டீ, காபி போடும்போது பால் திரிந்துவிடுகிறதா? காரணமும் தடுக்கும் 3 வழிகளும்!

காலையில் எழுந்ததும் ஒரு கப் சூடான டீ அல்லது காபி குடித்தால்தான் பலருக்கும் அன்றைய பொழுதே இனிமையாகத் தொடங்கும். ஆனால், ஆசையாக டீ அல்லது காபி தயாரிக்கும்போது பால் திடீரெனத் திரிந்துவிட்டால் என்ன செய்வது? குறிப்பாக, டீத்தூள், காபித்தூள் சேர்த்ததும் பால் தயிர் போலத் திப்பித்திப்பியாக மாறிவிடுவது பல வீடுகளில் ஏற்படும் பிரச்னை. இதற்குப் பின்னால் சில காரணங்கள் இருக்கின்றன. அவற்றைத் தெரிந்துகொண்டால் பால் திரிவதை எளிதாகத் தடுக்கலாம்.

பால் ஏன் திரிந்துவிடுகிறது?

பாலில் உள்ள புரதங்கள் சில குறிப்பிட்ட சூழ்நிலைகளில் ஒன்றாகத் திரண்டு கட்டிகளாக மாறுகின்றன. இதற்கு முக்கியக் காரணம் பாலின் அமிலத்தன்மை அதிகரிப்பதும், பால் கெட்டுப்போயிருப்பதும்தான்.

* பால் லேசாகக் கெட்டுப்போவது: பிரிட்ஜில் வைத்திருந்தாலும் சரியான வெப்பநிலையில் வைக்கப்படாவிட்டால் பால் புளிக்கத் தொடங்கலாம்.

* அதிக அமிலத்தன்மை: சில டீத்தூள்கள், காபித்தூள்கள் அல்லது அவற்றில் சேர்க்கப்படும் பொருட்களின் அமிலத்தன்மை பாலின் தன்மையைப் பாதிக்கலாம்.

* அதிக நேரம் கொதிக்கவிடுவது: பாலை நீண்ட நேரம் அதிக வெப்பத்தில் கொதிக்க வைப்பதும் அதன் தன்மையைப் பாதிக்கலாம்.

பால் திரியாமல் தடுக்க 3 எளிய வழிகள்!

1. பாலை நன்றாகச் சரிபார்த்துப் பயன்படுத்துங்கள்!

பாலைப் பயன்படுத்துவதற்கு முன்பு அதன் வாசனை, நிறம், தன்மை ஆகியவற்றைக் கவனியுங்கள். புளிப்பான வாசனை வந்தாலோ, பால் ஏற்கெனவே திரிந்திருந்தாலோ அதைப் பயன்படுத்த வேண்டாம். பிரிட்ஜில் சரியான வெப்பநிலையில் பாலைச் சேமித்து, திறந்த பாக்கெட்டைப் பரிந்துரைக்கப்பட்ட காலத்துக்குள் பயன்படுத்துவது நல்லது.

2. டீ, காபியில் பாலைச் சேர்க்கும் முறையை மாற்றுங்கள்!

சிலர் பாக்கெட்டிலிருந்து எடுத்த காய்ச்சாத பாலை அப்படியே பாத்திரத்தில் ஊற்றி, அதனுடன் டீத்தூள் அல்லது காபித்தூளையும் சேர்த்து ஆரம்பத்திலேயே கொதிக்க வைப்பார்கள். இப்படிச் செய்வதைத் தவிர்ப்பது

நல்லது. குறிப்பாக, பால் ஏற்கெனவே லேசாகப் புளிக்கத் தொடங்கியிருந்தால், டீத்தூள் அல்லது காபித்தூளுடன் சேர்த்துக் கொதிக்க வைக்கும்போது பால் திரிந்துவிட வாய்ப்புள்ளது.

எனவே, முதலில் தண்ணீரில் டீத்தூள் அல்லது காபித்தூளைத் தனியாகக் கொதிக்கவிட்டு, பாலைத் தனியாகக் காய்ச்சி அல்லது சூடாக்கிச் சேர்ப்பது சிறந்தது. இப்படிச் செய்வதால் டீ, காபியின் சுவையும் மணமும் நன்றாக இருக்கும்.

3. பாத்திரத்தையும் வெப்பத்தையும் கவனியுங்கள்!

