பஞ்சாப் போகாமலே பஞ்சாபி தாபா ஃபீல்! வீட்டிலேயே செய்யலாம் 'சோலே பத்வாரா' - சுவை சும்மா அள்ளும்!

சாதாரண பூரி மசாலாவையே கொஞ்சம் ஸ்டைலாக, ஒரு வட இந்தியப் பாணியில் மாற்றினால் எப்படி இருக்கும்? அதுதான் இந்த சோலே பூரி (Chole Bhature). ஹோட்டலில் பந்து போல உப்பி வரும் அந்தப் பூரியையும், கருப்பு நிறத்தில் கமகமக்கும் அந்த கொண்டைக்கடலை மசாலாவையும் கண்டாலே எச்சில் ஊறும். ஈஸ்ட் இல்லாமல், நம் வீட்டில் இருக்கும் தயிர் மற்றும் சோடா உப்பை வைத்தே அதே பந்து போன்ற பூரியை வரவழைக்க முடியும்.

தேவையான பொருட்கள்:

சென்னா மசாலா செய்ய:

• வெள்ளை கொண்டைக்கடலை - 1 கப் 

• தேயிலை - 1 டீஸ்பூன்

• வெங்காயம் - 2

• தக்காளி - 3

• இஞ்சி பூண்டு விழுது - 1 டேபிள் ஸ்பூன்

• சோலே மசாலா பவுடர் - 2 டீஸ்பூன்

• மிளகாய்த்தூள் - 1 டீஸ்பூன்

• மல்லித்தூள் - 1 டீஸ்பூன்

• சீரகத்தூள் - ½ டீஸ்பூன்

• கஸ்தூரி மேத்தி - சிறிதளவு

• எண்ணெய்/வெண்ணெய் - தேவையான அளவு

• உப்பு - தேவைக்கேற்ப.

பூரி மாவு செய்ய:

• மைதா மாவு - 2 கப்

• ரவை - 2 டேபிள் ஸ்பூன் 

• கெட்டித் தயிர் - ½ கப்

• சர்க்கரை - ½ டீஸ்பூன்

• பேக்கிங் பவுடர் - ½ டீஸ்பூன்

• பேக்கிங் சோடா - ¼ டீஸ்பூன்

• உப்பு - தேவைக்கேற்ப

• எண்ணெய் - பொரிக்க.

செய்முறை: 

முதலில் நாம் பூரிக்கான மாவைப் பிசைந்து வைத்துவிட வேண்டும், ஏனென்றால் அது குறைந்தது 2 மணி நேரமாவது ஊறவேண்டும். ஒரு பெரிய பாத்திரத்தில் மைதா, ரவை, உப்பு, சர்க்கரை, பேக்கிங் பவுடர் மற்றும் பேக்கிங் சோடாவைச் சேர்த்து நன்கு கலக்கவும். பின்னர் நடுவில் ஒரு குழி செய்து, அதில் தயிரை ஊற்றவும். 

தயிருடன் மாவை மெதுவாகக் கலக்கவும். தேவைப் பட்டால் மட்டும் சிறிது சிறிதாகத் தண்ணீர் தெளித்து, சப்பாத்தி மாவை விட சற்று மென்மையாகப் பிசையவும். கடைசியாக 1 ஸ்பூன் எண்ணெய் தடவி, ஒரு ஈரத் துணியால் மூடி குறைந்தது 2 மணி நேரம் ஊறவிடவும். மாவு எவ்வளவு நேரம் ஊறுகிறதோ, அவ்வளவு தூரம் பூரி "புஸ்"ஸென்று வரும்.

அடுத்ததாக, சோலே மசாலாவைத் தயார் செய்யலாம். இரவு முழுவதும் ஊறவைத்த கொண்டைக்கடலையை குக்கரில் போடவும். இதோடு உப்பு, தண்ணீர் மற்றும் ஒரு முக்கியமான சீக்ரெட் பொருளைச் சேர்க்கவேண்டும். அதுதான் Tea Bag. ஒரு சிறிய வெள்ளைத் துணியில் டீ தூளைக் கட்டி உள்ளே போடவும்.

இதுதான் ஹோட்டலில் கிடைக்கும் அந்த கருப்பு நிறத்தையும், ஒருவித துவர்ப்புச் சுவையையும் கொண்டைக்கடலைக்குத் தரும். இதோடு பட்டை, கிராம்பு, ஏலக்காய் சேர்த்து 5 முதல் 6 விசில் வரும் வரை நன்கு வேகவைக்கவும். வெந்த பிறகு டீ பையை எடுத்து வீசிவிடவும்.

இப்போது கிரேவி செய்ய, கடாயில் எண்ணெய் ஊற்றி சீரகம் தாளிக்கவும். பின்னர் பொடியாக நறுக்கிய வெங்காயத்தைச் சேர்த்து பொன்னிறமாக வதக்கவும். பிறகு இஞ்சி பூண்டு விழுது சேர்த்து பச்சை வாசனை போக வதக்கவும். 

இப்போது அரைத்து வைத்துள்ள தக்காளி விழுதை ஊற்றி, எண்ணெய் பிரியும் வரை வதக்கவும். அடுத்து மிளகாய்த்தூள், மல்லித்தூள், சோலே மசாலா மற்றும் அனார்தனா பொடி சேர்த்து நன்கு கிளறவும்.

மசாலா தயாரானதும், வேகவைத்த கொண்டைக்கடலையைத் தண்ணீரோடு சேர்க்கவும். கிரேவி சற்று கெட்டியாக வர, கரண்டியால் ஒரு சில கொண்டைக்கடலைகளை மட்டும் மசித்து விடவும். 

கடைசியாக கஸ்தூரி மேத்தியை கசக்கித் தூவி, ஒரு கொதி வந்ததும் இறக்கவும். மேலே ஒரு ஸ்பூன் வெண்ணெய் மற்றும் நறுக்கிய இஞ்சித் துண்டுகளைப் போட்டால், வீடே மணக்கும்.

கடைசியாக, ஊறிய பூரி மாவை எடுத்து, மீண்டும் ஒருமுறை பிசைந்து, பெரிய உருண்டைகளாக உருட்டவும். இதைச் சப்பாத்தி போல மெல்லியதாக இல்லாமல், சற்றுத் தடிமனாக உருட்ட வேண்டும். கடாயில் எண்ணெய் நன்கு சூடாக இருக்க வேண்டும். 

உருட்டிய பூரியை எண்ணெயில் போட்டதும், கரண்டியால் லேசாக அழுத்தினால், அது பந்துபோல எழும்பி வரும். இரண்டு பக்கமும் பொன்னிறமானதும் எடுக்கவும்.

உப்பலான சூடான பூரியும், காரசாரமான கருப்பு சோலே மசாலாவும் தயார். இதோடு பொடியாக நறுக்கிய வெங்காயம் மற்றும் எலுமிச்சைத் துண்டுகளை வைத்துப் பரிமாறினால், பஞ்சாபி தாபாவிற்கே சென்ற உணர்வு கிடைக்கும்.