வீட்டுத் தோட்டத்தில் சுலபமாக தண்டின் மூலம் புதினா வளர்ப்பது எப்படி?

நமது சமையலறையில் அன்றாடம் பயன்படும் மூலிகைகளில் புதினாவுக்குத் தனி இடமுண்டு. கடைகளில் வாங்கும் புதினாவை விட, நம் வீட்டிலேயே இரசாயனம் இல்லாமல் சுத்தமாக வளர்க்கப்படும் புதினா செடி அதிக நறுமணத்துடனும் புத்துணர்ச்சியடனும் இருக்கும். கடையில் வாங்கி வரும் புதினா தண்டுகளைக் கொண்டே மிக எளிதாக வீட்டில் புதினா செடியை வளர்க்க முடியும். அதைப்பற்றிய விளக்கத்தை இங்கு காண்போம்.

1. ஆரோக்கியமான தண்டுகளைத் தேர்ந்தெடுத்தல்: புதினா செடி வளர்ப்பில் முதல் மற்றும் மிக முக்கியமான படி சரியான தண்டைத் தேர்ந்தெடுப்பதாகும்.

கடையில் வாங்கும் புதினா கட்டுகளிலிருந்து தடிமனான, காயாத, பசுமையான தண்டுகளைத் தேர்ந்தெடுக்க வேண்டும். தண்டின் நீளம் குறைந்தது 4 முதல் 6 அங்குலம் வரை இருக்க வேண்டும். தேர்ந்தெடுக்கப்பட்ட தண்டின் கீழ் பகுதியில் உள்ள இலைகளை மெதுவாக நறுக்கி எடுத்துவிட்டு, நுனியில் மட்டும் 3 முதல் 4 சிறிய இலைகளை விட்டுவைக்க வேண்டும்.

2. புதினா வளர்ப்பு முறையில் தண்ணீரில் வேர் வரவழைக்கும் டெக்னிக்: புதினா தண்டை நேரடியாக மண்ணில் நடுவதற்கு பதிலாக, முதலில் தண்ணீரில் வைத்து வேர் வரவழைப்பது வெற்றி வாய்ப்பை அதிகரிக்கும். ஒரு சிறிய கண்ணாடி டம்ளர் அல்லது பாட்டிலில் சுத்தமான தண்ணீரை ஊற்ற வேண்டும். அதில் தயார் செய்து வைத்துள்ள புதினா தண்டுகளைப் போட வேண்டும். இலைகள் தண்ணீருக்குள் மூழ்காதவாறு பார்த்துக்கொள்வது அவசியம். இந்த பாட்டிலை லேசான சூரியவெளிச்சம் படும் இடத்தில் வைக்க வேண்டும். 3 முதல் 5 நாட்களுக்குள் தண்டின் கணுக்களிலிருந்து புதிய வெள்ளை வேர்கள் வளரத் தொடங்குவதை நீங்கள் காணலாம். 2 நாட்களுக்கு ஒருமுறை தண்ணீரை மாற்ற வேண்டும்.

3. புதினா வளர்ப்பு - செடியை தொட்டியில் வைத்து பராமரிக்கும் எளிய வழிகள்: புதினா செடி செழித்து வளர சரியான மண் கலவையும் தொட்டியும் மிக அவசியம். 50% சாதாரண தோட்டத்து மண், 30% தொழு உரம் அல்லது மண்புழு உரம், 20% தேங்காய் நார் சேர்த்து மண் கலவையைத் தயாரிக்க வேண்டும்.

புதினா செடியின் வேர்கள் ஆழமாகச் செல்வதை விட, பக்கவாட்டில் படர்ந்து வளரும் தன்மை கொண்டவை. எனவே ஆழமான தொட்டியை விட அகலமான தொட்டிகளை தேர்ந்தெடுப்பது சிறந்தது. தொட்டியின் அடியில் அதிகப்படியான நீர் வெளியேற வடிகால் துளைகள் இருப்பதை உறுதி செய்ய வேண்டும்.

4. நடும் முறை மற்றும் பராமரிப்பு: வேர் வந்த தண்டுகளை மண்ணில் நட்டுப் பராமரிக்கும் முறை:

மண்ணில் சிறிய துளையிட்டு, வேர் வந்த புதினா தண்டுகளை ஊன்றி, சுற்றிலும் மண்ணை லேசாக அழுத்தி விட வேண்டும். புதினா செடிக்கு எப்போதும் மண்ணில் லேசான ஈரம் இருக்க வேண்டும். ஆனால் தொட்டியில் நீர் தேங்கக் கூடாது. தினமும் காலையில் லேசாகத் தண்ணீர் தெளித்தால் போதுமானது. புதினா செடிக்கு தினமும் 3 முதல் 4 மணி நேரம் மிதமான சூரிய ஒளி தேவை. அதிகப்படியான வெயில் இருந்தால் இலைகள் கருகக்கூடும் என்பதால் பகுதி நிழல் உள்ள இடத்தில் வைப்பது நல்லது.

5. புதினா வளர்ப்பு செடியை அடர்த்தியாக மாற்றுவதற்கான அறுவடை ரகசியங்கள்: செடி வளரத் தொடங்கியவுடன் அதைத் தொடர்ந்து அறுவடை செய்வதே செடியை மேலும் அடர்த்தியாக வளர்க்கும். செடியின் நுனி இலைகளை அடிக்கடி கிள்ளி எடுத்துப் பயன்படுத்துவதன் மூலம், பக்கவாட்டில் புதிய கிளைகள் அதிக அளவில் தோன்றி செடி புதர் போல அடர்த்தியாக வளரும்.

பூக்கள் பூக்கத் தொடங்கினால் அதை உடனே நறுக்கிவிட வேண்டும்; இல்லையெனில் இலைகளின் நறுமணமும் சுவையும் குறைந்துவிடும்.

வீட்டுத் தோட்டத்தில் புதினா வளர்ப்பது மிகக் குறைந்த செலவில், குறைந்த பராமரிப்பில் அதிக பலன் தரும் ஒரு சிறந்த அனுபவமாகும். இந்த எளிய முறைகளைப் பின்பற்றி உங்கள் வீட்டிலும் பசுமையான புதினா செடியை வளர்த்து புத்துணர்ச்சியான மூலிகையைச் சமையலுக்குப் பயன்படுத்தி மகிழுங்கள்.

சந்தையில் விற்கப்படும் நச்சுத்தன்மை கலந்த கீரைகளுக்கு விடைகொடுத்துவிட்டு, உங்கள் கையாலேயே வளர்த்தெடுத்த நறுமணமிக்க மூலிகையைக் கொண்டு சமையலின் சுவையையும் நறுமணத்தையும் பன்மடங்கு உயர்த்துவதற்கான நல்வாய்ப்பை இந்தக் கட்டுரை வழங்கும்.