார்கள் லடாக்கிகள். சிந்து சமவெளி நாகரிகம் பற்றி மேம்போக்காகச் சில வரலாறுகளைப் பேசிக்கொண்டே மதிய உணவினை முடித்துக்கொண்டு கிளம்பலாம்.

Spot 5: Rancho’s School at Shey 

சங்கர் இயக்கி விஜய் நடித்த நண்பன் படத்தை மறந்திருக்க மாட்டீர்கள். ஆமிர்கான் நடித்த 3 idiots படத்தின் ரீ மேக் தானே நண்பன்! 3 Idiots படத்தின் கடைசி காட்சியில் ஆமிர்கான் ஒரு பள்ளி ஆசிரியராய் இருப்பாரே.. அந்தக் காட்சிகள் படமாக்கப்பட்ட பள்ளி தான் இது. உண்மையில் 900 மாணவர்கள் படிக்கும் பௌத்த கலாச்சார பள்ளியாகும் இந்தப்பள்ளி. படக்காட்சிகள் படமாக்கப்பட்ட சின்ன பகுதி மட்டும் சுற்றுலா பயணிகளுக்காக ஒதுக்கிவிட்டிருக்கிறார்கள். வேடிக்கையாய்ச் சில photos எடுத்துக்கொண்டு சட்டென்று கிளம்பிவிடலாம்.

Spot 6: லே மார்கெட்

அழகான சுத்தமான மார்கெட் இருக்கிறது லேவில். திபெத்திய கலைப் பொருட்கள், கம்பளி கலந்த அழகான வேலைப்பாடுகள் கொண்ட பலவித ஆடைகள், விரிப்புகள், இமயத்தின் ஓவியங்கள், விதவிதமான ஜெம் வகை கற்கள், ரத்தினங்கள் பதிக்கப்பட்ட நகைகள், உலர் பழங்கள் என்று செலவுசெய்ய நிறையவே உள்ளன இந்த மார்கெட்டில். சுற்றம் நட்புகளுக்கு அன்பளிப்புகள் வாங்கிக்கொண்டு தங்குமிடம் புறப்பட வேண்டியது தான். 

இரண்டு அழகிய பெரிய புத்தவிகாரங்கள், பிரும்மாண்டமான மைத்ரேயர், அரண்மனை, பள்ளி, சிந்து நதி படித்துறை, அங்காடித்தெரு என்று இரண்டாம் நாள் இனிதே நிறைவுற்றது.

தொடர்ந்து பயணிப்போம்...