பாகற்காய் கசப்பை முற்றிலுமாக நீக்க பாட்டி சொன்ன 5 எளிய ரகசிய வழிகள்!

பாகற்காய் நன்மைகள்:

காய்கறிகளிலேயே நாம் வெறுக்கும் ஒரு காயாக இருக்கிறது பாகற்காய் காரணம் அதன் கசப்புத்தன்மை ஆனால் இதில் உள்ள நன்மைகள் தெரிந்து விட்டால் இதை ஒதுக்குபவர்கள் இருக்கவே மாட்டார்கள் என்பதுதான் உண்மை. இங்கு பாகற்காய் பற்றிய சில மருத்துவ தகவல்களையும் அதன் கசப்புத் தன்மையை நீக்கும் 5 டிப்ஸ்களையும் காண்போம்.

தமிழில் பாகற்காய் என்பது கசப்பு வெள்ளரிக்காய், பால்சம்-பேரிக்காய், கசப்பு ஆப்பிள் அல்லது கசப்பு பூசணிக்காய் என பல பெயர்களில் அழைக்கப்படுகிறது. இது இந்தியாவில் கரேலா ( ஹிந்தி), ஜப்பானில் நிகௌரி, ஒகினாவாவில் கோயா, பிலிப்பைன்ஸில் அம்பலாயா மற்றும் சீனா முழுவதும் கு-குவா என்றும் அழைக்கப் படுகிறது.

இது கிழக்கு இந்தியா அல்லது தெற்கு சீனாவில் தோன்றியிருக்கலாம் என கருதப்படுகிறது. இது அதிக சூரிய ஒளி மற்றும் சீரான நீர் வசதியுடன் கூடிய வெப்பமான, ஈரப்பதமான காலநிலையில் வளரும் கொடி வகையாகும். இன்று, ஆசியா முழுவதும் உள்ள வயல்களில் பாகற்காய் வளர்வதைக் காணலாம், இருப்பினும் இது கரீபியன் மற்றும் தென் அமெரிக்காவிலும் பிரபலமாகியுள்ளது.

பச்சை நிறத் தோலையும், வெண்மையான சதையையும் , விதையையும் கொண்ட பாகற்காயில் பல வகைகள் உள்ளன, ஆனால் சீனப் பாகற்காய் மற்றும் இந்தியப் பாகற்காய் ஆகிய இரண்டுமே மிகவும் பொதுவானவையாக உள்ளது. சீன வகை, சுருங்கிய, மேடுபள்ளமான தோலுடன் கூடிய வெளிர் பச்சை நிற வெள்ளரிக்காயை மிகவும் ஒத்திருக்கிறது.

இந்திய வகை, குறுகிய, கூர்மையான முனைகளையும், அதன் மேற்பரப்பு முழுவதும் கூர்மையான, கோண வடிவ வரிகளையும் கொண்டுள்ளது. இந்த வகைகளுக்கு இடையிலான வேறுபாடுகள் பெரும்பாலும் தோற்றத்தில் மட்டுமே உள்ளன, மேலும் இரண்டுமே ஒரே மாதிரியான சுவையையும் ஆரோக்கிய நன்மைகளையும் வழங்குகின்றன.

அதேபோல் பாகற்காய்கள் முதிர்ச்சியடையாத நிலையில் அறுவடை செய்யப்படுவதால் அவை பச்சை முதல் பச்சை-மஞ்சள் நிறத்தில் காணப்படுகின்றன. அவை முழுமையாக முதிர்ச்சியடையும்போது வெளிர் ஆரஞ்சு நிறமாக மாறுகின்றன, ஆனால் அந்த நிலையில் அவை தங்களின் ஊட்டச்சத்து மதிப்பில் பெரும்பகுதியையும் இழக்கின்றன.

