ஓட்ஸ் கஞ்சியா குடிச்சு போர் அடிக்குதா? சுகரை கட்டுப்படுத்தும் ஓட்ஸ் கிச்சடி ரெசிபி இதோ!

சர்க்கரை நோய் வந்துவிட்டாலே அரிசி உணவுகளைத் தவிர்த்துவிட்டு, தினமும் சப்பாத்தி அல்லது ஓட்ஸ் கஞ்சி என்று சாப்பிட்டு பலருக்கும் சலித்துப்போயிருக்கும். ஓட்ஸ் அதிகப்படியான நார்ச்சத்து நிறைந்தது என்பதால் சர்க்கரை நோயாளிகளுக்கு இது ஒரு மிகச் சிறந்த உணவாகும். ஆனால், அதை ஒரே மாதிரியாக கஞ்சியாகச் சாப்பிடாமல், காய்கறிகள் மற்றும் பாசிப்பருப்பு சேர்த்து காரசாரமாகச் செய்தால் சுவை அபாரமாக இருக்கும். 

அதுமட்டுமின்றி இது இரத்தத்தில் உள்ள சர்க்கரை அளவை சீராக வைத்திருக்கவும், உடல் எடையைக் குறைக்கவும் பெரிதும் உதவுகிறது. எந்தவிதமான செயற்கை சுவையூட்டிகளும் இல்லாமல், வீட்டிலேயே 15 நிமிடங்களில் சுவையான ஓட்ஸ் கிச்சடி எப்படி செய்வது என பார்க்கலாம் வாங்க.

தேவையான பொருட்கள்:

• ரோல்ட் ஓட்ஸ் - 1 கப்

• பாசிப்பருப்பு - 1/4 கப்

• பொடியாக நறுக்கிய காய்கறிகள்  - 1 கப்

• பெரிய வெங்காயம் - 1

• தக்காளி - 1 

• பச்சை மிளகாய் - 2 

• இஞ்சி பூண்டு விழுது - 1 டீஸ்பூன்

• மஞ்சள் தூள் - 1/4 டீஸ்பூன்

• சீரகம், கடுகு - தலா 1/2 டீஸ்பூன்

• நெய் அல்லது நல்லெண்ணெய் - 1 டேபிள் ஸ்பூன்

• கறிவேப்பிலை, கொத்தமல்லி இலைகள் - சிறிதளவு

• உப்பு - தேவையான அளவு

செய்முறை! 

முதலில் ஒரு வெறும் கடாயில் ஓட்ஸ் மற்றும் பாசிப்பருப்பை தனித்தனியாக மிதமான தீயில் வாசம் வரும் வரை வறுத்து எடுத்துக்கொள்ள வேண்டும். இவ்வாறு வறுத்துச் செய்வதால் உணவு ஒன்றுடன் ஒன்று ஒட்டாமல் குழையாமல் பெர்ஃபெக்ட்டாக வரும். இப்போது அடுப்பில் ஒரு குக்கரை வைத்து, ஒரு ஸ்பூன் நல்லெண்ணெய் அல்லது நெய் ஊற்றிக் காய்ச்சவும். 

எண்ணெய் காய்ந்ததும் கடுகு, சீரகம், கறிவேப்பிலை சேர்த்துத் தாளிக்க வேண்டும். அதன்பின் நறுக்கிய வெங்காயம் மற்றும் பச்சை மிளகாயைச் சேர்த்து லேசாக வதக்குங்கள். வெங்காயம் நிறம் மாறியதும், இஞ்சி பூண்டு விழுது சேர்த்து அதன் பச்சை வாசனை போகும் வரை பிரட்டி விட வேண்டும். 

அடுத்ததாக நறுக்கிய தக்காளி மற்றும் நாம் எடுத்து வைத்துள்ள காய்கறிகளைச் சேர்த்து நன்றாக வதக்க வேண்டும். காய்கறிகள் சற்றே வதங்கியதும், மஞ்சள் தூள் மற்றும் தேவையான அளவு கல் உப்பு சேர்த்துக் கிளறவும். இப்போது ஒரு கப் ஓட்ஸிற்கு மூன்று கப் என்ற அளவில் தண்ணீர் ஊற்றிக் கொதிக்க வையுங்கள்.

தண்ணீர் நன்கு கொதித்து வரும்போது, வறுத்து வைத்துள்ள ஓட்ஸ் மற்றும் பாசிப்பருப்பை அதில் சேர்த்து மெதுவாகக் கிளறி விட வேண்டும். இந்த ஓட்ஸ் கிச்சடி சரியான பதத்திற்கு வந்து கொதிக்க ஆரம்பித்தவுடன், குக்கரை மூடி மிதமான தீயில் இரண்டு விசில் விட்டு அடுப்பை அணைத்துவிடுங்கள். 

குக்கரின் ஆவி முழுமையாக அடங்கியதும் மூடியைத் திறந்தால், காய்கறிகளின் சத்துக்களும், பருப்பின் வாசனையும் இணைந்து அருமையான சுவையில் உணவு தயாராகி இருக்கும். கடைசியாகப் பொடியாக நறுக்கிய கொத்தமல்லி இலைகளைத் தூவிப் பரிமாறலாம். மணக்க மணக்க தயாரான இந்த ஓட்ஸ் கிச்சடி சர்க்கரை நோயாளிகளுக்கு மட்டுமின்றி, எடையைக் குறைக்க நினைப்பவர்களுக்கும், வளரும் குழந்தைகளுக்கும் ஒரு மிகச்சிறந்த சத்தான உணவாகும். 

வழக்கமான காலை அல்லது இரவு உணவுக்குப் பதிலாக, செரிமானத்திற்கு எளிதான இந்த ஆரோக்கியமான ரெசிபியை உங்கள் வீட்டில் கட்டாயம் செய்து பாருங்கள்.