புடவை தொட்டில் பாதுகாப்பானதா? குழந்தைகள் தூக்கமும் மருத்துவ உண்மைகளும்!

கிராமப்புறங்களிலும் ஏன் இன்னும் சில நகர்ப்புற சில குடும்பங்களிலும் புதிதாகப் பிறந்த குழந்தைகளை புடவையால் கட்டப்பட்ட தொட்டிலில் தூங்க வைக்கும் பழக்கம் இன்றும் காணப்படுகிறது.

தாயின் புடவை குழந்தைக்கு பரிச்சயமான வாசனையையும், பாதுகாப்பு உணர்வையும் தரும் என்ற நம்பிக்கையும் உள்ளது. ஆனால், குழந்தையின் தூக்கத்தைப் பொறுத்தவரை பாரம்பரியத்துடன் பாதுகாப்பு வழிமுறைகளையும் இணைத்துப் பார்க்க வேண்டியது அவசியம்.

புடவை தொட்டில் என்பது பல தலைமுறைகளாக சில இந்திய குடும்பங்களில் பயன்படுத்தப்பட்டு வரும் பாரம்பரிய முறையாகும். பொதுவாக, புடவையை உறுதியான இடத்தில் கட்டி, அதன் நடுப்பகுதியில் குழந்தையைப் படுக்க வைப்பார்கள். தாய் பயன் படுத்திய புடவை என்பதால் அதன் வாசனை குழந்தைக்கு நெருக்கமான உணர்வை ஏற்படுத்தும் என்று குடும்பத்தினர் கருதுகின்றனர்.

மென்மையான துணி என்பதால் குழந்தை அமைதியாகத் தூங்கும் என்றும் சிலர் நம்புகின்றனர். ஆனால், புடவைத் தொட்டிலில் தூங்க வைப்பது குழந்தைக்கு உடல்நல நன்மைகளைத் தருகிறது அல்லது நோய்களைத் தடுக்கிறது என்பதற்கான உறுதியான மருத்துவ ஆதாரம் இல்லை.

அதேபோல், தாயின் புடவை வாசனை குழந்தையின் அழுகையை குறைக்கும் அல்லது தூக்கத்தை மேம்படுத்தும் என்ற கூற்றுகளையும் பொதுவான மருத்துவ பரிந்துரையாகக்கூற முடியாது.

குழந்தையின் தூக்கப் பாதுகாப்பு குறித்து அமெரிக்கன் அகாடமி ஆஃப் பீடியாட்ரிக்ஸ் (AAP) வெளியிட்டுள்ள தற்போதைய வழிகாட்டுதல்கள் முக்கியமானவை. ஒரு வயது வரை குழந்தையை ஒவ்வொரு முறையும் முதுகில் படுக்க வைக்கவேண்டும். தூங்கும் இடம் உறுதியான, சமமான மேற்பரப்பாக இருக்கவேண்டும்.

தலையணை, போர்வை, மென்மையான பொம்மைகள், தளர்வான துணிகள் போன்றவை குழந்தையின் தூங்கும் இடத்தில் இருக்கக் கூடாது. இவை மூச்சுத்திணறல் அல்லது சிக்கிக்கொள்ளும் அபாயத்தை அதிகரிக்கக்கூடும்.

புடவைத் தொட்டிலைப் பயன்படுத்தும் குடும்பங்கள், அது குழந்தையின் முகம் அல்லது தலை மூடப்படாத வகையில் இருப்பதையும், துணி தளர்ந்து குழந்தையைச் சுற்றிக் கொள்ளாததையும் உறுதி செய்யவேண்டும். மேலும், குழந்தை வளர்ந்து உருண்டு நகரத்தொடங்கும் காலத்தில் தொட்டில் பாதுகாப்பு குறித்து குழந்தை மருத்துவரின் ஆலோசனையைப் பெறுவது நல்லது.

பழைய தலைமுறையினர் இந்த முறையைப் பயன்படுத்தியதற்குப் பின்னால் பல நடைமுறை காரணங்களும் இருந்திருக்கலாம். வீட்டில் கிடைக்கும் நீளமான துணியைப் பயன்படுத்தி எளிதாகத் தொட்டில் அமைத்துக்கொள்ள முடிந்தது.

குழந்தையை தரையில் இருந்து உயரமாக வைத்திருப்பதால் சில இடங்களில் பூச்சிகள் போன்றவற்றிலிருந்து பாதுகாப்பாக இருக்கும் என்ற எண்ணமும் இருந்திருக்கலாம்.