பாகற்காயில் வைட்டமின் ஏ, வைட்டமின் சி, கால்சியம், இரும்பு, தயாமின் (பி1), ரிபோஃப்ளேவின் (பி2), நியாசின் (பி3), ஃபோலேட் (பி9), பொட்டாசியம், துத்தநாகம், பாஸ்பரஸ், மெக்னீசியம் உள்ளிட்ட பல நன்மை தரும் வைட்டமின்களும் கனிமங்களும் அடங்கியுள்ளன:

குறிப்பாக ஆன்டிஆக்ஸிடன்ட்கள் , ஃபிளாவனாய்டுகள் மற்றும் பிற பாலிஃபீனால் சேர்மங்கள் நிறைந்த ஆதாரமாக இருப்பதால் , பாகற்காய் பலவிதமான உடல்நலப் பிரச்னைகளுக்கான அபாயங்களைக் குறைக்க உதவக்கூடும்.

பாகற்காயில் நிறைந்துள்ள பாலிஃபீனால்கள் எனும் சேர்மங்கள் உடலில் ஏற்படும் அழற்சியைக் குறைக்கும் திறனுக்காக அறியப்படுகின்றன.

பாகற்காயில் உள்ள குர்குபிடசின் (Cucurbitacin) என்ற வேதிப்பொருள் மற்றும் அதில் உள்ள சப்போனின்கள் (Saponins), டெர்பெனாய்டுகள் (Terpenoids) போன்ற பயோஆக்டிவ் சேர்மங்கள்தான் அதன் கசப்புத் தன்மைக்கு முக்கியக் காரணமாகும்.

ஆனால் நீரிழிவு நோயாளிகளுக்கு இரத்த சர்க்கரை அளவைக் குறைப்பதில் பாகற்காய் முக்கிய பங்கு வகிக்கக்கூடும் . பாகற்காயில் உள்ள சப்போனின்கள் மற்றும் டெர்பீனாய்டுகள், இரத்தத்தில் இருந்து செல்களுக்கு குளுக்கோஸைக் கொண்டு செல்ல உதவுவதோடு, உங்கள் கல்லீரல் மற்றும் தசைகள் குளுக்கோஸை சிறப்பாகச் செயலாக்கி சேமிக்கவும் உதவுவதாக கூறப்படுகிறது.

ஒரு பெரிய பாகற்காயில் உள்ள சத்துகளாக நிபுணர்கள் குறிப்பிட்டவை இவை -

கலோரிகள்: 21

புரதம் : 1 கிராம்

கொழுப்பு: 0 கிலோ

கார்போஹைட்ரேட்டுகள்: 5 கலோரிகள்

நார்ச்சத்து : 3 கிராம்

சர்க்கரை: 0 கிராம்

கொலஸ்ட்ரால்: 0 மில்லிகிராம்

சோடியம்: 6 மில்லிகிராம்.

பாகற்காயில் பல முக்கியமான ஆன்டிஆக்ஸிடன்ட்களும் நிறைந்துள்ளன. உண்மையில், அரை கப் புதிய பாகற்காய் பொதுவாக ஒருவருக்கு டயட்டில் பரிந்துரைக்கப்பட்ட தினசரி வைட்டமின் சி உட்கொள்ளல் தேவையில் சுமார் 43%-ஐ வழங்குகிறது என்றும் காய் பழுக்காமல் இருந்தால் அதில் வைட்டமின் சி-யின் அளவு அதிகமாக இருக்கும் என்றும் ஊட்டச்சத்து நிபுணர்கள் கூறுகின்றனர்.

இதில் பலவிதமான சத்தான மற்றும் சுவையான உணவுகளைச் செய்யலாம். மசாலா தடவி ஆவியில் வேகவைக்கலாம், கொதிக்கவைக்கலாம், வதக்கலாம், வறுக்கலாம், ஊறுகாய் போடலாம், உள்ளே மசாலா நிரப்பலாம் அல்லது குழம்பு வைக்கலாம்.

சிலர் பாகற்காயை இறாலுடன் தேங்காய்ப் பால் மற்றும் மசாலாப் பொருட்களில் சேர்த்து சமைப்பார்கள். அரைத்த பாகற்காய், எலுமிச்சை மற்றும் தேன் ஆகியவற்றைக் கொண்டு ஒரு ஆரோக்கியமான பானத்தைத் தயாரித்து வடிகட்டலாம் அல்லது ஸ்மூத்தியாகவும் பருகுபவர்கள் உண்டு.

சரி, சமையலில் பாகற்காய் பயன்படுத்தும்போது இந்த கசப்புத்தன்மையை எப்படி நீக்குவது? நம்ம பாட்டி சொன்ன டிப்ஸ்கள் இதோ...

