நாவில் நீர் ஊறவைக்கும் முள்ளங்கி கோலா உருண்டை - சீக்ரெட் ரெசிபி உள்ளே!

பொதுவாகவே முள்ளங்கி என்றாலே பலருக்கு அலர்ஜிதான். சாம்பாரில் முள்ளங்கி போட்டாலே சாப்பிடாத குழந்தைகளை, விரும்பிச் சாப்பிட வைப்பது பெரும்பாடு. அந்த முள்ளங்கியை வைத்துக்கொண்டு, கோலா உருண்டை குழம்பு வைக்க முடியும் என்று சொன்னால் நம்புவீர்களா? 

முள்ளங்கியின் வாசனையே தெரியாமல், மொறுமொறுப்பான உருண்டைகளுடன் காரசாரமான குழம்பு வைத்தால், வீட்டில் உள்ளவர்கள் விரும்பி சாப்பிடுவார்கள். வாருங்கள், அந்த ருசியான (radish kofta balls) ரெசிபியைப் பார்க்கலாம்.

கோலா செய்ய தேவையான பொருட்கள்:

• முள்ளங்கி - 2

• பொட்டுக்கடலை மாவு - 1/2 கப் 

• சின்ன வெங்காயம் - 10 

• சோம்பு - 1 டீஸ்பூன்

• காய்ந்த மிளகாய் - 3

• இஞ்சி பூண்டு விழுது - 1 டீஸ்பூன்

• கறிவேப்பிலை, கொத்தமல்லி - சிறிது

• உப்பு - தேவைக்கேற்ப

• எண்ணெய் - பொரிக்க.

குழம்பு செய்ய தேவையான பொருட்கள்:

• சின்ன வெங்காயம் - 15

• தக்காளி - 2

• பூண்டு பற்கள் - 10

• புளி - எலுமிச்சை அளவு 

• மிளகாய்த்தூள் - 1 டீஸ்பூன்

• மல்லித்தூள் - 2 டீஸ்பூன்

• மஞ்சள் தூள் - ¼ டீஸ்பூன்

• தேங்காய் விழுது - ¼ கப் 

• தாளிக்க - கடுகு, வெந்தயம், கறிவேப்பிலை.

செய்முறை:

முதலில் நாம் கோலா உருண்டைகளைத் தயார் செய்ய வேண்டும். இதுதான் இந்த டிஷ்ஷின் முக்கியமான பகுதி. முள்ளங்கியைத் தோல் சீவி துருவிக்கொள்ளவும். முள்ளங்கியில் நீர்ச்சத்து அதிகம் இருக்கும், அதனால் துருவிய முள்ளங்கியை ஒரு துணியில் வைத்தோ அல்லது கையிலோ நன்கு பிழிந்து நீரை முழுவதுமாக எடுத்துவிட வேண்டும். 

ஈரம் இருந்தால் உருண்டை பிடிக்க வராது, எண்ணெயும் குடிக்கும். பிழிந்த முள்ளங்கியுடன் பொடியாக நறுக்கிய வெங்காயம், இஞ்சி பூண்டு விழுது, கறிவேப்பிலை சேர்க்கவும். மிக்ஸியில் சோம்பு, காய்ந்த மிளகாய் சேர்த்து கொரகொரப்பாக அரைத்து இதனுடன் சேர்க்கவும்.

இப்போது பைண்டிங்கிற்காக பொட்டுக்கடலை மாவை சிறிது சிறிதாகச் சேர்த்துப் பிசையவும். தண்ணீர் ஊற்றக்கூடாது. முள்ளங்கியில் உள்ள லேசான ஈரப்பதமே போதுமானது. மாவு உருண்டை பிடிக்கும் பதத்திற்கு வந்ததும், சிறு சிறு உருண்டைகளாக உருட்டி வைக்கவும். 

வாணலியில் எண்ணெய் காயவைத்து, மிதமான தீயில் இந்த உருண்டைகளைப் பொன்னிறமாகப் பொரித்து எடுத்துக்கொள்ளவும்.

அடுத்ததாக, குழம்பு தயார் செய்யலாம். ஒரு கடாயில் நல்லெண்ணெய் ஊற்றி காய்ந்ததும் கடுகு, வெந்தயம், கறிவேப்பிலை தாளிக்கவும். பின்னர் தோல் உரித்த சின்ன வெங்காயம் மற்றும் பூண்டு சேர்த்து நன்கு வதக்கவும். 

வெங்காயம் கண்ணாடி பதம் வந்ததும், நறுக்கிய தக்காளியைச் சேர்த்து குழைய வதக்கவும். தக்காளி மசிந்தவுடன் மிளகாய்த்தூள், மல்லித்தூள், மஞ்சள் தூள் சேர்த்து ஒரு நிமிடம் வதக்கி, கரைத்து வைத்துள்ள புளித் தண்ணீரை ஊற்றவும்.

குழம்பு நன்கு கொதித்து பச்சை வாசனை போனவுடன், அரைத்து வைத்துள்ள தேங்காய் விழுதைச் சேர்த்து தேவையான அளவு உப்பு மற்றும் தண்ணீர் ஊற்றி கொதிக்கவிடவும். குழம்பு சற்று கெட்டியாகி, எண்ணெய் பிரிந்து வரும் பதம் வரும்போது அடுப்பை சிம்மில் வைக்கவும்.

இப்போது நாம் பொரித்து வைத்துள்ள முள்ளங்கி கோலா உருண்டைகளை ஒவ்வொன்றாகக் குழம்பில் சேர்க்கவும். உருண்டைகளைப் போட்ட பிறகு கரண்டியால் வேகமாகத் திருப்பக் கூடாது, உடைந்துவிடும். உருண்டைகள் குழம்பில் ஊறி, ஒரு 5 நிமிடம் மிதமான தீயில் கொதித்த பிறகு, மேலே கொத்தமல்லித் தழை தூவி இறக்கவும்.

சுவையான முள்ளங்கி கோலா உருண்டை குழம்பு தயார். இதைச் சுடச்சுட சாதத்தில் போட்டுப் பிசைந்து சாப்பிட்டால், முள்ளங்கி பிடிக்காதவர்கள் கூட இன்னும் வேண்டும் என்று கேட்டுச் சாப்பிடுவார்கள்.