ஊதா நிறத்தில் இருந்த கேரட், ஆரஞ்சு நிறத்தை அடைந்த கதை தெரியுமா?

காய்கறி மார்க்கெட்டுக்கு சென்றால் கேரட் வாங்கும்போது நல்ல பளீர் ஆரஞ்சு நிறத்தில் இருக்கும் கேரட்டைத்தான்  மக்கள் தேடி வாங்குவார்கள். சிலர் ஆரஞ்சு நிற கேரட்டை உபயோகப்படுத்தி ஜூஸ் செய்து அருந்துவார்கள். கேரட்டை தினமும் சாப்பிட்டு வந்தாலும்  உடலுக்கு நிறத்தை அளிக்கும் கண் பார்வையை மேம்படுத்தும் என்கிற நம்பிக்கையும் மக்களுக்கு இருக்கிறது.

ஆனால் பண்டைய காலத்தில் கேரட் ஆரஞ்சு நிறத்தில் இல்லை. ஊதா மற்றும் வெள்ளை நிறத்தில் இருந்தன. மேலும் மஞ்சள் சிவப்பு மற்றும் கருப்பு போன்ற பல்வேறு வண்ணங்களில் வந்தன. ஐயாயிரம் ஆண்டுகளுக்கு முன்பு ஆப்கானிஸ்தான் போன்ற பகுதிகளில் பயிரிடப்பட்ட கேரட்டுகள் முதன்மையாக ஊதா மற்றும் மஞ்சள் நிறத்தில் இருந்தன. வெள்ளை கேரட் பண்டைய காலங்களிலும் பொதுவானதாக இருந்தது.

வண்ண வண்ண கேரட்டுகளின் வரலாறு;

ஊதா; பத்தாம் நூற்றாண்டில் ஆப்கானிஸ்தானில் பயிரிடப்பட்ட கேரட்டின் நிறம் ஊதாவாக இருந்தது. இவற்றில் அந்தோசயினின்கள் இருந்தன. அதனால் அவை கேரட்டுக்கு அடர் ஊதா நிறத்தை அளித்தன.

மஞ்சள்; ஊதா நிற கேரட்டுகளில் ஏற்பட்ட பிறழ்வுகள் மஞ்சள் நிற கேரட்டுகளுக்கு வழி வகுத்தன. அவை ஐரோப்பாவில் அவற்றின் இனிப்பு சுவை மற்றும் சிறந்த சமையல் பண்புகளுக்காக விரும்பப்பட்டன.

வெள்ளை; வெள்ளைக் கேரட்  என்பது மற்றொரு ஆரம்பகால வகையாகும். இது பெரும்பாலும் வோக்கோசு என்று தவறாக கருதப்பட்டது. அவை ஊதா மற்றும் மஞ்சள் வகைகளுடன் சேர்த்து பயிரிடப்பட்டன.

சிவப்பு; சிவப்பு என்ற விவரிக்கப்படும் சில கேரட்டுகள் உண்மையில் ஊதா நிறத்தின் நிழல்களாக இருந்தன. அவை சிவப்பு முட்டைக்கோஸ் அல்லது பீட்ரூட்டுகளைப் போலவே இருந்தன.

கருப்பு; கருப்புக் கேரட் வரலாற்று ரீதியாகவும் வளர்க்கப்பட்டது. இருப்பினும் அவை குறைவாகவே காணப்பட்டன. இந்த நிறங்கள் மரபணு மாற்றங்கள் மற்றும் இயற்கை மாறுபாட்டின் விளைவாகும்.

ஆரஞ்சு நிற கேரட்; ஆரஞ்சு நிற கேரட்டை உருவாக்குவதிலும் பிரபலப்படுத்துவதிலும் டச்சுக்காரர்கள் குறிப்பிடத்தக்க பங்கைக் கொண்டிருந்தனர். காலப்போக்கில் விவசாயிகளால் தேர்ந்தெடுக்கப்பட்ட இனப்பெருக்கம் குறிப்பாக நெதர்லாந்தில் ஆரஞ்சு கேரட்டுகளின் வளர்ச்சிக்கு வழி வகுத்தது. இது அவற்றின் இனிப்பு சுவை மற்றும் அதிக மகசூல் மற்றும் ஊட்டச்சத்து நன்மைகள் காரணமாக விரும்பப்பட்டது.

உலகளாவிய பரவல்; பதினாறாம் நூற்றாண்டில் டச்சு விவசாயிகள் ஆரஞ்சு கேரட்டை பயிரிட்டனர். இது டச்சு சுதந்திர இயக்கத்தின் முக்கிய நபரான ஆரஞ்சு வில்லியம்சை கௌரவிக்கும் விதமாக இருந்தது. அரச குடும்பத்தை கௌரவிக்கும் வகையில் ஆரஞ்சு கேரட் பயிரிடப்பட்டது. டச்சுக்காரர்கள் ஆரஞ்சு கேரட்டை தங்கள் தேசிய அடையாளத்துடன் இணைத்து,  வளர்ந்து வரும் தங்கள் தேசத்தின் அடையாளமாக அவற்றைப் பயன்படுத்தினர்.

ஐரோப்பா முழுவதும் ஆரஞ்சு நிற கேரட்டை விநியோகிப்பதில் மற்றும் உலகளாவிய பரவலுக்கு டச்சு வணிகர்கள் முக்கிய பங்கு வகித்தனர். பிரான்ஸ், ஜெர்மனி மற்றும் இங்கிலாந்து போன்ற நாடுகள் இந்த வகைகளை ஏற்றுக்கொண்டன. அவற்றின் சீரான தன்மையை மற்றும் கண்ணை பறிக்கும் ஆரஞ்சு நிறத்தின் கவர்ச்சி காரணமாக ஆரஞ்சு நிற கேரட்டுகள் தரமான கேரட்டுகள் என்ற நிலைப்பாட்டிற்கு வந்தன.

ஊதா மஞ்சள் போன்ற பிற வகைகளுடன் ஒப்பிடும்போது ஆரஞ்சு நிற கேரட்டுகள் அதன் லேசான மற்றும் ஈரமான கால நிலையில் சிறப்பாக செழித்து வளர்ந்தது. அவற்றின் உயர்ந்த மகசூல் நிலைத்தன்மை போன்றவை விவசாயிகளுக்கு பெரும் ஆர்வமாக அமைந்தன.