பாகற்காய்களை வாங்கியதும் நன்றாக கழுவி மெலிதான வட்டங்களாக நறுக்கி அதில் நடுவில் இருக்கும் விதைகளையும் வெண்மை நிற சதையையும் நீக்கிவிட்டு அதை சுத்தமான தரையில் அல்லது தட்டில் வைத்து விட்டு சிறிது நேரம் அப்படியே விட்டு பிறகு எடுத்து சமைக்கலாம். மெலிதாக நறுக்கும்போது அதன் கசப்பு தன்மை சற்று மட்டுப்படும் என்பார்கள். அதேபோல் அதில் உள்ள கசப்புதன்மை தரும் விதைகளை நீக்குவதாலும் கசப்பு நீங்கும்.

பாகற்காய்களை நன்கு கழுவிவிட்டு நறுக்கி புளித்த மோரில் சிறிது உப்பு போட்டு தேவையான எலுமிச்சை சாறு சேர்த்து அதில் பாகற்காய்களை மூழ்க வைத்து பின் எடுத்து நன்கு பிழிந்துவிட்டு சமைக்கும்போது கசப்புத்தன்மை நீங்கும்.

காரணம் தயிரில் உள்ள லாக்டிக் அமிலம் கசப்பை உறிஞ்சும் தன்மைகொண்டது. சிலர் கசப்பு நீங்க அரிசி களைந்த நீரிலும் பாகற்காய்களை போடுவார்கள். கொதிக்கும் நீரில் அரிந்த காய்களைப் போட்டு வடிகட்டி பயன்படுத்துவதும் உண்டு.

பாகற்காய்களை சமைக்கும்போது சமைப்பதற்கு முன் நறுக்கி வைத்துவிட்டு பின் உப்பு மஞ்சள் தூள் சேர்த்த நீரில் ஊறவிட்டு நன்கு பிழிந்துவிட்டு சமைக்கும்போது உருளைக்கிழங்கு , பச்சை பயிறு, கொண்டைக்கடலை போன்ற பிற சத்தான பொருள்களுடன் சேர்க்கும்போது பாகற்காய் கசப்பு நிச்சயம் நீங்கும். அதேபோல் சிறிது எண்ணெயை தாராளமாக ஊற்றி நன்கு வதக்குவதும் இயற்கையான இனிப்பு உள்ள வெங்காயத்தை அதிகம் சேர்ப்பதும் கசப்பை மட்டுப்படுத்தும்.

பாகற்காயை சமைக்கும்போது அதன் மேற்பரப்பு தோலை நீக்கிவிடுவதன் மூலம் அதன் கசப்பை குறைக்கலாம். ஒரு தோலுரிப்பு கருவியின் மூலம் எளிதாக இதை செய்யலாம். ஏனெனில் கசப்பான சேர்மங்கள் அதன் மேற்புறத்தில் அதிகமாக படிந்திருக்கும் என்பதால் தோலை மெலிதாக நீக்குவதன் மூலம் கசப்பு நீங்கிவிடும். ஆனால் தோல் சத்து வீணாகிவிடும் வாய்ப்பு இதில் உள்ளது.

கசப்பான சாறுகளை வெளியே இழுக்க உப்பு எப்போதும் உதவி செய்கிறது. எனவே பாகற்காயை துண்டுகளாக நறுக்கி விதைகளை நீக்கிய பிறகு உப்பில் ஒவ்வொரு துண்டுகளையும் தோய்க்க வேண்டும். பிறகு இந்த உப்பு தோய்த்த துண்டுகளை ஒரு பெளலிற்கு மாற்றி 20-30 நிமிடங்கள் சமைப்பதற்கு முன்பு தயாராக வைக்க வேண்டும்.

மேலும் சமைக்கும்போது புளிப்பு மற்றும் வெல்லம் சேர்த்தால் கசப்பு தெரியாது. காரணம் குழம்பு அல்லது பொரியலில் சிறிதளவு வெல்லம்/சர்க்கரை சேர்ப்பது கசப்பை சமநிலைப்படுத்தும்.

இனி பாகற்காயை ஒதுக்க மாட்டீர்கள்தானே?