இருப்பினும், இவை அனைத்தும் சூழ்நிலையைப் பொறுத்த கருத்துகளே தவிர, புடவைத்தொட்டில் குழந்தைக்கு மருத்துவ ரீதியாக சிறந்தது என்பதை நிரூபிக்கும் ஆதாரங்களாகக் கருத முடியாது.

குழந்தையின் தூக்கத்திற்கான இடத்தை அமைக்கும் போது தொட்டில் வலுவாகக் கட்டப்பட்டுள்ளதா, துணி கிழிந்துள்ளதா, குழந்தை வழுக்கி கீழே விழும் வாய்ப்பு உள்ளதா என்பதையும் பெரியவர்கள் தொடர்ந்து கவனிக்கவேண்டும். குழந்தையைத் தூங்க வைக்கும் போது அருகில் கண்காணிப்பது மட்டும் போதாது; தூங்கும் இடமே பாதுகாப்பாக இருப்பது முக்கியம்.

குழந்தையின் வயது, உடல்நிலை, வளர்ச்சி நிலை ஆகியவற்றுக்கு ஏற்ப பாதுகாப்பான தூக்க முறையை குழந்தை மருத்துவரிடம் கேட்டறிவது பெற்றோருக்கு சரியான முடிவெடுக்க உதவும் என்பதும் நினைவில் இருக்கவேண்டும்.

தாய்ப்பால் கொடுக்கும் தாய்மார்கள் உணவும் முக்கியம்!

சாதம், பருப்பு, கீரைகள், காய்கறிகள், பழங்கள், தயிர் போன்ற எளிதில் ஜீரணம் ஆகக்கூடிய சத்தான உணவுகளை அளவோடு எடுத்துக்கொள்ளலாம்.. அதனுடன் சேர்த்து பிரசவ லேகியம், ஜீரணத்திற்கு உதவும் அங்காயப்பொடி இவற்றை எடுத்துக் கொள்ளலாம்..இவை பாரம்பரிய முறைகள். நவீன முறைகள் வந்தாலும் பாட்டி வைத்தியம் பின்பற்றுவதால் தவறு ஏதும் இல்லை. போதுமான தண்ணீரும் குடிக்க வேண்டும்.

ஒரு குறிப்பிட்ட உணவு குழந்தையின் ஜீரணத்தை மேம்படுத்தி தூக்கத்தை வரவழைக்கும் என்று உறுதியாக கூற முடியாது. குழந்தைக்கு தொடர்ந்து வயிறு உப்புசம், ஏப்பம், அதிக அழுகை அல்லது பால் குடித்த பிறகு அசௌகரியம் இருந்தால் உணவைத் தானாகத் தவிர்ப்பதற்கு பதிலாக குழந்தை மருத்துவரிடம் ஆலோசனை பெறுவது பாதுகாப்பானது.

பச்சிளங் குழந்தைகளுக்கு தூக்கம் வர தாயின் அரவணைப்பும் முக்கியம். அந்த அரவணைப்பில் தூங்கும் குழந்தையை புடவைத் தொட்டிலில் அதாவது தூளியில் போட்டால் அம்மாவின் அணைப்பு போல தோன்றும் தூளியில் குழந்தை நன்றாக தூங்கும்.

மெதுவாக தாலாட்டுவது, அரவணைப்பது போன்றவை குழந்தையின் அழுகையை நிறுத்தி அமைதிப்படுத்த உதவி செய்யும். பகல் நேரத்தில் இயல்பான வெளிச்சமும் இரவில் அமைதியான சூழலும் தூக்கப் பழக்கத்தை சீராக உருவாக்க உதவும்.

புடவைத் தொட்டில் (தூளி)என்பது நம் பாரம்பரியத்துடன் தொடர்புடைய ஒரு சுவாரஸ்யமான பழக்கமாக இருக்கலாம். ஆனால், குழந்தையின் தூக்கத்தில் பாரம்பரிய நம்பிக்கைகளைவிட பாதுகாப்பு விதிமுறைகளுக்கே முதன்மை கொடுக்கவேண்டும்.

குழந்தையை தூளியில் தூங்க வைக்கும்போது அருகில் இருக்கும் தாய் அல்லது தந்தை அவ்வப்போது கவனிப்பதும் அவசியம். தூளியை பாதுகாப்பான உயரத்தில் கட்டி குழந்தையின் சுவாசத்திற்கு இடையூறு ஏற்படாதவாறு பார்த்துக் கொள்ள வேண்டும். தூளியை ஆட்டும்போது தாலாட்டுப் பாடுவது அந்த காலத்து வழக்கம்.