யுனெஸ்கோ பட்டியலில் செஞ்சிக் கோட்டை... 'கிழக்கின் ட்ராய்' என அழைக்கப்படுவது ஏன்?

தமிழ்நாட்டின் விழுப்புரம் மாவட்டத்தில் அமைந்துள்ள செஞ்சிக் கோட்டை (Gingee Fort) வரலாற்றுச் சிறப்புகள் வாய்ந்தது. இந்தக் கோட்டை கடந்த ஆண்டு யுனெஸ்கோவின் (UNESCO) உலகப் பாரம்பரியச் சின்னங்கள் பட்டியலில் அதிகாரப்பூர்வமாக இணைக்கப்பட்டது. இதன் மூலம் தமிழ்நாட்டின் 6-வது உலகப் பாரம்பரிய சின்னம் என்ற மாபெரும் பெருமையைச் செஞ்சிக் கோட்டை பெற்றுது. 

கிரேக்கப் புராணங்களில் வரும் புகழ்பெற்ற ட்ராய் (Troy) நகரத்தைப் பற்றி நீங்கள் கேள்விப்பட்டிருக்கலாம். எதிரிகளால் எளிதில் வெல்ல முடியாத அளவுக்கு ட்ராய் நகரம் மிகவும் வலிமையான பாதுகாப்பு அரண்களைக் கொண்டிருந்தது.

அதேபோல செஞ்சிக் கோட்டையும் அசைக்க முடியாத பாதுகாப்பைக் கொண்டிருந்ததால், ஆங்கிலேயர்கள் இதனை 'Troy of the East (கிழக்கின் ட்ராய்)' என வியந்து அழைத்தனர். அந்தப் பெருமைக்குரிய செஞ்சிக் கோட்டை பற்றிய பல சுவாரஸ்யமான வரலாற்றுத் தகவல்களை ஒவ்வொரு தமிழனும் கட்டாயம் தெரிந்து கொள்ள வேண்டும்.

யுனெஸ்கோ பட்டியலில் கிடைத்த இடம்!

கடந்த ஆண்டு இந்தியாவின் 44-வது உலகப் பாரம்பரியச் சின்னமாக 'மராட்டிய ராணுவ நிலப்பரப்புகள்' என்ற தொகுப்பு அறிவிக்கப்பட்டது. இந்தத் தொகுப்பின் கீழ் உள்ள 12 கோட்டைகளில் ஒன்றாகத் தற்போது செஞ்சிக் கோட்டையும் இடம்பிடித்துள்ளது. இதில் ஒரு சிறப்பு என்னவென்றால், அந்தப் பட்டியலில் உள்ள 12 கோட்டைகளில் மகாராஷ்டிரா மாநிலத்திற்கு வெளியே அமைந்துள்ள ஒரே கோட்டை இது மட்டும்தான். 

1677-ஆம் ஆண்டு மராட்டிய மன்னர் சத்ரபதி சிவாஜி இந்தக் கோட்டையைக் கைப்பற்றினார். அதன் பின்பு கோட்டையின் பாதுகாப்பு அரண்களை அவர் மேலும் வலுப்படுத்தினார். தற்போது யுனெஸ்கோ அங்கீகாரம் பெற்றதன் மூலம், தமிழ்நாட்டின் பெருமைமிக்க சின்னங்களான தஞ்சை பெரிய கோயில், மாமல்லபுரம் சிற்பங்கள், நீலகிரி மலை ரயில் மற்றும் மேற்குத் தொடர்ச்சி மலைகள் வரிசையில் செஞ்சிக் கோட்டையும் இணைந்துள்ளது.

எதிரிகளை நடுங்கச் செய்த பாதுகாப்பு! 

செஞ்சிக் கோட்டை ஏன் 'கிழக்கின் ட்ராய்' என்று அழைக்கப்படுகிறது என்பதற்கு அதன் பிரம்மாண்டமான கட்டுமானமே முக்கியக் காரணமாகும். இந்தக் கோட்டை ராஜகிரி, கிருஷ்ணகிரி மற்றும் சந்திராயன் துர்க்கம் ஆகிய மூன்று செங்குத்தான மலைகளை உள்ளடக்கி முக்கோண வடிவில் கட்டப்பட்டுள்ளது. சுமார் 7 சதுர கிலோமீட்டர் பரப்பளவைக் கொண்ட இந்த மூன்று மலைகளும் இயற்கையாகவே கோட்டைக்குப் பெரும் அரணாக அமைந்துள்ளன. 

இந்த மூன்று மலைகளையும் இணைக்கும் வகையில் சுமார் 12 கிலோமீட்டர் நீளத்திற்கு பிரம்மாண்டமான கற்சுவர்கள் எழுப்பப்பட்டுள்ளன. இந்தச் சுவர்கள் 60 அடி அகலம் கொண்டவை. மேலும் கோட்டையைச் சுற்றி 80 அடி அகலமுள்ள மிக ஆழமான அகழி வெட்டப்பட்டிருந்தது. இதனால் எதிரிகள் எந்தப் பக்கத்திலிருந்தும் எளிதில் உள்ளே நுழைய முடியாதபடி பாதுகாப்பு மிகவும் பலப்படுத்தப்பட்டிருந்தது.

முற்றுகைகளைத் தாங்கிய வரலாறு! 

கோட்டையின் பாதுகாப்பு எவ்வளவு வலிமையானது என்பதற்கு வரலாற்றுச் சான்றுகள் உள்ளன. முகலாயப் பேரரசர் ஔரங்கசீப்பின் படைகள் இந்தக் கோட்டையைச் சுமார் 7 முதல் 8 ஆண்டுகள் வரை தொடர்ந்து முற்றுகையிட்டன.

அப்படியிருந்தும் அவர்களால் இந்தக் கோட்டையை எளிதில் கைப்பற்ற முடியவில்லை. கோட்டைக்கு உள்ளேயே வற்றாத நீரூற்றுகள், பெரிய தானியக் களஞ்சியங்கள் மற்றும் பாதுகாப்பான ஆயுதக் கிடங்குகள் இருந்தன. 

இதனால் கோட்டைக்குள் இருந்த வீரர்கள் பல ஆண்டுகள் உள்ளேயே தங்கியிருந்து தொடர்ந்து போரிட முடிந்தது. இந்தக் கோட்டையின் கட்டுமானத்தையும் பாதுகாப்பையும் நேரில் கண்ட சத்ரபதி சிவாஜி, "இது இந்தியாவிலுள்ள எவரும் உட்புக முடியாத கோட்டைகளுள் சிறந்தது" எனப் புகழ்ந்துள்ளார்.

ஆனந்தக் கோன் என்பவரால் 12-ஆம் நூற்றாண்டில் இந்தக் கோட்டைக்கு அடிக்கல் நாட்டப்பட்டது. அதன் பிறகு விஜயநகரப் பேரரசர்கள், நாயக்கர்கள், மராட்டியர்கள், முகலாயர்கள், பிரெஞ்சுக்காரர்கள் மற்றும் ஆங்கிலேயர்கள் எனப் பல ஆட்சியாளர்கள் இந்தக் கோட்டையை ஆண்டுள்ளனர்.

பல நூறு ஆண்டுகால வரலாற்றைச் சுமந்து நிற்கும் செஞ்சிக் கோட்டை, இன்றும் தென்னிந்தியாவின் தலைசிறந்த கட்டிடக்கலை அதிசயமாக கம்பீரமாக உயர்ந்து நிற்கிறது.