விமர்சனம்: Prathichaya (2026) - மலையாளம் - பொலிட்டிக்கல் க்ரைம் திரில்லர்!

26/03/2026 முதல் திரை அரங்குகளில் வெளியாகி வெற்றி பெற்ற இந்தப்படம், இப்போது 24/04/2026 முதல் ஜியோ ஹாட் ஸ்டார் ஓடிடியில் தமிழ் டப்பிங்கில் கிடைக்கிறது.

சர்வம் மாயா மெகா ஹிட்டுக்குப்பின் நிவின் பாலியின் அரசியல் சம்பந்தப்பட்ட படம் இது. நம்ம ஊர் ஜனநாயகன் போலவே கேரளாவில் பரபரப்பைக் கிளப்பிய படம்

ஸ்பாய்லர் அலெர்ட்

நாயகனின் அப்பா மாநில முதல்வர். நாயகனுக்கு ஒரு அண்ணன் உண்டு. ஆனால் அவன் மேல் அப்பாவுக்கு நம்பிக்கை இல்லை. நாயகன் மீது தான் அதீத நம்பிக்கை வைத்திருக்கிறார்.

நாயகனுக்கு அரசியலில் ஆர்வம் இல்லை. ஐடி பீல்டில் இருக்கிறார். ஒரு ஸ்டார்ட் அப் கம்பெனி ஆரம்பிக்கும் ஐடியாவில் இருக்கிறார்.

இந்த தருணத்தில் நாயகனின் அப்பா முதல்வன் படத்தில் வருவது போல் ஒரு டிவி லைவ் ஷோவில் கலந்து கொண்டு பேட்டி அளிக்கிறார்.

அப்போது திடீர் என்று திரையில் ஒரு க்ளிப்பிங்க் ஓடுகிறது. அதில் ஒரு இளம்பெண் தோன்றி முதல்வர் என்னை பாலியல் வன்கொடுமை செய்து விட்டார் எனக்குற்றம் சுமத்துகிறாள்.

மொத்த மாநிலமும் பரபரப்பாகிறது. முதல்வர் ராஜினாமா செய்ய நேரிடுகிறது. அன்று இரவு முதல்வர் வீட்டில் மரணம் அடைகிறார்.

முதல்வரின் மகன் ஆன நாயகன் முதல்வர் ஆகிறான். தன் அப்பாவின் மீது சுமத்தப்பட்ட குற்றச்சாட்டின் பின்னணியில் இருக்கும் சதியை உலகத்துக்கு அம்பலப்படுத்த முயற்சிகள் எடுக்கிறான். நாயகனின் முயற்சி வெற்றி அடைந்ததா? என்பது மீதிக்கதை.

நாயகன் ஆக நிவின்பாலி கம்பீரமாக வருகிறார். அப்பாவுடனான பாசம் வெளிப்படுத்தும்போது கண்களைக் கலங்க வைக்கிறார்.

அவர் தவிர ஆன் அகஸ்டின், பாலச்சந்திரமேனன், சராப் யூதீன், நீத்து கிருஷ்ணா, ஹரி ஸ்ரீ அசோகன் ஆகியோர் முக்கியக் கதாபாத்திரங்களில் நடித்திருக்கிறார்கள்.

நாயகனின் அம்மாவாக சின்னப்பூவே மெல்லப்பேசு புகழ் சபீதா ஆனந்த் கச்சிதமாக நடித்திருக்கிறார்.

ஜஸ்டின் வர்கீஸ் தான் இசை. பின்னணி இசையில் வேகம் கூட்டுகிறார்.

திரைக்கதை எழுதி இயக்கி இருப்பவர் பி உன்னி கிருஷ்ணன்.

சபாஷ் டைரக்டர்

• முதல்வரின் மீது பாலியல் வன்கொடுமை குற்றச்சாட்டு எழுந்த பின் வீட்டில் அவரிடம் நெருங்க 5 வயதுப் பேத்தியே பயப்படுவது கண்டு மனம் கலங்கும் காட்சி.

• முதல்வரை சதி வலையில் மாட்ட வைத்தது நாயகனா?நாயகனின் அண்ணனா? என்ற சந்தேகத்தை ஆடியன்ஸ் மனதில் மாறி மாறி வர வைத்த லாவகம்.

லாஜிக் மிஸ்டேக்ஸ், திரைக்கதையில் சில நெருடல்கள்

• இயக்குநர் அஜித்குமார் ரசிகர் போல. படத்தில் எல்லாக் கேரக்டர்களும் ஸ்லோ மோஷனில் ஸ்டைலிஷ் ஆக நடப்பதைக் காட்டுவதைக் கட் பண்ணி இருந்தால் படத்தின் நீளத்தில் அரை மணி நேரம் மிச்சம் ஆகும்.

• நாயகனின் மனைவி பதவி, அதிகாரத்துக்கு ஆசைப்படாதவர் என காண்பித்தது சரி. ஆனால் நாயகன் முதல்வர் பதவியை ஏற்றதும் அவரைப்பிரிவது நம்ப முடியவில்லை. முதல்வரின் மனைவி என்ற கவுரவத்தை யாராவது இழப்பார்களா?

• கதைக்கருவும், திரைக்கதையும் அடுத்தடுத்து இந்த காட்சிகள் தான் வரும் என யூகிக்க வைப்பவை தான். புதிதாக எதுவும் இல்லை.

• நாயகனின் அப்பா நேர்மையான முதல்வர் இல்லை. லஞ்சம், ஊழல் செய்பவர்தான். அவர் ஏன் கார்ப்பரேட் கம்பெனியின் டீலிங்க்கிற்கு ஒத்துக்கொள்ளவில்லை?வர்ற வருமானத்தை ஏன் விடுகிறார்? என்பதற்கு விளக்கம் இல்லை.

அடல்ட் கண்ட்டெண்ட் வார்னிங் - 13+

சிபிஎஸ் ஃபைனல் கமெண்ட் - டூயட், காமெடி, பாட்டு இல்லாத பொலிடிக்கல் க்ரைம் திரில்லர் பார்க்க விரும்புகிறவர்கள் பார்க்கலாம்.