சோலே பட்டூரா: இந்த ஒரு பொருளை சேர்த்தா டேஸ்ட் சும்மா அள்ளும்!

பஞ்சாப் மாநிலத்தின் பாரம்பரிய உணவான 'சோலே பட்டூரா' (Chole Bhature), இன்று இந்தியா முழுவதும் உள்ள உணவுப் பிரியர்களின் ஃபேவரைட். பலூன்போல உப்பி வரும் பட்டூராவை, காரசாரமான கொண்டைக்கடலை கிரேவியுடன் தொட்டுச் சாப்பிடும்போது கிடைக்கும் சுவைக்கு ஈடே கிடையாது. பலரும் இதைத் தங்கள் வீடுகளில் செய்து பார்க்க ஆசைப்படுவார்கள். 

ஆனால் கடைகளில் கிடைக்கும் அதே நிறமும், சுவையும், உப்பலான பட்டூராவும் வீட்டில் சரியாக வராது. இந்தக் கவலையை விடுங்கள். எந்தவிதமான செயற்கை சுவையூட்டிகளும் இல்லாமல், அசலான பஞ்சாபி தாபா ஸ்டைல் சோலே பட்டூராவை வீட்டிலேயே மிக எளிதாக எப்படிச் செய்வது என்று பார்ப்போம்.

தேவையான பொருட்கள்:

பட்டூரா மாவு பிசைய:

• மைதா மாவு - 2 கப்

• ரவை - 2 டேபிள் ஸ்பூன்

• கெட்டித் தயிர் - 3 டேபிள் ஸ்பூன்

• சர்க்கரை - 1 டீஸ்பூன்

• பேக்கிங் சோடா - 1/4 டீஸ்பூன்

• சமையல் எண்ணெய் - 2 டேபிள் ஸ்பூன்

• உப்பு - தேவையான அளவு

சோலே மசாலா செய்ய:

• வெள்ளை கொண்டைக்கடலை - 1 கப்

• டீத்தூள் முடிச்சு - 1

• பெரிய வெங்காயம் - 2 

• தக்காளி - 2 

• இஞ்சி பூண்டு விழுது - 1 டேபிள் ஸ்பூன்

• பச்சை மிளகாய் - 2

• சோலே மசாலா - 2 டேபிள் ஸ்பூன்

• மிளகாய்த் தூள், மல்லித் தூள் - தலா 1 டீஸ்பூன்

• சீரகம், பட்டை, லவங்கம், பிரியாணி இலை - தாளிக்க

• எண்ணெய் மற்றும் நெய் - தேவையான அளவு

• உப்பு - தேவையான அளவு

செய்முறை!

சோலே பட்டூரா செய்வதில் மிக முக்கியமானது, பட்டூராவுக்கான மாவைச் சரியாகப் பிசைவதுதான். ஒரு அகலமான பாத்திரத்தில் மைதா, ரவை, சர்க்கரை, பேக்கிங் சோடா, உப்பு மற்றும் தயிர் ஆகியவற்றைச் சேர்த்துக் கொள்ளுங்கள். ரவை சேர்ப்பதால் பட்டூரா எண்ணெயிலிருந்து எடுத்த பிறகும் நீண்ட நேரத்திற்கு அமுங்கிப் போகாமல் உப்பலாகவே இருக்கும். இப்போது இதில் தேவையான அளவு வெதுவெதுப்பான தண்ணீர் ஊற்றி, சப்பாத்தி மாவை விடச் சற்று தளர்வாகப் பிசைய வேண்டும். 

மாவை நன்றாக அடித்துப் பிசைந்த பிறகு, மேலே சிறிதளவு எண்ணெய் தடவி, ஒரு ஈரத்துணியால் மூடி குறைந்தது இரண்டு மணி நேரமாவது ஊற வைக்க வேண்டும். மாவு எந்த அளவுக்கு ஊறுகிறதோ, அந்த அளவுக்குப் பட்டூரா மிருதுவாகவும் பஞ்சு போலவும் வரும்.

