சுவை அள்ளும், நாக்கு துள்ளும் ‘தேங்காய் பால் புலாவ்’ செய்முறை! 

தென்னிந்தியாவில், குறிப்பாக தமிழகத்தில், அரிசி சார்ந்த உணவுகளுக்கு தனிச் சிறப்பு உண்டு. அந்த வகையில் தேங்காய் பால் பயன்படுத்தி செய்யப்படும் புலாவ் உண்மையிலேயே ஒரு சுவையான உணவுதான். இதில் தேங்காய் மணமும், அரிசியின் மென்மையும் கலந்து நம் சுவை நரம்புகளை நடனமாடச் செய்யும். இதன் காரணமாகவே இந்த உணவு பண்டிகை நாட்களிலும், சிறப்பு நிகழ்வுகளிலும் தயாரிக்கப்படுகிறது. இந்தப் பதிவில் தேங்காய்ப் பால் புலாவை எப்படி சுவையாக செய்வது என்பதைப் பற்றி பார்க்கலாம். 

தேங்காய் பால் புலாவிற்குத் தேவையான பொருட்கள்:

• பாஸ்மதி அரிசி - 1 கப்

• தேங்காய்ப் பால் - 2 1/2 கப்

• தக்காளி - 2 (பொடியாக நறுக்கியது)

• பச்சை மிளகாய் - 2 (நீளவாக்கில் நறுக்கியது)

• கேரட் - 1 கப் (துண்டுகளாக நறுக்கப்பட்டது)

• பச்சைப் பட்டாணி - 1/4 கப்

• இஞ்சி-பூண்டு விழுது - 1 ஸ்பூன்

• நெய் - 1 டேபிள் ஸ்பூன்

• எண்ணெய் - 4 டேபிள் ஸ்பூன்

• மிளகாய்தூள் - 1 ஸ்பூன்

• சீரகம் - 1/2 ஸ்பூன்

• முந்திரி துண்டுகள் - உடைத்தது

• உப்பு - தேவையான அளவு

செய்முறை:

முதலில் பாஸ்மதி அரிசியை கழுவி 20 நிமிடங்கள் தண்ணீரில் ஊற வைக்கவும். பின்னர், ஒரு பாத்திரத்தில் தேங்காய் பால் ஊற்றி கொதிக்க வைத்து, அதில் ஊற வைத்து அரிசியை சேர்த்து, உப்பு சேர்த்து வேக வைக்கவும். அரிசி உதிரியாக வேகும் வரை வேகவைத்து தனியாக எடுத்து வைக்கவும். 

இப்போது ஒரு வாணலியில் எண்ணெய் ஊற்றி சூடானதும், சீரகம், இஞ்சி பூண்டு விழுது, பச்சை மிளகாய், கேரட், பட்டாணி ஆகியவற்றை சேர்த்து வதக்கவும். பின்னர், தக்காளி சேர்த்து அது நன்கு வேகும் வரை வதக்கி, மிளகாய்த்தூள் சேர்த்து கிளறவும்.‌ 

வேகவைத்த அரிசியை இந்த கலவையில் சேர்த்து நன்றாக கிளறவும். இறுதியாக முந்திரியை வறுத்து புலாவின் மேல் தூவினால் சூப்பரான சுவையில் தேங்காய்ப் பால் புலாவ் தயார். 

தேங்காய் பாலின் இயற்கையான இனிப்பு புலாவிற்கு ஒரு தனித்துவமான சுவையை அளிக்கிறது. தேங்காய் பாலில் வைட்டமின்கள், தாதுக்கள் நிறைந்துள்ளதால் இது உடலுக்குத் தேவையான ஆற்றலை அளிக்கிறது. இந்தப் புலாவை எளிமையாக வீட்டிலேயே தயாரிக்கலாம். இதை தனியாக ஒரு உணவாகவோ அல்லது பிற உணவுகளுடனோ சேர்த்து சாப்பிட சுவையாக இருக்கும். இந்த அட்டகாசமான ரெசிபியை இன்றே முயற்சித்துப் பார்த்து உங்களது கருத்துக்களை எங்களுடன் பகிர்ந்து கொள்ளுங்கள்.