சுடச்சுட சாதமும் நல்லெண்ணெயும்... அசல் செட்டிநாடு சுவையில் பச்சை மாங்காய் வத்தக்குழம்பு!

மாங்காயை வைத்து நாம் இதுவரை ஊறுகாய் அல்லது பச்சடி செய்திருப்போம். ஆனால், பாரம்பரியமான காரசாரமான செட்டிநாடு மசாலாக்களுடன், மாங்காயின் லேசான புளிப்பும், வத்தலின் கசப்பும் சேர்த்து வைக்கப்படும் 'மாங்காய் வத்தக்குழம்பு' சாப்பிட்டிருக்கிறீர்களா? 

செட்டிநாடு சமையலுக்கே உரிய அந்த வறுத்து அரைத்த மசாலாவின் வாசனையும், தாராளமாக ஊற்றப்படும் நல்லெண்ணெயும் சேர்ந்து, இந்த வத்தக்குழம்பை ஒரு தேவாமிர்தமாக மாற்றிவிடும். சுடச்சுட சாதத்தில் இதை ஊற்றிப் பிசைந்து சாப்பிட்டால், இரண்டு தட்டு சாதம் உள்ளே போவதே தெரியாது. 

இந்த சுவையான செட்டிநாடு மாங்காய் வத்தக்குழம்பை வீட்டில் எப்படிச் செய்வது என்று இந்தப் பதிவில் பார்ப்போம்.

தேவையான பொருட்கள்:

• ஒட்டு மாங்காய் அல்லது கிளி மூக்கு மாங்காய் - 1 

• சுண்டைக்காய் அல்லது மணத்தக்காளி வத்தல் - 2 டேபிள் ஸ்பூன்

• சின்ன வெங்காயம் - 15 

• பூண்டு - 15 பற்கள்

• தக்காளி - 1 

• புளி - ஒரு பெரிய எலுமிச்சை அளவு

• மஞ்சள் தூள் - 1/2 டீஸ்பூன்

• நல்லெண்ணெய் - 4 டேபிள் ஸ்பூன்

• கடுகு, வெந்தயம் - தலா 1/2 டீஸ்பூன்

• கறிவேப்பிலை - சிறிதளவு

• வெல்லம் - 1 சிறிய துண்டு

• உப்பு - தேவையான அளவு

செட்டிநாடு மசாலா:

• மல்லி - 2 டேபிள் ஸ்பூன்

• கடலைப்பருப்பு, உளுத்தம்பருப்பு - தலா 1 டீஸ்பூன்

• காய்ந்த மிளகாய் - 6

• சீரகம், மிளகு - தலா 1 டீஸ்பூன்

• துருவிய தேங்காய் - 3 டேபிள் ஸ்பூன்

செய்முறை! 

இந்தக் குழம்பின் முழு சுவையே நாம் அரைக்கும் மசாலாவில்தான் இருக்கிறது. அடுப்பில் ஒரு கடாயை வைத்து ஒரு ஸ்பூன் எண்ணெய் விட்டு, தேங்காயைத் தவிர வறுக்கக் கொடுத்துள்ள பொருட்களை மிதமான தீயில் பொன்னிறமாக வறுக்கவும்.

கடைசியாகத் தேங்காய் துருவலைச் சேர்த்து லேசாக வறுத்து அடுப்பை அணைத்துவிடவும். இவை அனைத்தும் ஆறியதும், மிக்ஸியில் போட்டுச் சிறிது தண்ணீர் ஊற்றி நைஸான விழுதாக அரைத்து வைத்துக்கொள்ளுங்கள்.

ஒரு மண்சட்டி அல்லது அடிகனமான கடாயில் தாராளமாக நல்லெண்ணெய் ஊற்றுங்கள். எண்ணெய் காய்ந்ததும் கடுகு, வெந்தயம், கறிவேப்பிலை தாளிக்கவும். பின்னர், எடுத்து வைத்துள்ள வத்தலைச் சேர்த்து அது கருகிவிடாமல் லேசாக வறுபட்டதும், முழு சின்ன வெங்காயம் மற்றும் பூண்டு பற்களைச் சேர்த்து வதக்குங்கள். 

வெங்காயம் கண்ணாடிப் பதத்திற்கு வந்ததும், நறுக்கிய தக்காளி மற்றும் மாங்காய் துண்டுகளைச் சேர்த்து ஒரு நிமிடம் நன்றாக வதக்க வேண்டும். மாங்காய் எண்ணெயிலேயே லேசாகச் சுருண்டு வரும்.

மாங்காய் பாதி வதங்கியதும், கரைத்து வைத்துள்ள புளித்தண்ணீரை ஊற்றி, மஞ்சள் தூள் மற்றும் தேவையான அளவு உப்பு சேர்த்து நன்றாகக் கொதிக்க விடுங்கள். புளியின் பச்சை வாசனை முழுமையாகப் போன பிறகு, நாம் வறுத்து அரைத்து வைத்துள்ள செட்டிநாடு மசாலா விழுதைக் குழம்பில் சேர்த்துக் கலக்குங்கள். குழம்பு சற்று கெட்டியாகத் தொடங்கும். 

அடுப்பை 'சிம்'மில் வைத்துவிட்டு, ஒரு மூடியால் மூடி 10 நிமிடங்கள் வரை பொறுமையாகக் கொதிக்க விடுங்கள். மாங்காய் நன்றாக வெந்து, குழம்பின் ஓரங்களில் எண்ணெய் பிரிந்து மிதந்து வரும். இதுதான் சரியான பக்குவம்.

குழம்பு நன்கு சுண்டி வந்ததும், அந்தச் சிறிய வெல்லத் துண்டைச் சேர்த்துக் கலந்து ஒரு நிமிடம் கழித்து அடுப்பை அணைத்துவிட்டால், கமகமக்கும் செட்டிநாடு மாங்காய் வத்தக்குழம்பு தயார். 

இந்த கோடையில் மாங்காய் சீசனுக்கு ஏற்ற இந்த அசத்தலான ரெசிபியை நீங்களும் நிச்சயம் முயற்சி செய்து பாருங்கள்.