பேக்கரியில் அதிக காசு கொடுத்து வாங்காதீங்க... 10 நிமிடத்தில் நாவில் கரையும் சீஸ் ரோல்!

பஜ்ஜி, போண்டா சாப்பிட்டு சலித்துப்போன நாவிற்கு ஒரு பிரீமியம் பேக்கரி சுவையை வீட்டிலேயே கொடுக்க நினைத்தால், உங்களின் முதல் தேர்வு இந்த ஸ்வீட் கார்ன் சீஸ் கார்ன் ரோல் ஆகத்தான் இருக்க வேண்டும். உள்ளே வைக்கும்போது நாவில் கரையும் சீஸ், கடிக்கையில் பற்களில் சிக்கும் தித்திக்கும் ஸ்வீட் கார்ன், வெளியே கரகரப்பான பிரெட் லேயர் என இது கொடுக்கும் சுவை அனுபவமே தனிதான். 

கடைகளில் அதிக விலை கொடுத்து வாங்கும் இந்த ஸ்வீட் கார்ன் சீஸ் ரோலை, நம் வீட்டில் இருக்கும் எளிய பொருட்களை வைத்தே வெறும் 10 நிமிடங்களில் எப்படி செய்வது என்று பார்ப்போம்.

தேவையான பொருட்கள்:

• வேகவைத்த ஸ்வீட் கார்ன் - 1 கப்

• துருவிய சீஸ் - அரை கப்

• வேகவைத்து மசித்த உருளைக்கிழங்கு - 2

• பெரிய வெங்காயம் - 1 

• குடைமிளகாய் - கால் கப் 

• சில்லி ஃப்ளேக்ஸ் - 1 டீஸ்பூன்

• மிளகுத் தூள் மற்றும் ஓரிகானோ - தலா அரை டீஸ்பூன்

• பிரெட் துண்டுகள் - 8

• மைதா மாவு - 2 டேபிள் ஸ்பூன்

• பிரெட் தூள் - அரை கப்

• எண்ணெய் - பொரித்து எடுக்கத் தேவையான அளவு

• உப்பு - தேவையான அளவு

செய்முறை! 

முதலில் ஒரு அகலமான பாத்திரத்தை எடுத்துக்கொள்ளுங்கள். அதில் நாம் வேகவைத்து மசித்துள்ள உருளைக்கிழங்கு, வேகவைத்த ஸ்வீட் கார்ன், நறுக்கிய வெங்காயம் மற்றும் குடைமிளகாயை சேர்க்கவும். இதனுடன் துருவிய சீஸ், சில்லி ஃப்ளேக்ஸ், மிளகுத் தூள், ஓரிகானோ மற்றும் தேவையான அளவு உப்பு சேர்த்து கைகளால் நன்றாக பிசைந்து ஒரு திக்கான மசாலா கலவையை தயார் செய்துகொள்ளுங்கள். 

இந்த மசாலாவில் தண்ணீர் சத்து கொஞ்சம் கூட இருக்கக்கூடாது; அப்படி இருந்தால் எண்ணெயில் போடும்போது ரோல் பிரிந்துவிடும். இப்போது பிசைந்த மசாலாவில் இருந்து சிறு சிறு நீள்வட்ட உருண்டைகளாக பிடித்து தனித்தனி தட்டில் வைத்துக்கொள்ளுங்கள்.

அடுத்ததாக பிரெட் துண்டுகளின் நான்கு பழுப்பு நிற ஓரங்களையும் கத்தியால் வெட்டி நீக்கிவிடுங்கள். ஒரு சப்பாத்தி கட்டையை வைத்து பிரெட் துண்டின் மீது லேசாக அழுத்தி தேய்த்தால் அது மெல்லிய ஷீட் போல மாறிவிடும். இப்போது ஒரு சிறிய கிண்ணத்தில் 2 ஸ்பூன் மைதா மாவில் கொஞ்சமாக தண்ணீர் ஊற்றி பசை பதத்திற்கு கரைத்து வைத்துக்கொள்ளுங்கள். 

தேய்த்து வைத்துள்ள பிரெட்டின் நடுவில் நாம் தயார் செய்த மசாலா உருண்டையை வைத்து, பிரெட்டை பாய் சுருட்டுவது போல இறுக்கமாக சுருட்டுங்கள். பிரெட்டின் இறுதி முனையில் மைதா பசையை தடவி ஒட்டிவிட்டால், மசாலா வெளியே வராதபடி பெர்ஃபெக்ட்டான கார்ன் ரோல் வடிவம் கிடைத்துவிடும்.

சுருட்டி வைத்துள்ள ரோல்களை மைதா கரைசலில் லேசாக முக்கி எடுத்து, உடனே பிரெட் தூளில் போட்டு எல்லா பக்கங்களிலும் தூள் ஒட்டும் படி பிரட்டி எடுக்க வேண்டும். இப்போது கடாயில் எண்ணெய் ஊற்றி மிதமான சூடானதும், தயார் செய்த ரோல்களை மெதுவாக எண்ணெயில் விடவும். அடுப்பை அதிக தீயில் வைக்கக்கூடாது, மிதமான தீயில் வைத்து இரண்டு பக்கங்களும் பொன்னிறமாக மாறும் வரை பொறுமையாக பொரித்து எடுத்தால் கரகரப்பான சத்தம் கேட்கும்.

எண்ணெயில் இருந்து எடுத்த ரோல்களை ஒரு டிஷ்யூ பேப்பரில் வைத்தால் அதிகப்படியான எண்ணெய் வடிந்துவிடும். சுடச்சுட இருக்கும் இந்த ரோலை நடுவில் இரண்டாக பிளந்து பார்த்தால், உள்ளே சீஸ் உருகி நூலாக நீண்டு வரும் காட்சியே நாவில் எச்சில் ஊறவைக்கும். தக்காளி கெச்சப் அல்லது புதினா சட்னியுடன் தொட்டு சாப்பிட்டால், குழந்தைகள் தட்டு நிறைய கொடுத்தாலும் சலிப்பில்லாமல் சாப்பிடுவார்கள்.