கல்யாண வீட்டு ஸ்பெஷல் சுரைக்காய் அல்வா செய்யலாம் வாங்க!

சுரைக்காய் அல்வா, பொதுவாக கல்யாண வீடுகளில் மிகவும் ஸ்பெஷலாக பரிமாறப்படும் ஒரு உணவு. சுரைக்காய் சாதாரணமாக பலருக்கும் பிடிக்காத காய்கறியாக இருந்தாலும், அல்வாவாக செய்யும் போது அதன் சுவை அபாரமாக இருக்கும். குழந்தைகள் முதல் பெரியவர்கள் வரை அனைவரும் விரும்பி சாப்பிடும் ஒரு இனிப்பு இது. சத்தான சுரைக்காயை இப்படி சுவையான அல்வாவாக செய்து கொடுக்கும் போது, பிடிக்காதவர்கள் கூட விரும்பி சாப்பிடுவார்கள். சரி வாருங்கள் இந்தப் பதிவில் இதை எப்படி செய்வது எனப் பார்க்கலாம்.

தேவையான பொருட்கள்:

• சுரைக்காய் - 500 கிராம்

• சர்க்கரை - 250 கிராம்

• நெய் - 100 மில்லி

• பால் - 100 மில்லி

• முந்திரி, திராட்சை - தேவைக்கேற்ப

• ஏலக்காய் பொடி - 1/2 தேக்கரண்டி

• ஃபுட் கலர் - ஒரு சிட்டிகை

செய்முறை:

முதலில் சுரைக்காயை தோல் சீவி, உள்ளிருக்கும் விதைகளை நீக்கி துருவிக்கொள்ளவும். துருவிய சுரைக்காயில் இருக்கும் நீரை நன்றாக பிழிந்து எடுத்துவிடவும்.

அடுத்ததாக, ஒரு கனமான கடாயை அடுப்பில் வைத்து நெய் ஊற்றி சூடாக்கவும். நெய் சூடானதும் முந்திரி, திராட்சை சேர்த்து பொன்னிறமாக வறுத்து தனியாக எடுத்து வைக்கவும்.

அதே கடாயில் பிழிந்து வைத்த சுரைக்காய் துருவலை சேர்த்து பச்சை வாசனை போகும் வரை வதக்கவும். சுரைக்காய் நன்றாக வதங்கியதும் பால் சேர்த்து கொதிக்க விடவும்.

பால் சுண்டி சுரைக்காய் வெந்ததும் சர்க்கரை சேர்த்து கிளறவும். சர்க்கரை கரைந்து அல்வா பதம் வரும் வரை மிதமான தீயில் கிளறிக்கொண்டே இருக்கவும்.

அல்வா கடாயில் ஒட்டாமல் சுருண்டு வரும்போது ஏலக்காய் பொடி மற்றும் ஃபுட் கலர் சேர்த்து கிளறவும்.

கடைசியாக வறுத்து வைத்த முந்திரி, திராட்சை சேர்த்து நன்றாக கலந்து இறக்கினால் சுவையான, கல்யாண வீட்டு ஸ்பெஷல் சுரைக்காய் அல்வா தயார். இந்த சுவையான ரெசிபியை இன்றே முயற்சித்துப் பார்த்து உங்களது கருத்துக்களை எங்களுடன் பகிர்ந்து கொள்ளுங்கள்.