9:15 To 3:30: பங்குச்சந்தையில் ஒவ்வொரு மணி நேரமும் நடப்பது என்ன?

பங்குச்சந்தையின் வர்த்தக நேரம் காலை 9:15 மணி முதல் பிற்பகல் 3:30 மணி வரை. இந்த நேரம் முழுவதும் பங்குகள் ஒரே மாதிரியான வேகத்தில் வர்த்தகமாகாது. வணிக நாட்களின் ஒவ்வொரு மணி நேரமும் ஒரு குறிப்பிட்ட தன்மையைக் கொண்டிருக்கும்.

காலை நேரத்தில் சந்தை சீறும் புயல் போலத் தொடங்கும். முற்பகலில் அலையைப்போல ஏறி இறங்கும். மதிய வேளையில் அமைதியான ஓய்வு நிலைக்குச் சென்று, மாலையில் மீண்டும் ஒரு புதிய பாய்ச்சலைச் சந்திக்கும். அது சில பங்குகளில் ஏற்றமாகவும், சில பங்குகளில் இறக்கமாகவும் இருக்கும்.

சிறந்த வர்த்தகராக ஆவதற்கு இந்த நேரச் சுழற்சிக்குப் பின்னால் இருக்கும் காரண காரியங்களைப் புரிந்துகொள்வது மிக முக்கியம்.

காலை 9:15 - 9:45: புயல் கட்டம்

சந்தை தொடங்கிய முதல் அரை மணி நேரம் என்பது அதிவேகப் புயல் வீசும் கட்டமாகும். சில பங்குகள் சரசரவென ஏறும்; சில பங்குகள் செங்குத்தாகச் சரியும். இதற்குக் காரணம் ‘விலை நிர்ணயப் போட்டி’ (Price Discovery) தான்.

நேற்றைய தினம் மாலை 3:30 மணிக்குச் சந்தை முடிந்ததிலிருந்து, இன்று காலை 9:15 மணி வரை சுமார் 18 மணி நேர இடைவெளி உள்ளது. இந்த இடைவெளியில் வெளியான சர்வதேசப் பொருளாதாரச் செய்திகள், நிறுவன அறிவிப்புகள், அமெரிக்க மற்றும் ஆசியச் சந்தைகளின் நிலவரங்கள் ஆகியவை முதலீட்டாளர்களின் மனநிலையைத் தீர்மானிக்கின்றன.

மேலும், முந்தைய நாளே பதிவிடப்பட்ட 'சந்தைக்குப் பிந்தைய ஆர்டர்கள்' (After Market Orders - AMO) மற்றும் கணினி வழி இயங்கும் தானியங்கி அல்கோ வர்த்தகங்கள் (Algo Trading) அனைத்தும் சந்தை திறந்த ஒரே நொடியில் நிறைவேற்றப்படும். இதனால், வாங்குபவர்களுக்கும் விற்பவர்களுக்கும் இடையே நடக்கும் கடுமையான போட்டியால் முதல் 30 நிமிடங்களில் தீவிரமான விலை ஏற்ற இறக்கம் நிலவுகிறது.

காலை 9:45 - 11:30: அலைகள் கட்டம்

புயல் ஓய்ந்த பிறகு, சந்தை ஒரு தெளிவான திசையைக் கண்டறியத் தொடங்கும் நேரமிது. முதல் 15 நிமிடங்களின் கடுமையான அபாயத்தைத் தவிர்க்க நினைக்கும் அனுபவமிக்க இன்ட்ராடே மற்றும் ஸ்விங் டிரேடர்கள் இந்த நேரத்தில்தான் சந்தைக்குள் நுழைவார்கள்.

இக்கட்டத்தில் விலை ஏற்ற இறக்கங்கள் கடல் அலையைப் போலக் குறிப்பிட்ட வரம்பிற்குள் ஏறி இறங்கும். காலையில் குறைந்த விலைக்குப் பங்குகளை வாங்கியவர்கள் சிறிய லாபத்தைப் பதிவு செய்யத் தொடங்குவார்கள்; அதேபோல, பயந்து விற்றவர்கள் விலகிய பின் புதிய முதலீட்டாளர்கள் பங்கை வாங்க முன்வருவார்கள். இந்த இரு துருவங்களின் போட்டியால், சந்தை ஒரு சீரான ஓட்டத்திற்கு வந்து தனது அன்றைய முக்கியப் போக்கை (Trend) உறுதிப்படுத்தும்.

