

பெண்களுக்கு பொதுவாக முகம் அழகாகவும் ஆரோக்கியமாகவும் இருக்க வேண்டும் என்று விரும்பது இயல்பானது, ஏனெனில் பொலிவான சருமம் நமது உடல் ஆரோக்கியத்தின் பிரதிபலிப்பாகக் கருதப்படுகிறது. முறையான சருமப் பராமரிப்பு மற்றும் ஆரோக்கியமான வாழ்க்கை முறை மூலம் முகத்தின் இயற்கையான அழகை எளிதாகப் பாதுகாக்க முடியும்.
அந்த வகையில் தற்போது குளிர்காலத்தில் சருமத்தை முறையாக பராமரிப்பதன் மூலம் முக அழகை ஆரோக்கியமாகவும், அழகாகவும் பாதுகாக்க முடியும்.
பொதுவாக குளிர்காலத்தில் மக்கள் அடிக்கடி வெந்நீரில் குளிப்பதை விரும்புகிறார்கள், ஆனால் தோல் மருத்துவர்கள் இதை ஒரு பெரிய ஆபத்தாகக் கருதுகின்றனர். மிக அதிகச் சூடான நீர் நமது சருமத்தின் இயற்கையான பாதுகாப்பு அடுக்கைச் சேதப்படுத்தும் என்று அவர்கள் கூறுகிறார்கள்.
மேலும் குளிர்காலத்தில் நீண்ட நேரம் சூடான குளியல் அல்லது ஷவர் எடுப்பது ஆறுதலாகத் தோன்றலாம் என்றாலும், இது உங்கள் சருமத்தின் இயற்கையான எண்ணெய்களைப் பாதித்து வறட்சி, அரிப்பு மற்றும் எக்ஸிமா போன்ற தோல் நோய்களை ஏற்படுத்தலாம், இது உங்கள் குளிர்கால தோல் பராமரிப்பு வழக்கத்தை எதிர்மறையாகப் பாதிக்கலாம்.
குளிர்காலத்தில் சருமத்தை ஆரோக்கியமாக வைத்துக்கொள்ள தவிர்க்க வேண்டிய 3 முக்கியத் தவறுகள் கீழே கொடுக்கப்பட்டுள்ளன.
குளிர்காலத்தில் செய்யக் கூடாத 3 தவறுகள் :
1. அதிக சூடான நீரைப் பயன்படுத்துவது :
குளிருக்கு இதமாக இருக்கும் என்பதற்காக முகத்தைக் கழுவும்போது அதிக சூடான நீர் பயன்படுத்துவதையும், சருமத்தை அழுத்தித் தேய்ப்பதையும் அல்லது நீண்ட நேரம் குளிப்பதையும் தவிர்க்க வேண்டும்.
ஏனெனில் அதிக சூடான வெந்நீரில் முகம் கழுவினால் சருமம் நிச்சயமாக வறண்டு போகும். மேலும் சருமத்தில் அரிப்பு, இறுக்கம் மற்றும் செதில் செதிலாகத் தோல் உரிவதை ஏற்படுத்தும். அதற்குப் பதிலாக, வெதுவெதுப்பான நீரை (Lukewarm water) மட்டுமே பயன்படுத்த வேண்டும்.
பொதுவாக அதிக வெப்பம் கொண்ட நீர் சருமத்தின் மேல் அடுக்கில் உள்ள இயற்கையான எண்ணெய்ப்பசை (Sebum) பாதுகாப்பு அடுக்கையும் (Skin barrier) மற்றும் ஈரப்பதத்தை முழுமையாக நீக்கிவிடுவதால் சருமம் இறுக்கமாகவும், செதில் செதிலாகவும் மாறுகிறது.
தொடர்ந்து வெந்நீரைப் பயன்படுத்தும்போது சருமத்தின் நெகிழ்வுத்தன்மை குறைந்து சீக்கிரமே சுருக்கங்கள் வர வாய்ப்புள்ளது.
எண்ணெய் பசை சருமம் கொண்டவர்கள் வெந்நீரில் முகம் கழுவும்போது, இழந்த எண்ணெயை ஈடுகட்ட சருமம் இன்னும் அதிகப்படியான எண்ணெயைச் சுரக்கும். இது முகப்பருக்கள் உருவாகக் காரணமாகலாம்.
பொதுவாக குளிர்காலத்தில் காற்றிலேயே ஈரப்பதம் குறைவாக இருக்கும் நிலையில், சுடுநீரைப் பயன்படுத்துவது சருமப் பிரச்சனைகளை அதிகரிக்கிறது. அதிக சூடான அல்லது மிகவும் குளிர்ந்த நீருக்குப் பதிலாக, மிகக் குறைந்த சூடு கொண்ட வெதுவெதுப்பான நீரில் (Lukewarm water) முகம் கழுவுவதே சிறந்தது. மேலும் இது சருமத்தின் இயற்கையான எண்ணெய்ப் பசையைப் பாதுகாக்கும்.
