நாக்கில் எச்சில் ஊறவைக்கும் கிரிஸ்பி ஆலு மூங்தால் சீஸ் உருண்டைகள்!

மாலையில் தேநீர் அருந்தும் சமயங்களில், சூடாக எதையாவது சாப்பிட வேண்டும் என்ற ஆவல் நம் அனைவருக்கும் தோன்றும். பொதுவாக பஜ்ஜி, போண்டா என்று தொடர்ந்து சாப்பிட்டு அலுத்துப் போனவர்களுக்கு, முற்றிலும் ஒரு புதிய, சுவையான மாற்றுதான் இந்த கிரிஸ்பி ஆலு மூங்தால் சீஸ் பால்ஸ். 

வெளியே கரகரப்பாகவும், உள்ளே மென்மையாகவும், கடித்தவுடன் உருகி வரும் சீஸ் சுவையுடனும் இருக்கும் இந்த ஸ்னாக்ஸ், சிறியவர்கள் முதல் பெரியவர்கள் வரை அனைவரையும் கவர்ந்திழுக்கும். இதில் புரதச்சத்து நிறைந்த சிறுபருப்பு மற்றும் ஆற்றல் தரும் உருளைக்கிழங்கு சேர்வதால், இது ஆரோக்கியமும் சுவையும் இணைந்த ஒரு அருமையான உணவாக இருக்கும்.

தேவையான பொருட்கள்:

• வேகவைத்து மசித்த உருளைக்கிழங்கு – 2 பெரியது

• அரை வேக்காட்டில் வேகவைத்த சிறுபருப்பு – அரை கப்

• துருவிய சீஸ் – 1/2 கப்

• பொடியாக நறுக்கிய வெங்காயம் – 1

• பச்சை மிளகாய் – 2

• இஞ்சி பூண்டு விழுது – 1 ஸ்பூன்

• மிளகாய்த் தூள் – 1 ஸ்பூன்

• கரம் மசாலா மற்றும் சாட் மசாலா – தலா 1/2 ஸ்பூன்

• நறுக்கிய கொத்தமல்லி இலைகள் – 2 ஸ்பூன்

• சோள மாவு – 2 மேஜைக்கரண்டி

• பிரெட் தூள் – 1 கப்

• உப்பு – தேவையான அளவு

• பொரிக்க தேவையான அளவு – சமையல் எண்ணெய்

செய்முறை!

முதலில், ஒரு பெரிய பாத்திரத்தை எடுத்துக்கொண்டு, அதில் நன்கு வேகவைத்து கட்டிகளின்றி மசித்த உருளைக்கிழங்கைச் சேர்க்கவும். அதனுடன் முக்கால் பதத்திற்கு வேகவைத்த சிறுபருப்பை தண்ணீரின்றி வடிகட்டி சேர்க்க வேண்டும். சிறுபருப்பு குழையாமல் இருப்பது மிகவும் முக்கியம்; அப்போதுதான் சாப்பிடும்போது சரியான கரகரப்புத் தன்மை கிடைக்கும்.

இதையடுத்து, அந்த கலவையில் பொடியாக நறுக்கிய வெங்காயம், பச்சை மிளகாய், இஞ்சி பூண்டு விழுது, மிளகாய்த் தூள், கரம் மசாலா, சாட் மசாலா மற்றும் தேவையான அளவு உப்பு ஆகியவற்றைச் சேர்க்கவும். 

இறுதியாக நறுக்கிய கொத்தமல்லி இலைகளைத் தூவி, அனைத்தையும் ஒன்றாகச் சேர்த்து கெட்டியான மாவு பதத்திற்குப் பிசைந்து கொள்ள வேண்டும். மாவில் ஈரப்பதம் அதிகமாக இருந்தால் அதைக் குறைக்க சிறிதளவு பிரெட் தூளை இத்துடன் கலந்து கொள்ளலாம்.

இப்போது பிசைந்த மாவில் இருந்து எலுமிச்சை அளவு உருண்டைகளை எடுத்து, உள்ளங்கையில் வைத்து லேசாகத் தட்டையாக்கிக் கொள்ளவும். அதன் நடுவில் சிறிதளவு துருவிய சீஸை வைத்து, மாவை மீண்டும் மூடி, விரிசல்கள் ஏதுமில்லாமல் உருண்டையாகப் பிடித்துக் கொள்ளவும்.

இவ்வாறு தயாரிக்கப்படும் சீஸ் பால்ஸ் விரிசல் இன்றி இருக்க வேண்டியது அவசியம், இல்லையென்றால் எண்ணெயில் பொரிக்கும்போது அவை உடைந்து வெளியே வந்துவிடும்.

ஒரு சிறிய கிண்ணத்தில் சோள மாவை சிறிது தண்ணீர் ஊற்றி நீர்க்கக் கரைத்துக் கொள்ளவும். தயார் செய்து வைத்துள்ள உருண்டைகளை இந்த சோள மாவு கரைசலில் முக்கி எடுத்து, பின்னர் பிரெட் தூளில் நன்கு புரட்டி எடுக்கவும். இதுவே வெளிப்புறம் அதிக கரகரப்பாக இருக்க உதவும் ரகசியமாகும்.

சிறுபருப்பு சேர்த்துக் கொள்வதால் உடலுக்குத் தேவையான புரதச்சத்து தாராளமாகக் கிடைக்கிறது. இணையத்தில் உள்ள உணவு வல்லுநர்களின் குறிப்புப்படி, பாசிப்பருப்பு எளிதில் செரிமானம் ஆகக்கூடியது மற்றும் உடல் உஷ்ணத்தைத் தணிக்கக்கூடியது. 

மறுபுறம், உருளைக்கிழங்கில் உள்ள கார்போஹைட்ரேட் உடனடி ஆற்றலை வழங்குகிறது. சீஸில் உள்ள கால்சியம் குழந்தைகளின் எலும்பு வளர்ச்சிக்கு மிகவும் உதவுகிறது. எனவே, வெறும் சுவைக்காக மட்டுமின்றி சத்துக்காகவும் இதனை வீட்டிலேயே தயார் செய்வது நல்லது.

சிறுபருப்பிற்குப் பதிலாக நீங்கள் முளைகட்டிய பச்சைப்பயறையும் லேசாக வேகவைத்து சேர்த்துக் கொள்ளலாம்; இது இதன் ஊட்டச்சத்தை இன்னும் பலமடங்கு அதிகரிக்கும். அதேபோல, எண்ணெயில் பொரிக்க விரும்பாதவர்கள், Air Fryer மூலம் சிறிது எண்ணெய் தடவி பேக் செய்தும் ஆரோக்கியமாக சுவைக்கலாம்.

ஒரு வாணலியில் எண்ணெய் ஊற்றி மிதமான சூட்டில் காய்ந்ததும், தயார் செய்து வைத்துள்ள உருண்டைகளை மெதுவாக எண்ணெயில் போட்டு பொன்னிறமாகும் வரை பொரித்து எடுக்கவும். இப்போது சுவையான கிரிஸ்பி ஆலு மூங்தால் சீஸ் பால்ஸ் தயார்.

மாலை நேரங்களில் குழந்தைகளுக்கு சுடச்சுட இந்த சீஸ் பால்ஸ் செய்து கொடுத்தால், தட்டுகளில் ஒன்று கூட மிஞ்சாது.