வழக்கமான வடை, பஜ்ஜி அலுத்துடுச்சா? மாலை நேரத்திற்கு சுடச்சுட 3 வித்தியாசமான வாழைப்பூ ஸ்நாக்ஸ்!

வாழைப்பூவை வைத்து வழக்கமாக கூட்டு, பொரியல் என்று செய்து சலித்துவிட்டீர்களா? அதே வாழைப்பூவை வைத்து சுவையான, மொறுமொறுப்பான கோலா கட்லெட் செய்து பாருங்கள். வெளியே மொறு மொறுப்பாகவும், உள்ளே மென்மையாகவும் இருக்கும் இந்தக் கட்லெட் மாலை நேர டீ அல்லது காபியுடன் சாப்பிட மிகவும் அருமையாக இருக்கும்.

1. வாழைப்பூ கோலா கட்லெட்

தேவையான பொருட்கள்:

வாழைப்பூ – 50 இதழ்கள்

பொட்டுக்கடலை – 1 கப்

சோம்பு – ½ டீஸ்பூன்

இலவங்கம் – 2

பட்டை – 2 சிறிய துண்டுகள்

காய்ந்த மிளகாய் – 2

இஞ்சிபூண்டு விழுது – 1 டீஸ்பூன்

மல்லித்தழை – சிறிதளவு

பெரிய வெங்காயம் – 1 பொடியாக நறுக்கியது

உப்பு – தேவையான அளவு

தண்ணீர் – சிறிதளவு

எண்ணெய் – பொரிப்பதற்கு தேவையான அளவு

வாழைப்பூ இதழ்களை நன்றாக சுத்தம் செய்து கழுவிக்கொள்ளவும். ஒவ்வொரு இதழின் நடுவிலும் இருக்கும் தடிமனான நரம்பு மற்றும் தேவையற்ற பகுதியை நீக்கிவிட்டு, பொடியாக நறுக்கிக்கொள்ளவும்.

செய்முறை:

மிக்ஸி ஜாரில் பொட்டுக்கடலை, சோம்பு, இலவங்கம், பட்டை, காய்ந்த மிளகாய், இஞ்சிபூண்டு விழுது, சிறிதளவு மல்லித்தழை, உப்பு ஆகியவற்றைச் சேர்த்து நன்றாக அரைத்துக்கொள்ளவும்.

அதில் சுத்தம் செய்து வைத்துள்ள வாழைப்பூவைச் சேர்த்து, தண்ணீர் அதிகம் சேர்க்காமல் கொரகொரப்பாக அரைக்கவும்.

இந்தக் கலவையை ஒரு பாத்திரத்தில் மாற்றி, பொடியாக நறுக்கிய பெரிய வெங்காயம் மற்றும் மல்லித்தழையைச் சேர்த்து நன்றாகப் பிசையவும்.

தேவைப்பட்டால் மட்டும் சிறிதளவு தண்ணீர் தெளித்து, கலவை உதிராமல் கெட்டியாக இருக்கும் பதத்திற்கு பிசைந்து கொள்ளவும். அதிக தண்ணீர் சேர்த்தால் கட்லெட் எண்ணெயில் பிரிந்து போக வாய்ப்பு உள்ளது.

கையில் சிறிதளவு எண்ணெய் தடவி, கலவையை சிறு உருண்டைகளாக எடுத்து தட்டையாக கட்லெட் வடிவில் செய்து வைத்துக் கொள்ளவும்.

தோசைக்கல் அல்லது தவாவில் சிறிது எண்ணெயை சூடாக்கி, தயாரித்து வைத்துள்ள கட்லெட்டுகளை வைத்து மிதமான தீயில் போட்டு பொன்னிறமாகவும் மொறுமொறுப்பாகவும் பொரித்தெடுக்கவும்.

சூடாகப் பரிமாறும்போது புதினா அல்லது கொத்தமல்லி சட்னியுடன் சேர்த்துக் கொடுத்தால், இந்த வாழைப்பூ கோலா கட்லெட்டின் சுவை இன்னும் கூடும்.

வாழைப்பூவில் இருக்கும் ஈரப்பதத்தைப் பொறுத்து தண்ணீரின் அளவு மாறுபடும். எனவே அரைக்கும்போது தண்ணீரை ஒரே நேரத்தில் ஊற்றாமல், தேவையான அளவு மட்டும் தெளித்துச் சேர்க்கவும். உப்பையும் சற்று குறைவாகச் சேர்ப்பது நல்லது. பொரித்த பிறகு சுவை சரியாக இருக்கும்.

