'தொப்பை மலை' : கோபெக்லி டெபே : நரி எலும்புகள் அதிகம் காணப்படும் 'மரண வழிபாட்டு மையம்'!

ஒரு மர்மமான தொடக்கம்:

சுமார் 11,000 ஆண்டுகளுக்கு முன்பு, இன்றைய துருக்கியின் தென்கிழக்குப் பகுதியில், ஜெர்முஸ் மலைத்தொடரில், வேட்டையாடி உணவு சேகரித்த மனிதர்கள் ஒரு அதிசயத்தை உருவாக்கினர். இந்த இடம், 'கோபெக்லி டெபே', அதாவது 'தொப்பை மலை' என்று அழைக்கப்படுகிறது. இது உலகின் மிகப்பழமையான கோயில் என்று கருதப்படுகிறது - ஸ்டோன்ஹெஞ்சை விட இரு மடங்கு பழமையானது! இந்த நியோலிதிக் காலத்து இடத்தில், பெரிய T-வடிவ கல் தூண்கள் வட்ட வடிவில் அமைக்கப்பட்டு, சிங்கங்கள், நரிகள், மான்கள், பறவைகள் போன்ற விலங்குகளின் செதுக்கல்களால் அலங்கரிக்கப்பட்டுள்ளன.

இந்த இடம் நூற்றாண்டுகளாக மறைந்திருந்தது. 1960களில் முதலில் கண்டறியப்பட்டபோதும், இதைப் பெரிதாக யாரும் கவனிக்கவில்லை. ஆனால், 1994இல் ஜெர்மன் தொல்பொருள் ஆராய்ச்சியாளர் கிளாஸ் ஷ்மிட் இங்கு வந்தபோது, இதன் முக்கியத்துவம் உலகிற்கு வெளிப்பட்டது.1995 முதல் தொடங்கிய அகழ்வாய்வுகள் ஒரு அதிர்ச்சியூட்டும் உண்மையை வெளிக்கொணர்ந்தன.

இந்த பிரம்மாண்டமான கட்டமைப்பை உருவாக்கியவர்கள் வேட்டையாடி உணவு சேகரித்தவர்கள்! அவர்கள் விவசாயம் அல்லது வளர்ப்பு விலங்குகளை அறிந்திருக்கவில்லை, ஆனால் இத்தகைய கட்டிடக்கலையை உருவாக்கும் அறிவு அவர்களிடம் இருந்தது.

கற்காலத்தின் கட்டிடக்கலை புரட்சி

கோபெக்லி டெபேவின் கல் தூண்கள் 18 அடி உயரமும், 50 டன் எடையும் கொண்டவை. இவற்றை உருவாக்கியவர்கள் கையில் இருந்தவை வெறும் கல் சுத்திகளும், பிளின்ட் கத்திகளும் மட்டுமே. இவற்றைக் கொண்டு இத்தகைய பிரம்மாண்ட கட்டமைப்பை எப்படி உருவாக்கினர்? இதில் மழைநீர் சேகரிப்பு அமைப்பு, வட்ட வடிவ மையங்கள், சிறிய கட்டிடங்கள் என அனைத்தும் அடங்கும்.

இஸ்ரேல் தொல்பொருள் ஆய்வு மையத்தைச் சேர்ந்த கில் ஹக்லேயின் 2020 ஆய்வு இதற்கு ஒரு பதிலை அளிக்கிறது. கணினி மாதிரிகள் மூலம் ஆராய்ந்த அவர், இந்த கட்டமைப்பு ஒரு ஒருங்கிணைந்த திட்டத்தின் கீழ் கட்டப்பட்டது என்பதைக் கண்டறிந்தார். முக்கியமாக, ஒரு சமபக்க முக்கோண வடிவியல் அடிப்படையில் மூன்று மையங்கள் துல்லியமாக அமைக்கப்பட்டிருந்தன. ஒரு கயிற்றைப் பயன்படுத்தி இந்த வடிவத்தை அவர்கள் அளந்திருக்கலாம் என்று ஹக்லே கருதுகிறார்.

ஒரு மர்மமான நோக்கம்:

ஆனால், இந்த இடம் எதற்காக உருவாக்கப்பட்டது? இதற்கு இன்னும் தெளிவான பதில் இல்லை. சிலர் இதை ஒரு மத அல்லது சடங்கு மையமாகக் கருதுகிறார்கள். வேட்டையாடி உணவு சேகரித்தவர்கள் அனிமிச நம்பிக்கையை-மனிதர்கள், விலங்குகள், தாவரங்கள் அனைத்திற்கும் ஆன்மா உண்டு என்ற நம்பிக்கையை-கொண்டிருந்தனர். ஒவ்வொரு தூணிலும் வெவ்வேறு விலங்கு செதுக்கல்கள் இருப்பதால், ஒவ்வொரு மையமும் வெவ்வேறு குழுக்களுக்கான சந்திப்பு இடமாக இருந்திருக்கலாம்.

சில தொல்பொருள் ஆராய்ச்சியாளர்கள் இது இன்னும் இருண்ட நோக்கத்தைக் கொண்டிருக்கலாம்— பலி சடங்குகள் அல்லது மரண சம்பிரதாயங்கள் —என்று ஊகிக்கின்றனர். கிளாஸ் ஷ்மிட் ஒருமுறை இதை “மரண வழிபாட்டு மையம்” என்றுகூறினார். நரி எலும்புகளும், நரி செதுக்கல்களும் இங்கு அதிகம் காணப்படுவதுஇந்த இடத்தில் நரி ஒரு முக்கிய பங்கு வகித்திருக்கலாம் என்று காட்டுகிறது.

இன்னும் மறைந்திருக்கும் ரகசியங்கள்

கோபெக்லி டெபே இன்னும் முழுமையாக ஆராயப்படவில்லை. இதன் பல பகுதிகள் இன்னும் மண்ணுக்குள் புதைந்துள்ளன. எதிர்கால அகழ்வாய்வுகள் இந்த பழங்கால மனிதர்கள் ஏன் இத்தகைய பிரம்மாண்டமான இடத்தை உருவாக்கினர் என்பதற்கு மேலும் தடயங்களை வழங்கலாம். ஆனால், இப்போதைக்கு, இது ஒரு மர்மமாகவே இருக்கிறது-மனிதர்களின் ஆக்கத்திறன், அறிவு, நம்பிக்கைகள் ஆகியவற்றின் ஒரு நினைவுச்சின்னமாக.