'OK' என்ற சொல்லுக்குப் பின்னால் ஒளிந்திருக்கும் அதிர்ச்சியூட்டும் ரகசியம்!

நமது அன்றாட உரையாடல்களில் தவிர்க்க முடியாத ஒன்றாக 'OK' என்ற வார்த்தை உள்ளது. நாம் யாரிடமாவது பேசும்போதோ அல்லது மெசேஜ் அனுப்பும்போதோ, ஒரு விஷயத்தை உறுதிப்படுத்த உடனடியாகப் பயன் படுத்தும் சொல் இதுதான். நம்மில் பலர் OKAY என்ற சொல்லின் சுருக்கம்தான் 'OK' என்று நினைப்பதுண்டு. ஆனால், உண்மை அது கிடையாது. வாருங்கள்.. இந்த இரண்டு எழுத்துக்கள் கொண்ட சொல் உருவான கதையை இந்தப் பதிவில் காணலாம்.

பத்திரிகையில் வேடிக்கையாகத் தொடங்கிய ஓகே வரலாறு!

1830 - களில் அமெரிக்காவில், தெரிந்தே சில சொற்களை தவறாக எழுதி சுருக்கிச் சொல்லும் கலாச்சாரம் மிகவும் பிரபலமாக இருந்தது. அதனடிப்படையில், 'All right' என்பதை 'Oll Korrect' என்று வேடிக்கையாக எழுதினார்கள். இதன் சுருக்கமே 'OK' ஆகும்.

'OK' என்ற சொல் 1839-ஆம் ஆண்டு மார்ச் 23-ஆம் தேதி, அமெரிக்காவின் 'பாஸ்டன் மார்னிங் போஸ்ட்' (Boston Morning Post) என்ற பத்திரிகையில் முதன்முதலில் அச்சு வடிவில் வெளியானது. அந்தப் பத்திரிகை ஆசிரியர் வேண்டுமென்றே மொழியின் இலக்கணத்தைச் சிதைத்து, வேடிக்கையாக இந்த வார்த்தையைப் பயன்படுத்தினார்.

தற்காலிகமாக நகைச்சுவையாக உருவாக்கப்பட்ட இந்த வார்த்தை காலப்போக்கில் மக்களின் நாக்கில் நிலைத்துவிட்டது.

அமெரிக்க அதிபர் தேர்தலில் ஓகே வரலாறு எப்படி மாறியது?

இந்தச் சொல் உலக அளவில் பிரபலமடைய மிக முக்கியமான காரணம் 1840-ஆம் ஆண்டு நடந்த அமெரிக்க அதிபர் தேர்தல் ஆகும். மார்ட்டின் வான் பியூரன் (Martin Van Buren) என்ற அதிபர் வேட்பாளரின் செல்லப்பெயர் 'Old Kinderhook' என்பதாகும். இது 'OK' என்று சுருக்கப்பட்டது.

"Vote for OK" என்ற முழக்கம் அவரது ஆதரவாளர்களால் முன்வைக்கப்பட்டது. அரசியல் பிரச்சாரத்தின் மூலம் இந்த வார்த்தை மக்களிடையே மிக வேகமாகவும் ஆழமாகவும் சென்று சேர்ந்தது. அன்றிலிருந்து, இது ஏதோ ஒரு சாதாரண சுருக்கச்சொல் என்பதைத் தாண்டி, சம்மதத்தை குறிக்கும் உலகளாவிய அடையாளமாக மாறியது.

'OK' உருவானது பற்றிப் பல சர்ச்சைகளும், மாற்றுக் கருத்துகளும் இன்றும் நிலவுகின்றன. கிரேக்க மொழியில் 'Ola Kala' (எல்லாம் நன்று) என்பதன் சுருக்கம் இது என்று சிலர் கூறுகின்றனர். அதேபோல், செவ்விந்திய பழங்குடியினரின் மொழியில் 'Okeh' (ஆம், இதுதான் உண்மை) என்ற சொல் இருந்ததாகவும், அதுவே ஆங்கிலத்தில் பரவியதாகவும் ஒரு கருத்து உண்டு.

மேலும், மேற்கு ஆப்பிரிக்க மொழிகளில் 'Waw-kay' என்ற சொல் இதே அர்த்தத்தில் பயன்படுத்தப்படுகிறது. இருப்பினும், இவை அனைத்தையும் விட, 19-ஆம் நூற்றாண்டில் அமெரிக்காவில் நிலவிய அந்த 'விளையாட்டுத்தனமான சுருக்கங்கள்' (misspelling trend) தான் இந்த வார்த்தைக்கு உயிர் கொடுத்தது என்பதை பெரும்பாலான மொழியியலாளர்கள் ஏற்றுக் கொள்கிறார்கள்.

தொழில்நுட்ப யுகத்தில் ஓகே வரலாறு ஏன் தவிர்க்க முடியாதது?

எந்த மொழியைச் சார்ந்தவராக இருந்தாலும், 'OK' என்ற வார்த்தையை எளிதாக உச்சரிக்க முடிகிறது. நாம் ஒருவருடன் பேசும்போது, 'ஆம்', 'சரி', 'புரிந்தது' போன்ற பல அர்த்தங்களை ஒற்றை வார்த்தையில் வெளிப்படுத்த இது உதவுகிறது.

குறிப்பாக, தந்தி முறை (Telegraph) அறிமுகமானபோது, தகவல்கள் தெளிவாகப் போய்ச் சேர்ந்ததை உறுதிப்படுத்த, இந்த இரண்டு எழுத்துக்கள் மிக எளிமையாகவும் வேகமாகவும் இருந்தன. தொழில்நுட்ப வளர்ச்சியால் இன்று வாட்ஸ்அப் போன்ற இணையப் பரிமாற்றத்திலும் இதுவே முதலிடத்தில் உள்ளது.

சுமார் 180 ஆண்டுகளுக்கு முன்பு ஒரு பத்திரிகையில் வேடிக்கையாக உருவாக்கப்பட்ட ஒரு வார்த்தை, இன்று மொழிப் பயன்பாட்டில் ஒரு அங்கமாகிவிட்டது. மொழிகள் என்பவை காலத்திற்கு ஏற்பத் தங்களை மாற்றிக் கொள்பவை என்பதற்கு 'OK' ஒரு சிறந்த சான்று.