டயட்டில் இருப்பவரா நீங்க? எண்ணெய் இல்லாத சுவையான ஓட்ஸ் அடை ரகசியம்!

டயட்டில் இருப்பவர்கள் அதிக நேரம் செலவிடாமல், செய்யும் ஒரு ஆரோக்கிய டிஷ்தான் ஓட்ஸ் அடை (Oats adai). இதன் செய்முறை குறித்துப் பார்ப்போமா?

ஓட்ஸில் அதிக நார்ச்சத்தும் புரதமும் நிறைந்துள்ளதால், இது நீண்ட நேரத்திற்கு பசியில்லாமல் வைத்திருக்கும். இது எடை குறைப்பிற்கு முயற்சிப்பவர்களுக்கும், நீரிழிவு நோயாளிகளுக்கும் மிகச்சிறந்த காலை உணவு அல்லது இரவு உணவாகும்.

தேவையான பொருட்கள்

• ஓட்ஸ் – 1 கப்

• கடலைப் பருப்பு - 1/4 கப்

• துவரம் பருப்பு - 1/4 கப்

• பச்சரிசி – 2 டேபிள் ஸ்பூன்

• பச்சை மிளகாய் – 2

• சின்ன வெங்காயம் – ¼ கப்

• கறிவேப்பிலை, கொத்தமல்லி – சிறிதளவு

• சீரகம் – ½ டீஸ்பூன்

• உப்பு – தேவையான அளவு

செய்முறை

1.  கடலைப்பருப்பு, துவரம்பருப்பு மற்றும் அரிசியை ஒரு மணி நேரம் ஊறவைக்கவும். ஓட்ஸை தனியாக எடுத்து வைக்கவும்.

2.  ஊறவைத்த பருப்பு, அரிசிக் கலவையை, காய்ந்த மிளகாய் அல்லது பச்சை மிளகாயுடன் சேர்த்து, கெட்டியான தோசை மாவுப் பதத்தில் அரைக்கவும்.

3.  அரைத்த மாவுடன் ஓட்ஸ் மற்றும் சீரகம் சேர்த்து, பத்து நிமிடங்கள் அப்படியே வைக்கவும். (Instant Oats பயன்படுத்துபவர்கள் மாவுடன் நேரடியாகச் சேர்க்கலாம்).

4.  நறுக்கிய சின்ன வெங்காயம், கறிவேப்பிலை, கொத்தமல்லி மற்றும் உப்பு சேர்த்து மாவை நன்கு கலக்கவும்.

5.  தோசைக்கல்லை (ஆயில்-ஃப்ரீ தோசைக்கல் -Non-Stick Pan - எடுத்துக்கொள்ளலாம்) மிதமான சூட்டில் வைத்து, ஒரு துளி எண்ணெய் கூடச் சேர்க்காமல், மாவை அடைகளாக ஊற்றவும்.

6.  அடையைச் சுற்றி சிறிது தண்ணீர் தெளித்து, மூடி போட்டு இரண்டு நிமிடங்கள் வேகவிடவும். நீராவியில் அடை நன்கு வெந்து, மொறுமொறுப்பாக மாறும்.

7.  அடிப்பக்கம் சிவந்ததும், மறுபக்கம் திருப்பிப் போட்டு வேகவிடவும்.

8.  பொன்னிறமான அடை தயாரானதும், புதினா சட்னி அல்லது தேங்காய்ச் சட்னியுடன் பரிமாறவும்.

முக்கிய டயட் டிப்ஸ்

• புரோட்டீன் பூஸ்ட்: மாவில் ஒரு டேபிள்ஸ்பூன் ராகி மாவு அல்லது பொடித்த வேர்க்கடலை சேர்த்தால் புரதச்சத்து அதிகரிக்கும்.

• மசாலா: மிளகாய்த்தூளுக்குப் பதிலாக மிளகு மற்றும் இஞ்சியைச் சேர்ப்பது செரிமானத்திற்கு உதவும்.

சுவையும் ஆரோக்கியமும் நிறைந்த இந்த ஓட்ஸ் அடை, குறைந்த கலோரியில் அதிக சுவையைக் கொடுக்கும் ஒரு அற்புதமான உணவு. இனி, டயட் என்றால், சுவையை தவிர்க்க வேண்டுமே என்ற கவலையே வேண்டாம். ஓட்ஸ் அடைபோல் உடலுக்கு ஆரோக்கியமான, சுவையான உணவுகள் அதிகம் உள்ளன. எனவே, ஓட்ஸ் அடை போன்ற உணவை ருசித்து மகிழுங்கள், ஆரோக்கியமாகவும் இருங்கள்.