மழையில் சுடச்சுடச் சாப்பிட... 5 நிமிட மாலை நேரச் சிற்றுண்டி!

வானம் இருண்டு, மழைத்துளிகள் ஜன்னலைத் தட்டும்போது கையில் ஒரு கப் காபி அல்லது டீ, அதற்குத் துணையாக ஒரு தட்டில் சூடான சிற்றுண்டியும் இருந்தால் மனதுக்கே தனி உற்சாகம் பிறக்கும்! ஆனால், மழை பெய்யும் நேரத்தில் கடைக்குச் சென்று தின்பண்டங்கள் வாங்குவதும் சிரமம்தான். கவலையே வேண்டாம்! வீட்டில் இருக்கும் எளிய பொருட்களைக் கொண்டே வெறும் 10 நிமிடங்களில் தயாரிக்கக்கூடிய ஆறு சுவையான சிற்றுண்டிகளைப் பார்க்கலாம். மாலை நேரப் பசியைப் போக்கவும், குடும்பத்தினருடன் மழையை ரசித்தபடி சாப்பிடவும் இவை ஏற்றவை!

1. பன்னீர் மிளகு வறுவல்

தேவையான பொருட்கள்:

பன்னீர் -200 கிராம்

மிளகுத்தூள் -அரை தேக்கரண்டி

மிளகாய்த்தூள் -கால் தேக்கரண்டி

சோள மாவு -ஒரு தேக்கரண்டி

உப்பு, எண்ணெய்- தேவையான அளவு 

செய்முறை: 

பன்னீரைச் சிறிய துண்டுகளாக நறுக்கவும். மிளகுத்தூள், மிளகாய்த்தூள், சோள மாவு, உப்பு சேர்த்துப் பனீரில் புரட்டவும். வாணலியில் சிறிது எண்ணெய் ஊற்றி, பன்னீரைச் சேர்த்து மிதமான தீயில் எல்லாப் பக்கங்களும் பொன்னிறமாகும் வரை வறுத்தெடுக்கவும். சூடாகப் பரிமாறவும்.

2. மொறுமொறு அவல் வடை

தேவையான பொருட்கள்:

அவல் - ஒரு கப்

பொடியாக நறுக்கிய வெங்காயம் - ஒன்று

பச்சை மிளகாய் - ஒன்று

அரிசி மாவு - இரண்டு தேக்கரண்டி

உப்பு, கொத்தமல்லி, எண்ணெய் - தேவையான அளவு 

செய்முறை:

அவலைத் தண்ணீரில் லேசாக நனைத்து வடிகட்டவும். அதனுடன் வெங்காயம், பச்சை மிளகாய், அரிசி மாவு, உப்பு, கொத்தமல்லி சேர்த்துப் பிசையவும். சிறிய வடைகளாகத் தட்டி, சூடான எண்ணெயில் பொன்னிறமாகப் பொரித்தெடுக்கவும்.

3. கார்ன் மசாலா

தேவையான பொருட்கள்:

வேகவைத்த இனிப்புச் சோளம் - ஒரு கப்

வெண்ணெய் - ஒரு தேக்கரண்டி

மிளகாய்த்தூள் - கால் தேக்கரண்டி 

உப்பு, எலுமிச்சைச் சாறு - தேவையான அளவு 

செய்முறை: 

வாணலியில் வெண்ணெய் சேர்த்து உருகியதும் வேகவைத்த சோளத்தைப் போட்டு இரண்டு நிமிடங்கள் வதக்கவும். மிளகாய்த்தூள், மிளகுத்தூள், உப்பு சேர்த்துக் கிளறவும். இறுதியாக எலுமிச்சைச் சாறு கலந்து சூடாகப் பரிமாறவும்.

4. காய்கறி ரொட்டி ரோல்

தேவையான பொருட்கள்:

சப்பாத்தி அல்லது ரொட்டி - நான்கு

நறுக்கிய காய்கறிகள் ஒரு கப்

வெங்காயம் ஒன்று

மிளகாய்த்தூள், உப்பு, தக்காளி சாஸ், எண்ணெய்- தேவையான அளவு

செய்முறை: 

வாணலியில் எண்ணெய் ஊற்றி வெங்காயத்தை வதக்கவும். காய்கறிகள், உப்பு, மிளகாய்த்தூள் சேர்த்து வேகவிடவும். சப்பாத்தியின் மேல் தக்காளி சாஸ் தடவி, காய்கறிக் கலவையை வைத்து சுருட்டவும். தோசைக்கல்லில் சிறிது வறுத்து சூடாகப் பரிமாறவும்.

5. பாசிப்பருப்பு அடை

தேவையான பொருட்கள்:

ஊறவைத்த பாசிப்பருப்பு - ஒரு கப்

பச்சை மிளகாய் - ஒன்று

இஞ்சி - சிறிதளவு

வெங்காயம் - ஒன்று

உப்பு, எண்ணெய் - தேவையான அளவு

செய்முறை: 

பாசிப்பருப்பை பச்சை மிளகாய், இஞ்சி, உப்பு சேர்த்து கொரகொரப்பாக அரைக்கவும். அதனுடன் நறுக்கிய வெங்காயம் சேர்த்துக் கலக்கவும். தோசைக்கல்லில் எண்ணெய் தடவி, மாவை மெல்லிய அடையாக ஊற்றி இருபுறமும் பொன்னிறமாகச் சுட்டெடுக்கவும். தேங்காய் சட்னியுடன் பரிமாறினால் சுவையாக இருக்கும்.

6. சீஸ் மசாலா மக்காச்சோள உருண்டை

தேவையான பொருட்கள்:

வேகவைத்த மக்காச்சோளம் - அரை கப்

துருவிய சீஸ் - கால் கப்

வேகவைத்த உருளைக்கிழங்கு - ஒன்று

மிளகுத்தூள், உப்பு, பிரெட் தூள் - தேவையான அளவு

செய்முறை:

மக்காச்சோளத்தை லேசாக நசுக்கி, மசித்த உருளைக்கிழங்கு, சீஸ், மிளகுத்தூள், உப்பு சேர்த்துப் பிசையவும். சிறிய உருண்டைகளாக உருட்டிப் பிரெட் தூளில் புரட்டவும். எண்ணெயில் பொன்னிறமாகப் பொரித்தெடுக்கவும். சீஸ் உருகிய நிலையில் இருக்கும்போதே சூடாகப் பரிமாறவும். 

மழையை ரசிக்கச் சுவையான துணை!

மழை நாளில் சுவையான சிற்றுண்டிகளைச் சாப்பிடுவதற்காக அதிக நேரம் சமையலறையில் செலவிட வேண்டியதில்லை. வீட்டில் கிடைக்கும் பொருட்களைக் கொண்டே விரைவாகத் தயாரித்து, குடும்பத்தினருடன் மகிழ்ச்சியாகச் சாப்பிடலாம். மழையின் குளிர்ச்சியுடன் இந்தச் சூடான சிற்றுண்டிகளும் சேரும்போது மாலை நேரமே இனிமையாகிவிடும்!

மழைச் சூழலைத் தடையின்றி ரசித்தபடியே, சுடச்சுடச் சாப்பிட்டு மகிழக்கூடிய மனநிறைவான மாலைப் பொழுது.