மைதா வேண்டாம்! ஈவ்னிங் டீக்கு சூடான, சாஃப்டான கோதுமை 'டீக்கடை பால் அப்பம்' ரெடி!

ஊர்ப்பக்கங்களில் உள்ள பெட்டிக் கடைகளிலும், நடுத்தெரு டீக்கடைகளிலும் பெரிய கண்ணாடி பாட்டில்களில் அடைத்து வைக்கப்பட்டிருக்கும் தின்பண்டங்களைப் பார்ப்பதே ஒரு தனி சுகம். அதில் பலருக்கும் மிகவும் பிடித்தமான, பார்த்த உடனே சாப்பிடத் தூண்டும் ஒரு இனிப்பு ஸ்நாக்ஸ் என்றால் அது சுடச்சுடப் பொரித்து வைக்கப்பட்டிருக்கும் 'பால் அப்பம்' தான். 

வெளியே நல்ல மொறுமொறுப்பாகவும், உள்ளே கேக் போலப் பஞ்சு போன்றும் இருக்கும் இந்த அப்பத்தை, மாலையில் ஒரு டம்ளர் சூடான டீயுடன் சேர்த்துச் சாப்பிட்டால் அந்த நாளே இனிமையாகிவிடும். டீக்கடைகளில் பெரும்பாலும் இதை மைதா மாவில் செய்வார்கள்.

ஆனால், நாம் வீட்டில் செய்யும்போது மைதாவுக்குப் பதிலாகக் கோதுமை மாவை வைத்து, அதே சுவையுடன் ஆரோக்கியமாக எப்படிச் செய்வது என்று இந்தப் பதிவில் பார்ப்போம்.

தேவையான பொருட்கள்:

• கோதுமை மாவு - 1 கப்

• பச்சரிசி மாவு - 2 டேபிள் ஸ்பூன்

• சர்க்கரை அல்லது நாட்டுச்சர்க்கரை - 1/2 கப்

• காய்ச்சி ஆறவைத்த திக்கான பால் - 1/2 கப்

• ஏலக்காய்த் தூள் - 1/2 டீஸ்பூன்

• சமையல் சோடா  - 1 சிட்டிகை

• உப்பு - 1 சிட்டிகை

• சமையல் எண்ணெய் - பொரிக்கத் தேவையான அளவு

 செய்முறை! 

பால் அப்பம் சரியான வடிவத்திலும் மிருதுவாகவும் வருவதற்கு, மாவு பிசையும் பக்குவம் மிக முக்கியம். முதலில் ஒரு அகலமான பாத்திரத்தில் கோதுமை மாவு, பச்சரிசி மாவு, ஏலக்காய்த் தூள் மற்றும் ஒரு சிட்டிகை உப்பு ஆகியவற்றைச் சேர்த்துக் கலந்து கொள்ளுங்கள். 

இப்போது காய்ச்சி ஆறவைத்த பாலில் சர்க்கரையைச் சேர்த்து நன்றாகக் கரைத்துக் கொள்ள வேண்டும். சர்க்கரை கரைந்த பாலை, மாவில் சிறுகச் சிறுக ஊற்றி, இட்லி மாவு பதத்திற்கு எவ்வித கட்டிகளுமின்றி நன்றாகக் கரைத்துக்கொள்ளுங்கள். 

மாவு ரொம்பவும் தண்ணியாகிவிடக் கூடாது. கடைசியாக ஒரு சிட்டிகை சமையல் சோடா சேர்த்து நன்றாகக் கலக்கி, ஒரு 10 நிமிடம் மாவை அப்படியே ஊற விடுங்கள்.

இப்போது அடுப்பில் ஒரு அடிகனமான கடாயை வைத்து, அப்பம் பொரிப்பதற்குத் தேவையான அளவு எண்ணெய் ஊற்றுங்கள். எண்ணெய் மிதமான சூட்டிற்கு வந்ததும், அடுப்பை நடுத்தரத் தீயில் வைத்துக்கொள்ள வேண்டும். 

நாம் தயார் செய்து வைத்துள்ள மாவை, கைகளால் சிறுசிறு உருண்டைகளாக எடுத்து எண்ணெயில் கிள்ளிப் போடுங்கள். மாவு எண்ணெயில் விழுந்தவுடன் அழகாகப் பலூன் போல உப்பி மேலே வரும்.

அப்பம் ஒருபுறம் வெந்ததும், கரண்டியால் மெதுவாகத் திருப்பி விட்டு, எல்லாப் பக்கங்களும் அழகான பொன்னிறமாகச் சிவந்து வரும் வரை பொறுமையாக வேகவைக்க வேண்டும். அடுப்பு அதிகத் தீயில் இருந்தால் வெளியே சீக்கிரம் சிவந்துவிடும், ஆனால் உள்ளே மாவு வேகாது.

எனவே மிதமான தீயில் பொரித்தெடுத்து, எண்ணெயை வடித்துவிட்டு ஒரு தட்டில் மாற்றினால் கமகமக்கும் அசல் 'டீக்கடை பால் அப்பம்' தயார். 

பள்ளியிலிருந்து சோர்வாக வரும் குழந்தைகளுக்கு, மாலையில் இந்தச் சூடான பால் அப்பத்தைச் செய்து கொடுத்துப் பாருங்கள், தட்டு நிமிடத்தில் காலியாகிவிடும்.