வெயிலில் முகம் கறுத்துப் போகிறதா... வீட்டில் உள்ள பொருட்களை வைத்து இந்த 4 கூலிங் பேக் ட்ரை பண்ணுங்க!

சுட்டெரிக்கும் கோடை வெயிலில் சிறிது நேரம் வெளியே சென்று வந்தாலே முகம் கருத்து, அதிகப்படியான எண்ணெய் வடிந்து சோர்வாகவும் டல்லாகவும் மாறிவிடும். இதற்காக ஒவ்வொரு முறையும் பியூட்டி பார்லர் சென்று ரசாயனங்கள் கலந்த கிரீம்களை தடவி ஆயிரக்கணக்கில் செலவு செய்ய வேண்டிய அவசியம் இல்லை. சில எளிய பொருட்களை வைத்தே முகத்தை சில்லென்றும் வைத்துக்கொள்ள முடியும். 

1. வெள்ளரிக்காய் மற்றும் கற்றாழை!

கோடைக்காலத்தில் உடலுக்கு மட்டுமல்ல சருமத்திற்கும் அதிக குளிர்ச்சி தரக்கூடியது வெள்ளரிக்காய். பாதி வெள்ளரிக்காயை நன்றாக துருவி அதன் சாற்றை மட்டும் பிழிந்து எடுத்துக்கொண்டு, அதனுடன் ஒரு ஸ்பூன் கற்றாழை ஜெல்லை நன்றாக கலந்து கொள்ளுங்கள். இந்த கலவையை முகத்தில் தடவி ஒரு இருபது நிமிடம் ரிலாக்ஸ் செய்துவிட்டு பின்னர் குளிர்ந்த நீரில் கழுவினால் முகம் அப்படியே ஜில்லென்று மாறிவிடும். இது சரும வறட்சியை நீக்கி நல்ல ஒரு ஈரப்பதத்தை கொடுக்கும்.

2. முல்தானி மெட்டி மற்றும் பன்னீர்!

வெயிலில் அதிகம் அலைபவர்களுக்கு முகத்தில் அதிக எண்ணெய் வடிந்து தேவையற்ற பருக்கள் வர ஆரம்பிக்கும். இதற்கு முல்தானி மெட்டி ஒரு அருமையான இயற்கை தீர்வு. இரண்டு ஸ்பூன் முல்தானி மெட்டி பொடியுடன் தேவையான அளவு சுத்தமான பன்னீர் அதாவது ரோஸ் வாட்டர் கலந்து பேஸ்ட் போல செய்து முகத்தில் தடவுங்கள். இது முகத்தில் உள்ள அதிகப்படியான எண்ணெயை முழுமையாக உறிஞ்சி எடுத்து முகத்தை பட்டுப்போல மென்மையாக மாற்றிவிடும்.

3. தக்காளி மற்றும் கெட்டித் தயிர்!

வெயிலில் கறுத்துப்போன சருமத்தை மீண்டும் பழைய நிறத்திற்கு கொண்டுவர இந்த சூப்பரான பேக் உதவி செய்யும். ஒரு ஸ்பூன் தக்காளி சாறுடன் ஒரு ஸ்பூன் கெட்டியான தயிர் சேர்த்து முகத்தில் மெதுவாக தடவி மசாஜ் செய்யுங்கள். தயிரில் உள்ள லாக்டிக் அமிலம் மற்றும் தக்காளியில் உள்ள இயற்கையான ப்ளீச்சிங் தன்மை ஆகியவை சருமத்தில் உள்ள சன் டேன் கருமையை ஓட ஓட விரட்டிவிடும். முகம் உடனடியாக பிரகாசமாக மாறுவதை நீங்களே கண்கூடாகப் பார்க்கலாம்.

4. சந்தனம் மற்றும் காய்ச்சாத பால்!

சந்தனம் எப்போதுமே நமது சருமத்திற்கு ஒரு மாபெரும் வரப்பிரசாதம் ஆகும். ஒரு ஸ்பூன் சுத்தமான ஒரிஜினல் சந்தனப் பொடியுடன், காய்ச்சாத பச்சை பாலை சேர்த்து நன்றாக கலந்து முகத்தில் தடவ வேண்டும். இந்த பேக் முழுமையாக காய்ந்தவுடன் மெதுவாக முகத்தை கழுவி பாருங்கள். முகம் பௌர்ணமி நிலவு போல பிரகாசமாக மின்னுவதோடு மட்டுமல்லாமல், கோடை வெயிலால் முகத்தில் ஏற்படும் எரிச்சலும் முழுமையாக குறைந்துவிடும்.

இந்த நான்கு இயற்கை பேக்குகளும் எந்த ஒரு பக்கவிளைவுகளும் தராத பாதுகாப்பான வழிகள் ஆகும். இவற்றை வாரத்திற்கு இரண்டு முறை தொடர்ந்து பயன்படுத்தி வந்தால் சம்மர் வெயிலை பற்றி நீங்கள் இனி கவலையே பட வேண்டாம்.