ஹோட்டல் தேவையில்லை; நடமாடும் உணவகம் மூலம் கல்லா கட்டுவது எப்படி? முழு விவரம்!

உணவகம் தொடங்குவதற்கு குறைந்த செலவிலான மாற்று வழி தான் இந்த உணவு ட்ரக் என்பது. இத்தொழில் கடந்த சில வருடங்களாக பெரும் வளர்ச்சியைக் கண்டுள்ளது. ஒரு உணவகத்தைத் தொடங்குவதைவிட உணவு வண்டியைத் தொடங்குவது செலவும் குறைவு, வருமானமும் அதிகம். உணவு வண்டியை இயக்குவதற்கு தேவைப்படும் உரிமங்களும் அனுமதிகளும் பெரும்பாலும் நாம் வசிக்கும் மாநிலத்தைப் பொறுத்து அமையும்.

ஆனால் குறைந்த பட்சம் ஒரு வணிக உரிமமும், உணவு சேவை அனுமதியும் தேவைப்படும். இதற்கு உள்ளூர் சுகாதாரத் துறையைத் தொடர்பு கொண்டு என்னென்ன தேவைப்படும் என்பதை தெரிந்து கொள்வது சிறந்த வழியாகும். அத்துடன் உணவு வண்டிகளை எங்கு வேண்டுமானாலும் நிறுத்த முடியாது. எனவே சாத்தியமான வாகன நிறுத்தக் கட்டுப்பாடுகள் குறித்து, அதன் விதிமுறைகளைப் பற்றி அறிந்து கொள்ள உள்ளூர் மோட்டார் வாகனத்துறையை தொடர்பு கொள்ளலாம்.

உணவு வண்டியை நிறுத்துவதற்கான சிறந்த இடம்:

உணவு வண்டியின் இருப்பிடம் விற்பனையில் நேரடித் தாக்கத்தை ஏற்படுத்தும். விரைவான மற்றும் வசதியான உணவை ஏராளமான மக்கள் தேடும், அதிக நடமாட்டம் உள்ள பகுதிகளே சிறந்த இடங்களாக அமைகின்றன. உதாரணத்திற்கு சொல்ல வேண்டுமென்றால் மதிய உணவு நேரத்தில் ஒரு நகரத்தின் வணிகப் பகுதியிலோ அல்லது கல்லூரி வளாகத்திலோ வண்டியை நிறுத்தலாம்.

வார இறுதி நாட்களில் பூங்காக்கள், சிறுவர் விளையாட்டுப் போட்டிகள் மற்றும் குடும்பங்கள் கூடும் பொழுதுபோக்கு இடங்களுக்கு சென்றால் அதிக வியாபாரம் நடக்கும். ஆனால் சில நகரங்களில் இந்த இடங்களுக்குள் நுழைய அனுமதி தேவைப்படுவதால், முதலில் உள்ளூர் விதிகளை சரிபார்த்துக்கொள்ள வேண்டியது அவசியம்.

இசை நிகழ்ச்சிகள் மற்றும் திருவிழாக்கள் போன்ற நிகழ்வுகள் நடைபெறும் இடங்களைத் தேர்வு செய்யலாம். அங்கு உணவு தேர்வுகளைத் தேடும் மக்கள் கூட்டம் அதிகம் இருக்கும். இருப்பினும் விற்பனையாளர் கட்டணங்கள் மிகவும் அதிகமாக இருக்கலாம். எனவே இந்த நிகழ்வுகளில் ஈடுபடுவதற்கு முன்பு சாத்தியமான விற்பனையை முதலில் மதிப்பிட வேண்டும்.

தேர்ந்தெடுக்கும் இடம் எதுவாக இருந்தாலும் முதலில் அந்தப் பகுதியின் மண்டலச் சட்டங்களை சரிபார்த்து, தேவையான அனுமதிகளைப் பெறுவதை உறுதிப் படுத்திக்கொள்ள வேண்டும். மேலும் கழிவு அகற்றும் வசதி மற்றும் வாகன நிறுத்துமிட வரம்புகள் போன்ற நடைமுறை சிக்கல்களையும் தெரிந்து கொள்ள வேண்டும்.

சந்தைப்படுத்துதல்: 

உணவு வண்டி வணிகத்தை வெற்றிகரமாக சந்தைப்படுத்த சமூக வலைதளங்கள், உள்ளூர் விளம்பரங்கள் மற்றும் சுவையான சலுகைகளை ஒருங்கிணைத்து வாடிக்கையாளர்களை ஈர்க்கலாம். 

ஆன்லைன் மற்றும் சமூக வலைதளங்கள்: 

தினமும் நீங்கள் வண்டியை நிறுத்தும் இடம் மற்றும் நேரத்தை instagram அல்லது facebook பக்கங்களில் 'ஸ்டோரி'யாக பதிவிடலாம். 

கூகுள் மேப்: 

உங்கள் வணிகத்தை Google My Businessல் பதிவு செய்யலாம். இதனால் அப்பகுதியில் உள்ளவர்கள் எளிதாக உங்கள் இடத்தைக் கண்டறிய முடியும்.

சலுகைகள்: 

சமூக வலைதளங்களைப் பார்த்து வரும் வாடிக்கையாளர் களுக்கு பிரத்யேக தள்ளுபடிகளை அறிவிக்கலாம்.

சுவரொட்டிகள் மற்றும் பேனர்கள்: 

வண்டி நிற்கும் இடத்திற்கு அருகிலுள்ள கல்லூரி, அலுவலகங்கள் மற்றும் மக்கள் அதிகம் கூடும் இடங்களில் விளம்பரப் பலகைகளை வைத்து உள்ளூர் விளம்பரங்கள் மூலம் மக்களை ஈர்க்கலாம்.

வாடிக்கையாளர்களுக்கு தரமான மற்றும் சுவையான உணவை சரியான விலையில் வழங்கினால் அதுவே சிறந்த விளம்பரமாக மாறும். 

வாடிக்கையாளர்கள் ஈர்ப்பு: 

*உங்கள் வண்டிக்கென்று பிரத்யேகமான உணவு வகைகளை (Signature Dish) அறிமுகப்படுத்தலாம்.

*5 முறை சாப்பிட்டால் 6வது முறை இலவசம் போன்ற கூப்பன்களை வழங்கி வாடிக்கையாளர்களை தொடர்ந்து வரவழைக்கலாம்.

*உங்கள் வண்டியை Swiggy அல்லது Zomato போன்ற உணவு விநியோக செயலிகளில் (food delivery apps) இணைப்பதன் மூலம் ஆன்லைன் ஆர்டர்களைப் பெறலாம்.