2. மாய்ஸ்சரைசர் (Moisturizer) பூசத் தாமதிப்பது :
முகம் கழுவிய பிறகு சருமம் முழுமையாகக் காய்ந்து போகும் வரை காத்திருக்கக் கூடாது. சருமம் லேசான ஈரப்பதத்துடன் இருக்கும்போதே (சுமார் 3 நிமிடங்களுக்குள்) மாய்ஸ்சரைசர் பூசினால் மட்டுமே நீர் ஆவியாவதைத் தடுத்து ஈரப்பதத்தைத் தக்கவைக்க முடியும்.
பொதுவாக குளிர்காலத்தில் காற்றில் ஈரப்பதம் குறைவாக இருப்பதால், சருமம் மிக விரைவாக வறண்டு போகும். இதைத் தடுக்க '3-நிமிட விதி' (3-Minute Rule) மிகவும் முக்கியமானது. முகம் கழுவிய பிறகு சருமத் துளைகள் சற்றுத் திறந்திருக்கும். அப்போது சருமத்தில் உள்ள லேசான ஈரப்பதத்தை மாய்ஸ்சரைசர் பூசி மூடிவிடும்போது, சருமத்திலிருந்து நீர் ஆவியாவது (Transepidermal Water Loss) தடுக்கப்படுகிறது.
சருமம் முழுமையாகக் காய்ந்த பிறகு மாய்ஸ்சரைசர் பூசுவதை விட, லேசான ஈரப்பதத்துடன் இருக்கும்போது பூசினால் கிரீம் சருமத்திற்குள் நன்கு ஊடுருவிச் செல்லும்.
குளிர்காலத்திற்கு ஹைலூரோனிக் அமிலம் (Hyaluronic Acid), செராமைடுகள் (Ceramides) அல்லது கிளிசரின் (Glycerin) கொண்ட மாய்ஸ்சரைசர்களைத் தேர்ந்தெடுப்பது கூடுதல் பலன் தரும்.
3. முகத்தை கடுமையான ஃபேஸ் வாஷ் மற்றும் டவலால் தேய்ப்பது :
குளிர்காலத்தில் காற்றின் ஈரப்பதம் குறைவாக இருப்பதால் சருமம் இயல்பாகவே வறண்டு காணப்படும், எனவே மென்மையான பராமரிப்பு அவசியம்.
குளிர்காலத்தில் பொதுவாக சல்பேட் (Sulfates) மற்றும் ஆல்கஹால் கலந்த சோப்புகள் அல்லது அதிக வாசனை திரவியங்கள் கொண்ட சோப்புகளைப் பயன்படுத்துவது, சருமத்தைப் பாதுகாக்கும் இயற்கையான எண்ணெய்ப் பசையை முற்றிலும் நீக்கிவிடுவதுடன் சருமம் இறுக்கமாகவும், அதிக வறட்சியாகவும் மாறும்.
மேலும் செயற்கை வாசனை திரவியங்கள் (Fragrances) வறண்ட சருமத்தில் எரிச்சல், அரிப்பு மற்றும் சிவத்தல் ஆகியவற்றை ஏற்படுத்தும். சல்பேட் மற்றும் வாசனை திரவியங்கள் இல்லாத, கிளிசரின் (Glycerin) அல்லது இயற்கை எண்ணெய்கள் நிறைந்த மாய்ஸ்சரைசிங் சோப்புகளைப் பயன்படுத்துங்கள்.
அதேபோல், முகம் கழுவிய பின் டவலால் அழுத்தித் தேய்க்காமல், மென்மையான பருத்தி அல்லது மைக்ரோஃபைபர் டவலால் லேசாக ஒற்றி எடுக்கவும். சருமத்தில் லேசான ஈரப்பதம் இருக்க வேண்டும். ஏனெனில் டவலால் முகத்தை அழுத்தித் தேய்ப்பதால் சருமத்தின் வெளிப்புறப் பாதுகாப்பு அடுக்கு சேதமடைய வாய்ப்புள்ளது. இது சருமத்தில் நுண்ணிய கீறல்கள் மற்றும் எரிச்சலை உண்டாக்கும். அதேபோல் சருமத்தை முழுமையாக உலர விடாமல், லேசான ஈரப்பதம் இருக்கும்போதே மாய்ஸ்சரைசர் தடவுவது ஈரப்பதத்தைச் சருமத்திற்குள் தக்கவைக்க உதவும்.
குளிர்காலத்தில் லேசான வெதுவெதுப்பான நீரில் குளிப்பதும் முகத்தை கழுவதும் சிறந்தது. அதோடு, வறண்ட தோல் மற்றும் அரிப்பில் இருந்து பாதுகாத்துக் கொள்ள குளித்த பிறகு மாய்ஸ்சரைசர் (Moisturizer) தடவுவது அவசியம்.
முகத்திற்கு மென்மையான, வாசனையற்ற கிளென்சர் (Gentle cleanser) மற்றும் கிளிசரின் அல்லது செராமைடுகள் (Ceramides) நிறைந்த கிரீம்களைப் பயன்படுத்துவது சருமப் பாதுகாப்பு அடுக்கை வலுப்படுத்தும்.