சட்னி அரைக்க நேரமில்லையா? 6 மாதத்திற்கு கெட்டுப்போகாத இட்லி பொடி ரகசியம் இதோ!

தென்னிந்தியர்களின் விருப்பமான காலை உணவான இட்லி, தோசைக்கு எத்தனை வகையான சட்னி, சாம்பார் வைத்தாலும், சுடச்சுட இட்லியுடன் நல்லெண்ணெய் அல்லது நெய் கலந்து சாப்பிடும் இட்லி மிளகாய்ப்பொடி சுவைக்கு எதுவும் ஈடாகாது. வேலைக்குச் செல்லும் அவசரத்திலோ அல்லது சட்னி அரைக்க நேரமில்லாத சமயங்களிலோ இது ஒரு மிகச்சிறந்த கைக்கண்ட உணவாகும். 

கடைகளில் அதிக விலை கொடுத்து வாங்கும் பொடிகளில் சுவையூட்டிகளும், நீண்ட நாட்கள் கெடாமல் இருக்க ரசாயனங்களும் சேர்க்கப்படுகின்றன. ஆனால், நமது வீட்டிலேயே மிகக் குறைந்த செலவில், 6 மாதங்கள் வரை கெட்டுப்போகாத அளவிற்கு மணமான மற்றும் சுவையான பொடியை எவ்வாறு தயார் செய்யலாம் என்பதைப் பார்க்கலாம் வாங்க.

தேவையான பொருட்கள்:

• உளுத்தம் பருப்பு - 1 கப்

• கடலைப் பருப்பு - 1/2 கப்

• காய்ந்த மிளகாய் - 15 முதல் 20 வரை

• வெள்ளை அல்லது கருப்பு எள்ளு - 2 மேஜைக்கரண்டி

• பெருங்காயத் தூள் - 1 தேக்கரண்டி

• கறிவேப்பிலை - 2 கைப்பிடி அளவு

• கல் உப்பு - தேவையான அளவு

• நல்லெண்ணெய் - 1 தேக்கரண்டி

செய்முறை! 

இந்தப்பொடி நீண்ட மாதங்கள் கெடாமல் இருப்பதற்கு, பொருட்களை வறுக்கும் முறைதான் மிகவும் முக்கியமாகும். முதலில் அடுப்பில் ஒரு அடிகனமான வாணலியை வைத்துச் சூடாக்க வேண்டும். அதில் எண்ணெய் எதுவும் ஊற்றாமல், உளுத்தம் பருப்பு மற்றும் கடலைப் பருப்பைத் தனித்தனியாக மிதமான தீயில் வைத்துப் பொன்னிறமாக வறுத்து எடுக்க வேண்டும். 

பருப்புகள் கருகிவிடாமல் பார்த்துக் கொள்வது அவசியம். அடுத்ததாக, எள்ளைச் சேர்த்து வெடிக்கும் வரை வறுத்துத் தனியாக எடுத்துக்கொள்ள வேண்டும். ஈரம் இல்லாமல் கறிவேப்பிலையை மொறுமொறுப்பாக மாறும் வரை வறுக்க வேண்டும். இறுதியில், ஒரு தேக்கரண்டி நல்லெண்ணெய் ஊற்றி, காய்ந்த மிளகாயை லேசாக உப்பி வரும் வரை வறுத்து எடுக்க வேண்டும்.

வறுத்த பொருட்கள் அனைத்தையும் ஒரு பெரிய தட்டில் கொட்டி, அறையின் வெப்பநிலைக்கு முழுமையாக ஆறவிட வேண்டும். பொருட்கள் சூடாக இருக்கும்போது அரைத்தால், அதிலிருந்து வியர்வை நீர் உருவாகிப் பொடி விரைவில் கெட்டுப்போக வாய்ப்புள்ளது. 

பொருட்கள் நன்றாக ஆறியதும், அவற்றை மிக்ஸி ஜாரில் சேர்த்து, தேவையான அளவு கல் உப்பு மற்றும் பெருங்காயத் தூள் சேர்த்து அரைக்க வேண்டும். பொடியை மிகவும் மைய அரைக்காமல், ரவை பதத்திற்குச் சற்று கொரகொரப்பாக அரைப்பது சாப்பிடும்போது நல்ல கரகரப்பான சுவையைக் கொடுக்கும்.

அரைத்த பொடியை உடனடியாக டப்பாவில் அடைக்காமல், சிறிது நேரம் தட்டில் பரப்பி ஆறவைக்க வேண்டும். அதன் பின்னர், முற்றிலும் ஈரமில்லாத சுத்தமான கண்ணாடி பாட்டிலில் அல்லது காற்றுப்புகாத டப்பாவில் அடைத்து வைத்துக்கொண்டால், ஆறு மாதங்கள் ஆனாலும் இந்த இட்லி மிளகாய்ப்பொடி கெட்டுப்போகாது. 

காலை வேளைகளில் சுடச்சுட இட்லியுடன் நெய் அல்லது நல்லெண்ணெய் கலந்து இந்தப் பொடியைத் தொட்டுச் சாப்பிடும்போது சுவை அமிர்தமாக இருக்கும். மிகவும் மலிவான செலவில், எந்தவித ரசாயனக் கலப்படமும் இல்லாத ஆரோக்கியமான இந்த இட்லி மிளகாய்ப்பொடி ரெசிபியை இன்றே உங்கள் வீட்டில் முயற்சி செய்து பாருங்கள்.