டீ, காபி தயாரிக்கும்போது சுத்தமான பாத்திரங்களைப் பயன்படுத்துங்கள். பாத்திரத்தில் ஏற்கெனவே புளிப்பான பொருட்களின் எச்சம் இருந்தாலும் பால் திரிய வாய்ப்புள்ளது. மேலும், அதிக தீயில் தொடர்ந்து கொதிக்கவிடாமல் மிதமான தீயில் தயாரிப்பது நல்லது. பால் சேர்த்த பிறகு நீண்ட நேரம் கொதிக்கவிடாமல் பார்த்துக்கொள்ளுங்கள்.

டீ, காபி தயாரிப்பதிலும் ஒரு தனி பக்குவம் இருக்கிறது. சரியான அளவில் டிகாக்ஷன் தயாரித்து, பாலைத் தனியாகக் காய்ச்சிச் சேர்த்தால் கடைக்குக் கிடைக்கும் சுவையையும் மணத்தையும் வீட்டிலேயே பெறலாம். இதோ சுவையான ஃபில்டர் காபி, பால் டீ தயாரிக்கும் முறை!

மணக்கும் ஃபில்டர் காபி – செய்முறை

தேவையான பொருட்கள்:

காபித்தூள் – 3 டீஸ்பூன்

வெந்நீர் – ½ கப்

பால் – 1 கப்

சர்க்கரை – தேவையான அளவு

செய்முறை:

ஃபில்டர் காபி பாத்திரத்தில் காபித்தூளைப் போட்டு, அதன் மேல் கொதிக்கும் வெந்நீரை ஊற்றவும். மூடி வைத்து 10 முதல் 15 நிமிடங்கள் வரை காத்திருக்கவும். காபி டிகாக்ஷன் நன்றாக இறங்கியதும் தனியாக எடுத்துக்கொள்ளவும்.

ஒரு பாத்திரத்தில் பாலைத் தனியாக நன்றாகக் காய்ச்சவும். ஒரு டம்ளரில் தேவையான அளவு காபி டிகாக்ஷன், சர்க்கரை சேர்த்து, அதன் மேல் சூடான பாலை ஊற்றிக் கலக்கவும். இரண்டு டம்ளர்களுக்கு இடையில் மாற்றி மாற்றி ஆற்றினால் நுரையுடன் மணக்கும் ஃபில்டர் காபி தயார்.

மணக்கும் பால் டீ – செய்முறை

தேவையான பொருட்கள்:

பால் – 1 கப்

தண்ணீர் – ½ கப்

டீத்தூள் – 2 டீஸ்பூன்

சர்க்கரை – தேவையான அளவு

இஞ்சி – சிறிய துண்டு (விருப்பப்பட்டால்)

செய்முறை:

ஒரு பாத்திரத்தில் தண்ணீரை ஊற்றி நன்றாகக் கொதிக்கவிடவும். அதில் டீத்தூள், தட்டிய இஞ்சி சேர்த்து 2 நிமிடங்கள் கொதிக்கவிடவும். பின்னர் சர்க்கரை சேர்த்து வடிகட்டவும்.

மற்றொரு பாத்திரத்தில் பாலைத் தனியாக நன்றாகச் சூடாக்கவும். இப்போது தயாரித்து வைத்துள்ள டீக் கஷாயத்துடன் சூடான பாலைச் சேர்த்துக் கலக்கவும். தேவையெனில் மீண்டும் லேசாகச் சூடாக்கி இறக்கவும். சுவையான, மணமான பால் டீ தயார்.

சிறிய குறிப்பு: டீ, காபி இரண்டிற்குமே பாலைத் தனியாகச் சூடாக்கிச் சேர்ப்பது நல்லது. இதனால் பாலின் சுவை மாறாமல் இருக்கும்; டீ, காபியின் மணமும் நன்றாக வெளிப்படும்.

கூடுதல் கவனிக்கவேண்டிய விஷயம்!

சில நேரங்களில் புதிய பாலைப் பயன்படுத்தினாலும் டீ அல்லது காபி திரிந்துவிடலாம். அப்படியானால் பால், தண்ணீர், டீத்தூள் அல்லது காபித்தூள் ஆகியவற்றின் தரத்தையும் பாத்திரத்தின் சுத்தத்தையும் சரிபார்க்க வேண்டும்.

பால் திரிந்துவிட்டால் அதை மீண்டும் பழைய நிலைக்குக் கொண்டுவர முடியாது. குறிப்பாக, கெட்டுப்போன அல்லது புளித்த பாலைப் பயன்படுத்தி டீ, காபி தயாரிக்கக் கூடாது.

சின்னச் சின்ன சமையலறைக் கவனிப்புகள்தான் நாம் தயாரிக்கும் டீ, காபியின் சுவையையும் தரத்தையும் காப்பாற்றும்!