மாவு ஊறும் அதே நேரத்தில், சோலே கிரேவியைத் தயார் செய்துவிடலாம். இரவே ஊறவைத்த கொண்டைக்கடலையை ஒரு குக்கரில் போட்டு, அதனுடன் ஒரு சிறிய வெள்ளை துணியில் ஒரு ஸ்பூன் டீத்தூளைக் கட்டிப் போட வேண்டும். கடைகளில் கிடைக்கும் அந்த அசல் கருமையான நிறத்தை இந்த டீத்தூள்தான் கொடுக்கும். தேவையான அளவு தண்ணீர் மற்றும் உப்பு சேர்த்து 4 முதல் 5 விசில் வரை விட்டு நன்றாக வேகவைத்து எடுத்துக் கொள்ளுங்கள். 

பின்னர் ஒரு கடாயில் எண்ணெய் மற்றும் ஒரு ஸ்பூன் நெய் ஊற்றி, பட்டை, லவங்கம், பிரியாணி இலை, சீரகம் தாளிக்கவும். பொடியாக நறுக்கிய வெங்காயத்தைச் சேர்த்துப் பொன்னிறமாக வதங்கியதும், இஞ்சி பூண்டு விழுது, அரைத்த தக்காளி விழுது சேர்த்து எண்ணெய் பிரிந்து வரும் வரை நன்றாக வதக்க வேண்டும். 

இப்போது மிளகாய்த் தூள், மல்லித் தூள் மற்றும் சோலே மசாலா சேர்த்து வதக்கி, வேகவைத்த கொண்டைக்கடலையை தண்ணீருடன் சேர்த்து, கிரேவி கெட்டியாகும் வரை மிதமான தீயில் கொதிக்க விடுங்கள். கிரேவி கொதிக்கும்போது கொஞ்சம் கொத்தமல்லி தூவினால் வாசம் ஊரைக் கூட்டும்.

கிரேவி தயாரானதும், ஊறவைத்துள்ள மாவை எடுத்துச் சிறுசிறு உருண்டைகளாகப் பிடித்துக் கொள்ளுங்கள். மாவைச் சப்பாத்தி கட்டையில் வைத்துத் தேய்க்கும்போது, ரொம்பவும் மெல்லியதாக இல்லாமல் சற்று தடிமனாகத் தேய்க்க வேண்டும். அடுப்பில் ஒரு அகலமான கடாயை வைத்து தாராளமாக எண்ணெய் ஊற்றுங்கள். 

எண்ணெய் நன்றாகக் காய்ந்து சூடாக இருக்க வேண்டும்; அப்போதுதான் மாவைப் போட்டவுடன் அது பலூன் போல உப்பி வரும். தேய்த்து வைத்துள்ள மாவை எண்ணெயில் போட்டு, கரண்டியால் லேசாக அதன் மேல் எண்ணெயை ஊற்றி விட்டால், பட்டூரா அழகாக உப்பி மேலெழும்பி வரும். இருபுறமும் லேசான பொன்னிறமாகச் சிவந்ததும் எடுத்துவிடலாம்.

ஆவி பறக்கும், பஞ்சு போன்ற சுடச்சுடப் பட்டூரா மற்றும் காரசாரமான பஞ்சாபி சோலே கிரேவி தயார். தட்டில் இரண்டு உப்பலான பட்டூராக்களை வைத்து, அதன் மேல் கமகமக்கும் சோலே கிரேவியை ஊற்றி, பக்கத்தில் பொடியாக நறுக்கிய வெங்காயம், ஒரு துண்டு எலுமிச்சை மற்றும் ஊறுகாயோடு பரிமாறிப் பாருங்கள். உங்கள் வீட்டு டைனிங் டேபிளே ஒரு நிமிடம் பஞ்சாபி தாபாவாக மாறிவிடும்.