வாயில் கரையும் 7 கப் பர்பி... 20 நிமிடத்தில் கமகமக்கும் சுவையில்!

இந்தியாவின் பாரம்பரிய மிட்டாய் வகைகளுக்கும், பண்டிகைக்கால கொண்டாட்டங்களுக்கும் ஒரு அசைக்க முடியாத பிணைப்பு உண்டு. அதுவும் தீபாவளி போன்ற விசேஷ நாட்களில் இல்லங்களை நறுமணத்தால் நிரப்பும் இனிப்புகளில், தென்னிந்தியாவின் பெருமைமிகு அடையாளங்களில் ஒன்று ‘7 கப் பர்பி’.

சமையற் கலையில் அதிக அனுபவம் இல்லாதவர்களும், அளவுகளில் எந்தத் தவறும் செய்துவிடக் கூடாது என்று அஞ்சுபவர்களுக்கும் இந்த இனிப்பு ஒரு வரப்பிரசாதமாகும். பெயரிலேயே அளவைக் கொண்டுள்ள இந்த நவீன-பாரம்பரியச் சுவை, மிகக் குறைந்த நேரத்திலும் குறைவான சிரமத்திலும் வாயில் கரையும் மென்மையோடு தயாராகக்கூடியது.

எளிய பொருட்கள், துல்லியமான விகிதங்கள் மற்றும் ஈர்க்கும் சுவை ஆகியவைகளுடன் நமது பாரம்பரிய சமையலறைகளில் தலைமுறை தாண்டி நீடிக்கும் இந்த 7 கப் பர்பியின் செய்முறை பற்றி இங்கு காண்போம்.

தேவையான பொருட்கள்:

கடலை மாவு _ 1 கப்

துருவிய தேங்காய் _ 1 கப்

காய்ச்சிய பால் _ 1 கப்

வெள்ளை சர்க்கரை _ 2 கப்

நெய் _1 கப்

பாதாம், முந்திரி பருப்புகள் பொடித்தது _ 1 கப்

அனைத்து அளவுகளையும் கூட்டினால் மொத்தம் 7 கப் வரும்.

ஏலக்காய் தூள் _ 1 தேக்கரண்டி

உப்பு _1 சிட்டிகை

செய்முறை:

முதலில் பர்பி ஊற்றி, ஆறவைத்து வெட்டுவதற்கு ஏதுவாக ஒரு தட்டு அல்லது ட்ரேயில் சிறிதளவு நெய் தடவி தனியாக வைத்துக் கொள்ளவும்.

ஒரு அகலமான அடிகனமான வாணலியில் முதலில் 2 ஸ்பூன் நெய் சேர்த்து அதில் சலித்து வைத்துள்ள 1 கப் கடலை மாவை சேர்த்து குறைந்த தீயில் வறுக்கவும். மாவு நெய்யுடன் கலந்ததும், 1 கப் துருவிய தேங்காய் சேர்த்து சிறிது நேரம் வறுத்து பின்னர் 2 கப் சர்க்கரை மற்றும் 1 கப் பால் ஊற்றி கட்டிகளின்றி கலக்கவும்.

இந்த நேரத்தில் பொடித்து வைத்த 1கப் பாதாம், முந்திரி பவுடரை சேர்க்கவும். பின்னர் 2 ஸ்பூன் நெய் ஊற்றி கிளறி தண்ணீர் வற்றி வரும்போது மேலும் 2 ஸ்பூன் நெய் சேர்த்து கரண்டியைக் கொண்டு நன்றாகக் கலந்து கொள்ளவும். அடுப்பை மிதமான தீயில் வைத்து தொடர்ச்சியாகக் கைவிடாமல் கிளறிக்கொண்டே இருக்க வேண்டும்.

சர்க்கரை உருகி, கலவை முழுவதும் நன்றாகக் கொதிக்க ஆரம்பிக்கும். அப்போது நெய் முழுவதையும் ஊற்றி கிளறவும். கலவை கெட்டியாகத் தொடங்கி, வாணலியின் ஓரங்களில் நெய் பிரிய ஆரம்பிக்கும். கலவை நுரைத்து பொங்கி வரும்போது, அதில் ஏலக்காய் தூள் மற்றும் வறுத்த முந்திரியைச் சேர்க்கவும்.

கலவை வாணலியில் ஒட்டாமல் ஒன்று சேர்ந்து, பந்து போல வரும். அந்தப் பதத்திற்கு வந்தவுடன் அடுப்பை அணைத்து விடவும். (இது தோராயமாக 15 முதல் 20 நிமிடங்கள் வரை எடுக்கும். ரொம்பவும் இறுக விடக்கூடாது, ஆறியவுடன் இன்னும் கெட்டியாகும்). பதம் சரியாக வந்தவுடன், உடனடியாக நெய் தடவி வைத்துள்ள தட்டிற்கு மாற்றி சமமாகப் பரப்பி விடவும்.

இது சற்று ஆறிய பிறகு கத்தியைக்கொண்டு உங்களுக்குப் பிடித்தமான வடிவத்தில் (சதுரமாகவோ அல்லது டைமண்ட் வடிவிலோ) கோடுகள் போட்டுக் கொள்ளவும். முழுமையாக ஆறிய பிறகு, துண்டுகளைத் தனித்தனியாகப் பிரித்து எடுக்கலாம். மிகவும் சுவையான, வாயில் கரையும் 7 கப் பர்பி இப்போது தயார்! இந்த தீபாவளிக்கு உங்கள் இல்லத்தில் செய்து மகிழுங்கள்.

அளவுகளில் தவறு நேர்ந்துவிடுமோ என்ற அச்சமின்றி, சமையலறையில் முதல்முறை இறங்குபவர்களும் கூட நாவல் ஊறும் சுவையில் 7 கப் பர்பியை துல்லியமாக உருவாக்கக் கற்றுக்கொள்வீர்கள்.