புளித்த தயிரை குப்பையில் கொட்டாதீங்க... இந்த 5 சூப்பர் யூஸ் தெரிஞ்சா அசந்துடுவீங்க!

நமது வீடுகளில் மீதமாகும் பால் பொருட்களை அடுத்த நாள் லேசாக கெட்டுப்போன வாசனை வந்தால் உடனே தூக்கி குப்பையில் வீசிவிடுவோம். குறிப்பாக கோடைக்காலத்தில் தயிர் சீக்கிரமாகவே புளித்துவிடும். அப்படி மீதமாகும் தயிரை வீணாக்காமல் நமது அன்றாட வாழ்வில் பல அற்புதமான வழிகளில் எளிதாகப் பயன்படுத்த முடியும். இது பற்றி பலருக்கும் தெரிவதில்லை. இதை எப்படி உபயோகமாக மாற்றலாம் என்பதை இப்போது பார்க்கலாம்.

சமையலறையில் பயன்படுத்தும் விதம்!

நமது தென்னிந்தியாவின் பாரம்பரிய உணவான இட்லி மற்றும் தோசை மாவு அரைக்கும்போது சிறிது புளித்த தயிர் சேர்த்தால் மாவு மிக விரைவாகப் புளித்துவிடும். இது தோசையை நல்ல பொன்னிறமாகவும் இட்லியை மிகவும் மிருதுவாகவும் மாற்றும். அதுமட்டுமில்லாமல் நார்த் இந்தியன் ரெசிபிகளான டோக்ளா மற்றும் உத்தப்பம் செய்வதற்கும் இது பெரிதும் உதவுகிறது.

பனீர் மற்றும் சோயா சாப் போன்ற உணவு வகைகளைச் சமைக்கும் முன்பு ஊறவைக்க இதை தாராளமாகப் பயன்படுத்தலாம். இது கடினமான பனீரை மிகவும் மென்மையாக மாற்றும். மேலும் வீடுகளில் தக்காளி இல்லாத நேரங்களில் குழம்பு மற்றும் கிரேவி வைக்கும்போது புளிப்பிற்காக இதை நன்றாகக் கடைந்து ஒரு மாற்றுப் பொருளாகச் சேர்க்கலாம்.

பளபளக்கும் முகம் மற்றும் கூந்தல்!

நமது சருமத்தில் உள்ள இறந்த செல்களை நீக்க இது ஒரு சிறந்த இயற்கை மருந்தாகச் செயல்படுகிறது. சிறிதளவு கடலை மாவு மற்றும் மஞ்சள் தூளுடன் தயிரைக் கலந்து முகத்தில் தடவி 15 நிமிடம் கழித்துக் கழுவினால் முகம் பளபளப்பாக மாறும். சென்சிடிவ் சருமம் உள்ளவர்கள் முதலில் கைகளில் தடவிப் பரிசோதிப்பது நல்லது.

கூந்தல் பராமரிப்புக்கும் இது மிகச் சிறந்த ஒரு தீர்வாகும். வறண்ட, பொலிவிழந்த முடியில் இதைப் பூசி சிறிது நேரம் ஊறவைத்துக் குளித்தால் முடி பட்டுப்போல மாறும். சிறிதளவு தேன் கலந்து ஹேர் பேக் ஆகவும் இதைப் பயன்படுத்தலாம். இது தலையில் உள்ள பொடுகை நீக்கி முடி உதிர்வதைக் கணிசமாகக் குறைக்கும்.

சுத்தம் செய்ய பயன்படுத்தலாம்!

நமது வீடுகளில் உள்ள பூஜை சாமான்கள் நாள்பட கறுத்துப் போவது இயல்பான ஒன்றுதான். செம்பு மற்றும் பித்தளைப் பாத்திரங்களைச் சுத்தம் செய்ய இதில் சிறிதளவு உப்பு அல்லது மாவு சேர்த்து ஒரு பேஸ்ட் போலத் தயார் செய்துகொள்ளுங்கள். இதை அந்தப் பாத்திரங்களின் மீது தடவி மெதுவாகத் தேய்த்துக் கழுவினால் அவை புதிது போல மின்னுவதைப் பார்க்கலாம்.

செடிகளுக்கு உரம்!

மாடித்தோட்டம், செடிகள் வளர்ப்பவர்களுக்கு இது ஒரு வரப்பிரசாதமாகும். இதனுடன் அதிக அளவு தண்ணீர் கலந்து செடிகளுக்கு இயற்கையான உரமாக ஊற்றலாம். இதில் உள்ள நல்ல பாக்டீரியாக்கள், கால்சியம் சத்துகள் செடிகளின் வேர்களை வலுவாக்கி நல்ல வளர்ச்சியைத் தரும். பூச்சிகளை விரட்டவும் இது ஒரு சிறந்த இயற்கை கிருமிநாசினியாகப் பயன்படும்.

இத்தனை நன்மைகளைத் தன்னுள்ளே அடக்கி வைத்துள்ள புளித்த தயிர் இனிமேல் உங்கள் வீடுகளில் மீதமானால் அதை ஒருபோதும் குப்பையில் கொட்டாதீர்கள். மேலே சொன்ன இந்த 5 எளிய குறிப்புகளைப் பயன்படுத்தி உங்கள் சமையல் மற்றும் அன்றாட வீட்டு வேலைகளை மிக எளிதாக மாற்றிக்கொள்ளுங்கள்.