2. வாழைப்பூ மசாலா உருண்டை

தேவையான பொருட்கள்:

சுத்தம் செய்த வாழைப்பூ – 2 கப்

கடலைப் பருப்பு – 1 கப்

பெரிய வெங்காயம் – 1

பச்சை மிளகாய் – 2

காய்ந்த மிளகாய் – 2

சோம்பு – 1 டீஸ்பூன்

இஞ்சி – சிறிய துண்டு

பூண்டு – 4 பல்

கருவேப்பிலை – சிறிதளவு

மல்லித்தழை – சிறிதளவு

உப்பு – தேவையான அளவு

எண்ணெய் – பொரிப்பதற்கு தேவையான அளவு

செய்முறை:

கடலைப் பருப்பை ஒரு மணி நேரம் ஊறவைத்து, தண்ணீரை முழுமையாக வடித்துக் கொள்ளவும்.

மிக்ஸியில் ஊறவைத்த கடலைப் பருப்பு, காய்ந்த மிளகாய், பச்சை மிளகாய், சோம்பு, இஞ்சி, பூண்டு ஆகியவற்றைச் சேர்த்து தண்ணீர் விடாமல் கொரகொரப்பாக அரைத்துக் கொள்ளவும்.

அரைத்த கலவையை ஒரு பாத்திரத்தில் மாற்றி, பொடியாக நறுக்கிய வாழைப்பூ, வெங்காயம், கருவேப்பிலை, மல்லித்தழை, உப்பு ஆகியவற்றைச் சேர்த்து நன்றாகப் பிசையவும்.

கலவை சற்று ஈரமாக இருந்தால், சிறிது கடலைப் பருப்பு மாவு சேர்த்து கெட்டியாக்கலாம். பின்னர் சிறிய உருண்டைகளாகப் பிடித்து வைத்துக் கொள்ளவும்.

கடாயில் எண்ணெயை சூடாக்கி, உருண்டைகளை மிதமான தீயில் போட்டு பொன்னிறமாகவும் மொறுமொறுப்பாகவும் பொரித்தெடுக்கவும்.

சூடான வாழைப்பூ மசாலா உருண்டையை தேங்காய் சட்னி அல்லது புதினா சட்னியுடன் பரிமாறலாம். வழக்கமான வடை, பஜ்ஜிக்கு பதிலாக வித்தியாசமான மாலை நேர சிற்றுண்டியாக கொடுக்கலாம்.

3. வாழைப்பூ அடை

தேவையான பொருட்கள்:

சுத்தம் செய்த வாழைப்பூ – 1½ கப்

பச்சரிசி – 1 கப்

துவரம் பருப்பு – ¼ கப்

காய்ந்த மிளகாய் – 3

சோம்பு – ½ டீஸ்பூன்

பெரிய வெங்காயம் – 1

கறிவேப்பிலை – சிறிதளவு

மல்லித்தழை – சிறிதளவு

உப்பு – தேவையான அளவு

எண்ணெய் – தேவையான அளவு

செய்முறை:

பச்சரிசி, துவரம் பருப்பை 2 மணி நேரம் ஊறவைத்து, தண்ணீரை வடித்துக் கொள்ளவும்.

மிக்ஸியில் அரிசி, பருப்பு, காய்ந்த மிளகாய், சோம்பு, உப்பு சேர்த்து சிறிது தண்ணீர் விட்டு சற்று கொரகொரப்பாக அரைத்துக் கொள்ளவும்.

சுத்தம் செய்து பொடியாக நறுக்கிய வாழைப்பூ, வெங்காயம், கறிவேப்பிலை, மல்லித்தழையை மாவுடன் சேர்த்து நன்றாகக் கலக்கவும்.

தோசைக்கல்லை சூடாக்கி, சிறிது எண்ணெய் தடவி, மாவை சிறிய அடைகளாகத் தட்டி இருபுறமும் பொன்னிறமாக வேகவிடவும்.

சூடான வாழைப்பூ அடையை தேங்காய் சட்னி அல்லது காரச் சட்னியுடன் பரிமாறலாம்.

ஒரே கட்டுரையிலேயே வாழைப்பூவைக் கொண்டு கட்லெட், மசாலா உருண்டை, அடை என 3 விதமான மொறுமொறு சிற்றுண்டிகளைச் செய்யும் முழு செய்முறையைப் பெறலாம்.