குறுகிய கால முதலீட்டில் சிறந்தது எது? FD? சேமிப்புக் கணக்கு? அரசுப் பத்திரங்கள்?

குறுகிய காலத் தேவைகளுக்கான சேமிப்புகள் என்பது அவசர காலங்கள் அல்லது குறுகிய கால நிதி இலக்குகளுக்காகப் பணத்தை ஒதுக்குவதாகும். இதற்கு நிலையான வைப்புத்தொகைகள், சேமிப்புக் கணக்குகள், குறுகிய காலக் கடன் நிதிகள் மற்றும் கருவூலப் பத்திரங்கள் போன்ற பாதுகாப்பான மற்றும் எளிதில் அணுகக் கூடிய முதலீட்டு விருப்பங்கள் மிகவும் சிறந்தவை. இந்த சேமிப்புகள் பொதுவாக ஒரு வருடம் அல்லது அதற்கு குறைவான காலத்திற்கானவை. இவை பாதுகாப்பான முதலீடுகள் மூலம் மூலதனப் பாதுகாப்பையும், எளிதாகப் பணத்தை எடுக்கும் வசதியையும் வழங்குகின்றன.

1) நிலையான வைப்புத் தொகைகள் (Fixed Deposits):

இந்த திட்டத்தின் மூலம் ஒரு குறிப்பிட்ட காலத்திற்கு நம் பணத்தை முதலீடு செய்து, நிலையான வட்டி விகிதத்தைப் பெறலாம். குறுகிய காலத் தேவைகளுக்காக முதலீடு செய்வதற்கு இவை ஒரு சிறந்த வழியாகும்.

வங்கிகள் அல்லது தபால் அலுவலகங்களில் குறுகிய கால நிலையான வைப்புத் தொகைகளை திறக்கலாம். இவை நிலையான வட்டி விகிதத்தில் உத்திரவாதமான வருமானத்தை வழங்குகின்றன. பொதுவாக ஏழு நாட்கள் முதல் சில ஆண்டுகள் வரை முதிர்வு காலத்தைக் கொண்டுள்ளன.

2) சேமிப்புக் கணக்குகள் (Savings Accounts):

எப்பொழுது வேண்டுமானாலும் பணத்தை எடுக்கவும், திரும்பப் பெறவும் முடியும் என்பதால் இவை அதிக பணப்புழக்கத்தை வழங்குகின்றன. வட்டி விகிதங்கள் நிலையான வைப்புத்தொகைகளை விடப் பொதுவாகக் குறைவாக இருக்கும்.

3) குறுகிய காலக் கடன் நிதிகள் (Short- term Debt Funds):

இவை 3 முதல் 12 மாதங்கள் அல்லது ஓரிரு ஆண்டுகள் போன்ற குறுகிய கால முதிர்வு கொண்ட கடன் பத்திரங்களில் முதலீடு செய்கின்றன. இவை பணச் சந்தை நிதிகளை விட சற்று அதிகமான வருமானத்தை வழங்குகிறது. குறுகிய காலத்தில் முதலீட்டாளர்கள் கடன் கருவிகளில் முதலீடு செய்ய அனுமதிக்கின்றன. இவை பொதுவாக பாதுகாப்பானவை மற்றும் நிலையான வைப்புத் தொகையை விட சற்று அதிக வருமானம் ஈட்டக் கூடியவை.

4) கருவூலப் பத்திரங்கள் (Treasury Bills):

இவை இந்திய ரிசர்வ் வங்கியால் இந்திய அரசாங்கத்தின் சார்பாக வெளியிடப்படும் குறுகிய கால கடன் பத்திரங்களாகும். இவை மிகவும் பாதுகாப்பான, குறுகிய கால மற்றும் நிலையான வருமான வாய்ப்பை வழங்கும் முதலீடுகளில் ஒன்றாகும்.

இவற்றில் எது சிறந்தது?

• நம் தேவைகள் மற்றும் இடர் சகிப்புத்தன்மை ஆகியவற்றைப் பொறுத்து ஒரு விருப்பத்தை தேர்வு செய்யலாம். உடனடி பணப்புழக்கம் தேவைப்பட்டால், ஒரு சேமிப்பு கணக்கு அல்லது குறுகிய காலக் கடன் நிதி சிறந்தது.

• ஒரு குறிப்பிட்ட காலத்திற்கு நம் பணத்தை ஒதுக்க முடியும் என்றால், நிலையான வைப்புத் தொகை ஒரு நல்ல தேர்வாக இருக்கும். நம் நிதி இலக்குகளை அடைவதற்கு, நம் இடர் தேவைகள் மற்றும் வட்டி விகிதங்கள் போன்ற காரணிகளை கவனத்தில் கொள்ள வேண்டும்.

• குறுகிய கால சேமிப்புகளில் மூலதனப் பாதுகாப்பிற்கு முன்னுரிமை அளிக்க வேண்டும். எனவே அதிக ஆபத்துள்ள பங்குச் சந்தை முதலீடுகளை தவிர்ப்பது நல்லது.

குறுகிய கால சேமிப்பின் நன்மைகள்:

• குறுகிய கால தேவைகளுக்கான சேமிப்புகள் அவசர கால நிதியை உருவாக்குகின்றன. வாகனப் பழுது, எதிர்பாராத மருத்துவ செலவுகள் போன்ற உடனடி மற்றும் எதிர்பாராத செலவுகளுக்கு பணம் ஒதுக்குவதற்கு இது ஒரு சிறந்த வழியாகும்.

• பங்குச்சந்தை மற்றும் பரஸ்பர நிதிகள் போன்ற முதலீடுகளைப் போலல்லாமல் குறுகிய கால சேமிப்பு திட்டங்கள் சந்தை ஏற்ற இறக்கங்களால் பாதிக்கப்படுவதில்லை. இது மன அமைதியைத் தருகிறது.

• தேவைப்படும்போது பணம் கிடைப்பதுடன், நிதி தேவைகளுக்கு ஏற்ப முதலீடுகளை மாற்றியமைக்கும் நெகிழ்வுத்தன்மையையும் வழங்குகிறது.