நண்பகல் 11:30 - பிற்பகல் 2:00: மதிய நேர ஓய்வுக்கட்டம்

மதிய வேளையில் பெரும்பாலான பங்குகளின் வர்த்தக அளவு (Volume) கணிசமாகக் குறைந்து, விலை பெரிய மாற்றமின்றி ஒரே இடத்தில் தேங்கி நிற்கும் (Sideways Movement).

இதற்கு உலகளாவிய அளவில் ஒரு முக்கியக் காரணம் உண்டு. இந்திய நேரப்படி மதியம் 12:30 மணிக்கு மேல்தான் ஐரோப்பியப் பங்குச்சந்தைகள் (European Markets) திறக்கப்படும். அதுவரை பெரிய வெளிநாட்டு நிறுவன முதலீட்டாளர்கள் (FIIs) உலகச் சந்தைகளின் போக்கை கவனிப்பதற்காக அமைதி காப்பார்கள். மேலும், பெரிய நிறுவன டிரேடர்களின் மதிய உணவு இடைவேளையும் இதற்கு ஒரு தற்காலிகக் காரணமாக அமைகிறது.

பிற்பகல் 2:30 – 3:30: இறுதி நேரப் பாய்ச்சல்

சந்தை முடியப்போகும் கடைசி ஒரு மணி நேரத்தில் மீண்டும் சந்தையில் பெரும் பரபரப்பு தொற்றிக் கொள்ளும். அன்றைய தினத்திற்குள் வர்த்தகத்தை முடிக்க வேண்டிய இன்ட்ராடே டிரேடர்களின் ஆர்டர்களை, புரோக்கர் நிறுவனங்கள் பிற்பகல் 3:15 மணிக்குக் கட்டாயமாக முடிவுக்குக் கொண்டுவரும் (Auto Square-off). இதனால் ஒரே நேரத்தில் லட்சக்கணக்கான பங்குகள் கைமாறுவது ஒரு காரணம்.

மற்றொரு புறம், “இன்றைக்கு வாங்கி நாளைக்கு விற்கும்” (BTST – Buy Today Sell Tomorrow) உத்தியைப் பின்பற்றும் ஸ்விங் டிரேடர்களும், பெரிய பரஸ்பர நிதி நிறுவனங்களும் அடுத்த நாளுக்கான பங்குகளை மாலையில்தான் வாங்கக் குவிவார்கள். இந்த இறுதிநேர வர்த்தக அழுத்தம் காரணமாகவே, பல பங்குகள் அன்றைய நாளின் உச்ச விலையையோ அல்லது தாழ்ந்த நிலையையோ அடைந்து வர்த்தகத்தை நிறைவு செய்கின்றன.

வர்த்தகர்கள் கவனிக்க வேண்டிய நேர மேலாண்மை

சந்தையின் இந்த இயற்கைச் சுழற்சியைப் புரிந்துகொண்டால், தேவையற்ற நஷ்டங்களைத் தவிர்க்கலாம். காலை 9:15 முதல் 9:45 வரையிலான புயல் நேரத்தில், ஏற்கனவே திட்டமிடாத புதிய வர்த்தகத் தீர்மானங்களை எடுப்பதைத் தவிர்க்க வேண்டும். சந்தை ஒரு திசையைக் காட்டும் காலை 10:00 முதல் 11:00 மணி வரையிலான நேரமே பங்குகளை வாங்க அல்லது விற்க மிகவும் உகந்தது.

அதேபோல, அடுத்த நாள் வரை பங்குகளை வைத்திருக்கும் ஸ்விங் டிரேடிங் செய்ய விரும்புபவர்கள், பிற்பகல் 2:30 மணிக்கு மேல் பங்குகளைத் தேர்ந்தெடுப்பது பாதுகாப்பானது. சந்தையின் நேர அமைப்பைப் புரிந்து செயல்படுவதே ஒரு சாமானிய முதலீட்டாளரை வெற்றிகரமான வர்த்தகராக உயர்த்தும்.

Reference: