வெயிலில் காயவைக்க வேண்டாம்… 10 நிமிடத்தில் காரசாரமான இன்ஸ்டன்ட் ஊறுகாய் தயார்!

மதிய உணவாக இருந்தாலும் சரி, அல்லது பயணத்தின் போது எடுத்துச் செல்லும் உணவாக இருந்தாலும் சரி, அவற்றுடன் தொட்டுக்கொள்ள ஒரு சுவையான ஊறுகாய் இருந்தால், உணவின் சுவை பலமடங்கு அதிகரிக்கும். அதிலும் குறிப்பாக, காரசாரமான சுவையை விரும்புபவர்களுக்கு இந்தப் பச்சை மிளகாயால் செய்யப்படும் ஊறுகாய் ஒரு சூப்பர் சாய்ஸ். 

பொதுவாக ஊறுகாய் தயார் செய்ய பல நாட்கள் வெயிலில் காயவைத்துக் காத்திருக்க வேண்டும். ஆனால், எந்தவிதமான காத்திருப்பும் இல்லாமல், வீட்டின் சமையலறையில் இருக்கும் எளிய பொருட்களைக் கொண்டு வெறும் 10 நிமிடங்களில் ஒரு காரசாரமான மிளகாய் ஊறுகாய் செய்ய முடியும். தயிர் சாதம், சாம்பார் சாதம், சப்பாத்தி மற்றும் பரோட்டாவிற்கு மிகவும் பொருத்தமான இந்த இன்ஸ்டன்ட் ரெசிபியை எவ்வாறு சுலபமாகச் செய்வது என்று இப்போது பார்ப்போம்.

தேவையான பொருட்கள்:

• பெரிய பச்சை மிளகாய் - 200 கிராம்

• கடுகு - 2 ஸ்பூன்

• வெந்தயம் - 1 ஸ்பூன்

• நல்லெண்ணெய் - 4 ஸ்பூன்

• எலுமிச்சைச் சாறு - 3 ஸ்பூன்

• மஞ்சள் தூள் - 1/2 ஸ்பூன்

• பெருங்காயத் தூள் - 1/2 ஸ்பூன்

• கல் உப்பு - தேவையான அளவு

செய்முறை! 

இந்தச் சுவையான ஊறுகாயைச் செய்வதற்கு, முதலில் பச்சை மிளகாயை நன்றாகக் கழுவி, ஒரு சுத்தமான பருத்தித் துணியால் ஈரம் இல்லாமல் துடைத்துக்கொள்ள வேண்டும். 

மிளகாயில் சிறிதளவு ஈரம் இருந்தாலும் ஊறுகாய் விரைவில் கெட்டுப்போக வாய்ப்புள்ளது. காம்புகளை நீக்கிவிட்டு, மிளகாயைச் சிறுசிறு வட்டத் துண்டுகளாக நறுக்கிக்கொள்ளுங்கள். 

அடுத்ததாக, அடுப்பில் ஒரு வாணலியை வைத்து மிதமான தீயில் சூடாக்க வேண்டும். அதில் ஒரு தேக்கரண்டி கடுகு மற்றும் ஒரு தேக்கரண்டி வெந்தயம் ஆகியவற்றைச் சேர்த்து, எண்ணெய் ஊற்றாமல் கருகிவிடாமல் பொன்னிறமாக வறுத்துக்கொள்ள வேண்டும். 

வறுத்த பொருட்கள் நன்றாக ஆறியதும், மிக்ஸியில் சேர்த்து மெல்லிய பொடியாக அரைத்து வைத்துக்கொள்ளுங்கள். இந்தப் பொடிதான் ஊறுகாய்க்குத் தேவையான அசல் வாசனையையும், சுவையையும் கொடுக்கும்.

இப்போது மீண்டும் அதே வாணலியை அடுப்பில் வைத்து, நல்லெண்ணெய் ஊற்றிக் காய்ச்ச வேண்டும். ஊறுகாய்க்கு நல்லெண்ணெய் பயன்படுத்துவதுதான் பாரம்பரியமான சுவையைத் தரும். எண்ணெய் நன்றாகக் காய்ந்ததும், மீதமுள்ள ஒரு தேக்கரண்டி கடுகைச் சேர்த்துத் தாளிக்க வேண்டும். 

கடுகு வெடித்தவுடன், பெருங்காயத் தூள் மற்றும் நறுக்கி வைத்துள்ள பச்சை மிளகாயைச் சேர்த்து இரண்டு நிமிடங்கள் மிதமான தீயில் வதக்க வேண்டும். மிளகாயின் நிறம் லேசாக மாறத் தொடங்கியவுடன், அரைத்து வைத்துள்ள கடுகு-வெந்தயப் பொடி, மஞ்சள் தூள் மற்றும் தேவையான அளவு கல் உப்பு ஆகியவற்றைச் சேர்த்து நன்றாகக் கிளறி விட வேண்டும். மசாலா அனைத்தும் மிளகாயுடன் ஒன்றுசேர்ந்தவுடன் அடுப்பை அணைத்துவிடலாம்.

வாணலியின் சூடு முழுமையாகத் தணிந்த பிறகு, அதில் பிழிந்து வைத்துள்ள எலுமிச்சைச் சாறு அல்லது வினிகரைச் சேர்த்து நன்றாகக் கலந்து கொள்ள வேண்டும். எலுமிச்சைச் சாறு சேர்ப்பதால் மிளகாயின் காரம் குறைந்து, சுவையான புளிப்புத் தன்மை கிடைக்கும்; அத்துடன் ஊறுகாய் நீண்ட நாட்கள் கெட்டுப்போகாமலும் இருக்கும். 

நாவில் எச்சில் ஊறவைக்கும் காரசாரமான இன்ஸ்டன்ட் மிளகாய் ஊறுகாய் தயார். இதனை ஒரு சுத்தமான கண்ணாடி பாட்டிலில் அடைத்து வைத்துக்கொண்டால், ஒரு மாதம் வரை சுவை மாறாமல் பயன்படுத்தலாம்.